ໃນວັນທີ 12 ກໍລະກົດ 2022, ທີ່ ແຂວງຈໍາປາສັກ, ກົມເສດຖະກິດ, ກະຊວງການຕ່າງປະເທດ ໄດ້ຈັດກອງປະຊຸມສໍາມະນາ ພາຍໃຕ້ຫົວຂໍ້: “ການແລກປ່ຽນ ແລະ ຖອດຖອນບົດຮຽນ ໃນການຈັດຕັ້ງປະຕິບັດ ຂໍ້ລິເລີ່ມ ຫນຶ່ງແລວ ຫນຶ່ງເສັ້ນທາງ ຮ່ວມກັບບັນດາກະຊວງ/ຂະແໜງການຂອງສູນກາງ ແລະ ແຂວງພາກໃຕ້ ຂອງ ສປປ ລາວ” ພາຍໃຕ້ການເປັນປະທານຂອງ ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ ໂດຍມີຜູ້ຕາງໜ້າຈາກບັນດາກະຊວງ/ຂະແໜງການທີ່ກ່ຽວຂ້ອງ ຂອງສູນກາງ ແລະ ບັນດາແຂວງພາກໃຕ້ ຂອງ ສປປ ລາວ ເຂົ້າຮ່ວມ.
ກອງປະຊຸມສໍາມະນາດັ່ງກ່າວ ແມ່ນຫນຶ່ງໃນກິດຈະກຳ ທີ່ໄດ້ຮັບການສະໜັບສະໜູນ ຈາກກອງທຶນພິເສດແມ່ນໍ້າຂອງ-ແມ່ນໍ້າລ້ານຊ້າງ. ຈຸດປະສົງ ແມ່ນເພື່ອປຶກສາຫາລື ແລະ ແລກປ່ຽນບົດຮຽນ ກ່ຽວກັບ ການຈັດຕັ້ງປະຕິບັດວຽກງານການຮ່ວມມື ພາຍໃຕ້ຂໍ້ລິເລີ່ມ ໜຶ່ງແລວ ໜຶ່ງເສັ້ນທາງ ຂອງບັນດາຂະແໜງການຂັ້ນສູນກາງ ແລະ ທ້ອງຖິ່ນ ຂອງ ສປປ ລາວ ເພື່ອກຳນົດທິດທາງການຮ່ວມມືໃນຕໍ່ຫນ້າ, ແນໃສ່ຂົນຂວາຍກຳລັງແຮງ ແລະ ຍາດແຍ່ງເອົາຜົນປະໂຫຍດດ້ານຕ່າງໆ ຈາກຂອບການຮ່ວມມືດັ່ງກ່າວ ໂດຍສະເພາະດ້ານເສດຖະກິດ-ສັງຄົມ, ຄວາມຮູ້ດ້ານເຕັກນິກວິທະຍາສາດ ແລະ ການພັດທະນາພື້ນຖານໂຄງລ່າງ ເປັນຕົ້ນແມ່ນ ການສ້າງເສັ້ນທາງດ່ວນ ແລະ ທາງລົດໄຟ ແນໃສ່ຂະຫຍາຍການເຊື່ອມຈອດ ຕາມແລວທາງເສດຖະກິດ ລາວ-ຈີນ ລົງໄປສູ່ບັນດາແຂວງພາກໃຕ້ ຂອງ ສປປ ລາວ ເພື່ອປະກອບສ່ວນເຂົ້າໃນການຈັດຕັ້ງປະຕິບັດນະໂຍບາຍເປີດກວ້າງການຮ່ວມມື, ການເຊື່ອມໂຍງ ແລະ ເຊື່ອມຈອດ ຂອງ ສປປ ລາວ ກັບພາກພື້ນ ແລະ ສາກົນ. ນອກຈາກນັ້ນ, ກໍ່ເພື່ອປັບປຸງ ແລະ ພັດທະນາດ້ານລະບົບຂົນສົ່ງພາຍໃນ ແລະ ຕ່າງປະເທດ ເພື່ອອໍານວຍຄວາມສະດວກດ້ານການຂົນສົ່ງສິນຄ້າໃຫ້ວ່ອງໄວ ແລະ ກວ້າງຂວາງ.
ກອງປະຊຸມສໍາມະນາ ໄດ້ດໍາເນີນໄປດ້ວຍບັນຍາກາດທີ່ດີ, ມີການແລກປ່ຽນຄໍາຄິດເຫັນ, ຂໍ້ມູນຂ່າວສານ ແລະ ການປຶກສາຫາລືແບບກົງໄປກົງມາ ແລະ ມີຄວາມອຸດົມສົມບູນທາງດ້ານເນື້ອໃນ ໂດຍສະເພາະການສະເໜີຈາກຂະ ແໜງການກ່ຽວຂ້ອງ ໃນການແລກປ່ຽນບົດຮຽນ ແລະ ປະສົບການຕົວຈິງ ກ່ຽວກັບ ການຈັດຕັ້ງປະຕິບັດວຽກງານການຮ່ວມມື ພາຍໃຕ້ຂໍ້ລິເລີ່ມ ໜຶ່ງແລວ ໜຶ່ງເສັ້ນທາງ ພ້ອມທັງຕີລາຄາຄືນ ຂໍ້ສະດວກ, ຂໍ້ຫຍຸ້ງຍາກ ແລະ ຂໍ້ສະເໜີໃນການແກ້ໄຂບັນຫາຄົງຄ້າງ ໃນການຈັດຕັ້ງປະຕິບັດວຽກງານໃນຂອບການຮ່ວມມືດັ່ງກ່າວ ເພື່ອຍາດແຍ່ງຜົນປະໂຫຍດຕົວຈີງມາສູ່ປະຊາຊົນໃນພາກພື້ນ ແລະ ສາກົນ.