ໃນລະຫວ່າງວັນທີ 16-18 ສິງ​ຫາ 2022 ທີ່ຜ່ານມາ ທ່ານ ຕິ່ງ ສຸກ​ສັນ, ຮອງ​ເລ​ຂາ​ຄະ​ນະ​ພັກ​ກະ​ຊວງ, ຮອງ​ລັດ​ຖະ​ມົນ​ຕີ​ກະ​ຊວ​ງ​ການ​ຕ່າງ​ປະ​ເທດ ພ້ອມຄະນະ ໄດ້ເຄື່ອນໄຫວວຽກງານ ຢູ່ ແຂວງຈໍາປາສັກ, ຈຸດປະສົງ ແມ່ນເພື່ອຊຸກຍູ້, ຕິດຕາມ, ກວດກາ​ ວຽກງານກໍ່ສ້າງ​ພັກ-ວຽກງານຄຸ້ມຄອງພະນັກງານ ຢູ່ ​ກອງສໍາຫຼວດ ແລະ ປັກຫຼັກໝາຍຊາຍແດນ: ເພື່ອໃຫ້ພະນັກງານ-ສະມາຊິກພັກ ກໍາແໜ້ນ 5 ຫຼັກການ, 3 ທິດນໍາຂອງພັກ ແລະ ໃຫ້ເຂົ້າໃຈຢ່າງເລິກເຊິ່ງກ່ຽວກັບວຽກງານຄຸ້ມຄອງພະນັກງານ, ເພື່ອເຮັດໃຫ້ພະນັກງານກໍາໄດ້ສະພາບການຕ່າງໆ ທັງພາກພື້ນ ແລະ ສາກົນ, ຈໍາແນກໄດ້ການຫັນປ່ຽນໂດຍສັນຕິຂອງພວກອິດທິກໍາລັງປໍລະປັກ, ມີຄວາມເຊື່ອໜັ້ນຕໍ່ການນໍາພາຂອງພັກ ໃນການປະຕິບັດໜ້າທີ່ວຽກງານສໍາຫຼວດ ແລະ ປັກຫຼັກໝາຍຊາຍແດນ ກັບປະເທດໃກ້ຄຽງທີ່ຍັງບໍ່ທັນສໍາເລັດ ໂດຍສະເພາະຊາຍແດນ ລາວ-ໄທ ແລະ ລາວ-ກໍາປູເຈຍ.

ການ​​​ເຄື່ອນ​ໄຫວ​ວຽກງານ​ຄັ້ງ​ນີ້, ທ່ານ​ ຮອງ​ລັດ​ຖະ​ມົນ​ຕີກະ​ຊວງ​ການ​ຕ່າງ​ປະ​ເທດ ພ້ອມ​ດ້ວຍ​ຄະ​ນະ​ຍັງໄດ້​ເຂົ້າ​ຢ້ຽມ​ຂ່ຳ​ນັບ ທ່ານ ​ວິໄ​ລ​ວົງ ບຸດ​ດາ​ຄຳ, ກໍາມະການສູນກາງພັກ, ເລຂາພັກແຂວງ, ເຈົ້າ​ແຂວງໆ​ຈຳ​ປາ​ສັກ ​ເພື່ອລາຍ​ງານ​ຈຸດ​ປະ​ສົງການເຄື່ອນໄຫວ​ຂອງ​ຄະນະໃຫ້ທ່ານເຈົ້າແຂວງໄດ້ຮັບຊາບ ແລະ ໃນໂອກາດນີ້, ທ່ານຮອງລັດຖະມົນຕີໄດ້ສະ​ແດງ​ຄວາມ​ຂອບ​ໃຈເປັນຢ່າງສູງ​ຕໍ່​ການ​ຕ້ອນ​ຮັບ​ຢ່າງອົບອຸ່ນ ແລະ ໄດ້ອໍານວຍຄວາມສະດວກໃຫ້ ​ພະ​ນັກ​ງານ​ຈາກ​ກະ​ຊວງ​ການ​ຕ່າງ​ປະ​ເທດ​​ ທີ່ມາປະຕິບັດໜ້າທີ່ວຽກງານຢູ່ ​ແຂວງ​ຈຳ​ປາ​ສັກ. ຫຼັງຈາກນັ້ນ, ​ທ່ານ​ ຮອ​ງ​ລັດ​ຖະ​ມົນ​ຕີ ຍັງໄດ້​ພົບປະ​​ແລກ​ປ່ຽນບົດຮຽນຮ່ວມ​ກັບ​ຄະ​ນະ​ຈັດ​ຕັ້ງ​ແຂວງ​, ພະແນກການຕ່າງປະເທດແຂວງ ກ່ຽວກັບ ວຽກງານກໍ່​ສ້າງ​ພັກ-ພະ​ນັກ​ງານ ແລະ ວຽກ​ງານ​ນະ​ໂຍ​ບາຍຕ່າງໆ. ຈາກນັ້ນ, ທ່ານຮອງລັດຖະມົນຕີ ພ້ອມດ້ວຍຄະນະໄດ້ສືບຕໍ່ເຄື່ອນໄຫວເຮັດວຽກ ຢູ່ ກອງບັນຊາການສໍາຫຼວດ ແລະ ປັກຫຼັກໝາຍຊາຍແດນ ລາວ-ໄທ ແລະ ກອງສໍາຫຼວດ ແລະ ປັກຫຼັກໝາຍຊາຍແດນ ລາວ-ກໍາປູເຈຍ ຕື່ມອີກ.