ໃນວັນທີ 06 ຕຸລາ 2022 ທີ່ ພະນົມເປັນ, ຣາຊະອານາຈັກ ກໍາປູເຈຍ, ທ່ານ ທອງຜ່ານ ສະຫວັນເພັດ,   ຮອງລັດຖະມົນຕີກະຊວງ​ການ​ຕ່າງ​ປະ​ເທດ, ທັງເປັນຫົວໜ້າເຈົ້າໜ້າທີ່ອາວຸໂສອາຊຽນ ຂອງ ສປປ ລາວ ​ໄດ້​ນຳພາຄະນະຜູ້ແທນລາວ ເຂົ້າຮ່ວມກອງປະຊຸມໜ່ວຍງານວິຊາການຂອງສະພາປະສານງານອາຊຽນ ກ່ຽວກັບການສະໝັກເຂົ້າເປັນສະມາຊິກອາຊຽນຂອງ ຕີມໍແລັດສະເຕ ຄັ້ງທີ 13 (13^th ASEAN Coordinating Council Working Group (ACCWG) on Timor-Leste’s Application for ASEAN Membership), ກອງປະຊຸມໜ່ວຍງານວິຊາການຂອງສະພາປະສານງານອາຊຽນ ວ່າດ້ວຍການຊ່ວຍເຫຼືອສຸກເສີນດ້ານສາທາລະນະສຸກ ຄັ້ງທີ 9 (9^th ASEAN Coordinating Council Working Group on Public Health Emergencies (ACCWG-PHE)), ກອງປະຊຸມເຈົ້າໜ້າທີ່ອາວຸໂສອາຊຽນບວກສາມ (ASEAN Plus Three Preparatory Senior Officials’ Meeting (APT Prep-SOM) ແລະ ກອງປະຊຸມເຈົ້າໜ້າທີ່ອາວຸໂສຂອງກອງປະຊຸມສຸດຍອດອາຊີຕາເວັນອອກ (East Asia Summit Preparatory Senior Officials’ Meeting (EAS Prep-SOM) ພາຍໃຕ້ການເປັນປະທານຂອງກໍາປູເຈຍ ໃນຖານະປະທານອາຊຽນສົກປີ 2022.

    ກອງປະຊຸມໜ່ວຍງານວິຊາການຂອງສະພາປະສານງານອາຊຽນ ກ່ຽວກັບການສະໝັກເຂົ້າເປັນສະມາຊິກອາຊຽນຂອງ ຕີມໍແລັດສະເຕ ຄັ້ງທີ 13 ໄດ້ຮັບຊາບຄວາມຄືບໜ້າດ້ານຕ່າງໆ ໂດຍສະເພາະຜົນ​ການ​ໄປ​ຢ້ຽ​ມຢາມ ​ແລະ ​ເຮັດ​ວຽກຂອງຄະນະໜ່ວຍງານສັງລວມຂໍ້ມູນ​ຂອງເສົາ​ຄໍ້າປະຊາຄົມ​ເສດຖະກິດ ​ແລະ ເສົາຄໍ້າປະຊາຄົມວັດທະ ນະ​ທໍາ-ສັງຄົມອາຊຽນ ຢູ່ຕີມໍແລັດສະເຕ ໃນເດືອນກໍລະກົດ 2022 ຜ່ານມາ, ຊຶ່ງມາຮອດປັດຈຸບັນໜ່ວຍງານສັງ ລວມຂໍ້ມູນ​ທັງສາມເສົາຄໍ້າປະຊາຄົມອາຊຽນ ແມ່ນໄດ້ສໍາເລັດການ​ໄປ​ຢ້ຽ​ມຢາມ ​ແລະ ​ເຮັດ​ວຽກ ຢູ່ຕີມໍແລັດສະເຕ ແລ້ວ; ໄດ້ຮັບຊາບຄວາມຄືບໜ້າການເຂົ້າຮ່ວມບັນດາກິດຈະກໍາທີ່ບໍ່ແມ່ນການປືກສາຫາລືດ້ານນະໂຍບາຍ ເພື່ອສົ່ງ ເສີມການເຂົ້າຮ່ວມບັນດາກິດຈະກຳ ແນໃສ່ສົ່ງເສີມຂີດຄວາມສາມາດໃຫ້ແກ່ ຕີມໍແລັດສະເຕ ພາຍໃຕ້ 3 ເສົາຄໍ້າປະ ຊາຄົມອາຊຽນ. ພ້ອມກັນນັ້ນ, ກອງປະຊຸມ ຍັງໄດ້ປຶກສາຫາລືກ່ຽວກັບບົດລາຍງານຄວາມຄືບໜ້າການເຮັດວຽກຂອງໜ່ວຍງານວິຊາການຂອງສະພາປະສານງານອາຊຽນ ເພື່ອສະເໜີຕໍ່ກອງປະຊຸມສະພາປະສານງານອາຊຽນ ຄັ້ງທີ 31  ຮັບຊາບ ແລະ ໃຫ້ທິດຊີ້ນໍາ.

