ໃນວັນທີ 29 ເມສາ 2022 ທີ່ໂຮງແຮມ ແລນມາກ ຣີເວີຊາຍ, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ, ຫົວໜ້າເຈົ້າໜ້າທີ່ອາວຸໂສອາຊຽນ ຂອງ ສປປ ລາວ ໄດ້ເປັນປະທານຮ່ວມ ກອງປະຊຸມປຶກສາຫາລືອາຊຽນ ຮ່ວມກັບ ທ່ານ ເຈດສະດາ ກະຕະເວທິນ, ເອກອັກຄະລັດຖະທູດ ແຫ່ງ ຣາຊະອານາຈັກ ໄທ ປະຈໍາ ສປປ ລາວ. ກອງປະຊຸມຄັ້ງນີ້ ຈັດຂຶ້ນໂດຍການເປັນເຈົ້າພາບຂອງສະຖານທູດໄທ ປະຈໍາ ສປປ ລາວ ໃນນາມປະທານໝູນວຽນ, ມີບັນ ດາເອກອັກຄະລັດຖະທູດ ແລະ ຜູ້ຕາງໜ້າຈາກສະຖານທູດປະເທດສະມາຊິກອາຊຽນ ປະຈຳ ສປປ ລາວ ເຂົ້າຮ່ວມ.

         ​ ກອງປະຊຸມໄດ້ແລກປ່ຽນຄໍາຄິດຄໍາເຫັນຕໍ່ບັນຫາຕ່າງໆທີ່ມີຄວາມສົນໃຈຮ່ວມກັນ. ໃນໂອກາດນີ້, ທ່ານ ຮອງລັດ ຖະມົນຕີ ທອງຜ່ານ ສະຫວັນເພັດ ໄດ້ແຈ້ງໃຫ້ກອງປະຊຸມຊາບ ກ່ຽວກັບສະພາບການພັດທະນາໃນ ສປປ ລາວ ເປັນຕົ້ນແມ່ນຜົນການຢ້ຽມຢາມຕ່າງປະເທດຂອງການນໍາຂັ້ນສູງ ຂອງ ສປປ ລາວ, ການຢ້ຽມ ສປປ ລາວ ຂອງການນໍາຂັ້ນສູງ ຂອງຕ່າງປະເທດ ໃນໄລຍະມໍ່ໆມານີ້ ແລະ ແຜນການຢ້ຽມຢາມໃນອະນາຄົດ ລວມທັງສະພາບການແພ່ລະບາດຂອງພະຍາດໂຄວິດ-19, ມາດຕະການຜ່ອນຜັນສໍາລັບການເດີນທາງເຂົ້າ-ອອກ ສປປ ລາວ​ ລວມທັງນະໂຍບາຍ ແລະມາດຕະການ ຂອງລັດ ຖະບານໃນການຟື້ນຟູເສດຖະກິດຫຼັງໂຄວິດ-19.​ ກອງປະຊຸມ ຍັງໄດ້ຮັບຊາບການລາຍງານ ໂດຍທ່ານ ເອກອັກຄະລັດຖະທູດ ກໍາປູເຈຍ ກ່ຽວກັບກອງປະຊຸມ ແລະ ກິດຈະກໍາ ພາຍໃຕ້ການເປັນທານອາຊຽນ ຂອງ ກໍາປູເຈຍ ປີ 2022.

          ກອງປະຊຸມປຶກສາຫາລືອາຊຽນ ແມ່ນກົນໄກສໍາລັບການພົບປະ ລະຫວ່າງ ທ່ານຮອງລັດຖະມົນຕີກະຊວງການຕ່າງປະເທດ ຜູ້ຊີ້ນໍາວຽກງານອາຊຽນ ແລະ ບັນດາທູດຂອງປະເທດສະມາຊິກອາຊຽນປະຈໍາ ສປປ ລາວ, ຈັດຂຶ້ນປີລະສອງຄັ້ງ.