     ກອງປະຊຸມໜ່ວຍງານວິຊາການຂອງສະພາປະສານງານອາຊຽນ ວ່າດ້ວຍການຊ່ວຍເຫຼືອສຸກເສີນດ້ານສາທາລະນະສຸກ ໄດ້ຕີລາຄາສູງຕໍ່ຜົນການຈັດຕັ້ງປະຕິບັດບັນດາໜ້າວຽກໃນການແກ້ໄຂ ແລະ ຮັບມືກັບການແຜ່ລະບາດພະຍາດໂຄວິດ-19 ກໍຄືການຟື້ນຟູຈາກຜົນກະທົບຂອງການແຜ່ລະບາດພະຍາດໂຄວິດ-19 ຂອງອາຊຽນ.  ກອງປະຊຸມ ໄດ້ຮັບຊາບຄວາມຄືບໜ້າການຈັດຕັ້ງປະຕິບັດແຜນຟື້ນຟູຮອບດ້ານຂອງອາຊຽນ ໂດຍຊຸກຍູ້ໃຫ້ບັນດາຂະແໜງການກ່ຽວຂ້ອງເພີ່ມທະວີການຈັດຕັ້ງປະຕິບັດແຜນຟື້ນຟູ ແລະ ໄດ້ຮັບຊາບຄວາມຄືບໜ້າກ່ຽວກັບການຈັດຊື້ ແລະ ນໍາສົ່ງວັກຊີນຕ້ານພະຍາດ ໂຄວິດ-19 ໃຫ້ບັນດາປະເທດອາຊຽນ ຜ່ານອົງການ UNICEF ໂດຍການນໍາໃຊ້ງົບປະມານຈາກກອງທຶນອາຊຽນ ເພື່ອຮັບມືກັບພະຍາດໂຄວິດ-19 ລວມທັງໄດ້ປຶກສາຫາລື ແລະ ແລກປ່ຽນຄໍາຄິດຄໍາເຫັນ ເພື່ອກໍານົດທິດທາງໃນຕໍ່ໜ້າໃນການນໍາໃຊ້ງົບປະມານຈາກກອງທຶນດັ່ງກ່າວໃຫ້ໄດ້ຮັບປະສິດທິຜົນສູງສຸດ. ໂອກາດດັ່ງກ່າວ, ກອງປະຊຸມ ໄດ້ສະແດງຄວາມຊົມເຊີຍຂະແໜງສາທາລະນະສຸກອາຊຽນ ທີ່ສາມາດຕົກລົງເຫັນດີກັນແບ່ງສູນອາຊຽນ ເພື່ອຮັບມືກັບພະຍາດສຸກເສີນດ້ານສາທາລະນະສຸກ ແລະ ພະຍາດລະບາດອອກເປັນ 3 ຫ້ອງການ ໂດຍຕັ້ງຢູ່ 3 ປະເທດ ຄື: ອິນໂດເນເຊຍ, ໄທ ແລະ ຫວຽດນາມ ແລະ ມີກອງເລຂາຢູ່ປະເທດໄທ, ພ້ອມນີ້ກໍຊຸກຍູ້ໃຫ້ເຈົ້າໜ້າທີ່ອາວຸໂສສາທາລະນະສຸກອາຊຽນ ເລັ່ງລັດການຮ່າງຂໍ້ຕົກລົງໃນການສ້າງຕັ້ງສູນດັ່ງກ່າວ ເພື່ອເປັນໝາກຜົນໜຶ່ງທີ່ສໍາຄັນຂອງກອງປະຊຸມສຸດຍອດອາຊຽນ-ຍີ່ປຸ່ນ ໃນກາງເດືອນພະຈິກ 2022 ນີ້. ນອກນີ້, ກອງປະຊຸມ ຍັງໄດ້ຮຽກຮ້ອງໃຫ້ປະເທດສະມາຊິກອາຊຽນສືບຕໍ່ປະກອບສ່ວນເຂົ້າໃນຄັງແຮອຸປະກອນການແພດພາກພື້ນອາຊຽນ ເພື່ອຮັບມືກັບພາວະສຸກເສີນດ້ານສາທາລະນະສຸກ, ເຊິ່ງຄັງແຮດັ່ງກ່າວມີຄວາມສໍາຄັນໃນການຊ່ວຍເຫຼືອດ້ານຢາປົວພະຍາດ ແລະ ອຸປະກອນການແພດ ໃຫ້ບັນດາປະເທດສະມາຊິກອາຊຽນທີ່ໄດ້ຮັບຜົນກະທົບຈາກພາວະສຸກເສີນດ້ານສາທາລະນະສຸກໃນອະນາຄົດ. ຜົນຂອງການປຶກສາຫາລືຄັ້ງນີ້ ຈະນໍາລາຍງານຕໍ່ກອງ​ປະ​ຊຸມສະພາປະສານງານອາຊຽນ ຄັ້ງທີ 31, ເຊິ່ງຈະຈັດຂຶ້ນ ໃນກາງເດືອນພະຈິກ 2022.

      ກອງ​ປະຊຸມເຈົ້າໜ້າທີ່ອາວຸໂສອາຊຽນບວກສາມ ເພື່ອກະກຽມໃຫ້ແກ່ກອງປະຊຸມສຸດຍອດອາຊຽນບວກສາມ (ຈີນ, ສ.ເກົາຫຼີ, ຍີ່ປຸ່ນ) ໄດ້ທົບທວນຄືນການຈັດຕັ້ງປະຕິບັດແຜນປະຕິບັດງານການຮ່ວມມືອາຊຽນບວກສາມ ໄລຍະປີ 2018-2022 ພ້ອມທັງໄດ້ຮັບຊາບຄວາມຄືບໜ້າຂອງການຈັດຕັ້ງປະຕິບັດແຜນປະຕິບັດງານການຮ່ວມມືອາຊຽນບວກສາມ ສະບັບໃໝ່ສໍາລັບໄລຍະປີ 2023-2027. ກອງ​ປະ​ຊຸມ​ເຈົ້າ​ໜ້າ​ທີ່ອາ​ວຸ​ໂສຂອງກອງປະຊຸມສຸດຍອດອາຊີຕາເວັນອອກ ເພື່ອກະກຽມໃຫ້ແກ່ກອງປະຊຸມສຸດຍອດອາຊີຕາເວັນອອກ (ອົດສະຕຣາລີ, ຈີນ, ຍີ່ປຸ່ນ, ອິນເດຍ, ນິວຊີແລນ, ສ.ເກົາຫຼີ, ຣັດເຊຍ ແລະ ສະຫະລັດອາເມຣິກາ) ໄດ້ຮັບຊາບຄວາມ​ຄືບໜ້າ​ຂອງການຮ່າງແຜນ​​ປະຕິບັດງານການຮ່ວມມື ສໍາລັບໄລຍະປີ 2023-2027. ອັນສໍາຄັນ, ທັງສອງກອງປະຊຸມດັ່ງກ່າວ ແມ່ນໄດ້ປຶກສາຫາລືກ່ຽວກັບການກະກຽມທາງດ້ານເນື້ອໃນ, ພະລາທິການ ແລະ ພິທີການໃຫ້ແກ່ກອງປະຊຸມສຸດຍອດອາຊຽນບວກສາມ ຄັ້ງທີ 25 ທີ່ຈະຈັດຂຶ້ນໃນວັນທີ 12 ພະຈິກ 2022 ແລະ ກອງປະຊຸມສຸດຍອດອາຊີຕາເວັນອອກ ຄັ້ງທີ 17 ​ທີ່ຈະ​ຈັດ​ຂຶ້ນໃນ​ວັນທີ 13 ພະຈິກ 2022 ທີ່ ພະນົມເປັນ, ກໍາປູເຈຍ.

-----------------------------------