ໃນວັນທີ 30-31 ມັງກອນ 2023, ທ່ານ ໂພໄຊ ໄຂຄຳພິທູນ, ຮອງລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ນໍາພາຄະນະຜູ້ແທນ ຈາກກະຊວງການຕ່າງປະເທດ, ກະຊວງໂຍທາທິການ ແລະ ຂົນສົ່ງ, ກະຊວງສາທາລະນະສຸກ, ກະຊວງປ້ອງກັນຄວາມສະຫງົບ, ກະຊວງການເງິນ ແລະ ກົມກ່ຽວຂ້ອງຂອງກະຊວງການຕ່າງປະເທດ ຕິດຕາມ ແລະ ກວດກາຄວາມພ້ອມໃນການຈັດຕັ້ງປະຕິບັດ ກວດກາ “ປະຕູດຽວ, ຄັ້ງດຽວ” ຫຼື ຈຸດກວດກາຮ່ວມ ທີ່ ດ່ານສາກົນແດນສະຫວັນລາວ-ບາວ (ທີ່ໄດ້ຢຸດຕິໃນປີ 2021 ຍ້ອນການແຜ່ລະບາດຂອງພະຍາດໂຄວິດ-19) ແລະ ດ່ານສາກົນຂົວມິດຕະພາບລາວ-ໄທ ແຫ່ງທີ 2, ສະຫວັນນະເຂດ-ມຸກດາຫານ. ການປະຕິບັດ ການກວດກາຮ່ວມດັ່ງກ່າວ ແມ່ນເປັນການຈັດຕັ້ງປະຕິບັດຍຸດທະສາດ ແລະ ແຜນປະຕິບັດງານສໍາລັບປະເທດອະນຸພາກພື້ນລຸ່ມແມ່ນໍ້າຂອງ  ແລວເສດຖະກິດຕາເວັນອອກ-ຕາເວັນຕົກ (East-West Economic Corridor) ແລະ ສັນຍາການສົ່ງຂ້າມແດນຂອງບັນດາປະເທດລຸ່ມແມ່ນໍ້າຂອງ (GMS-CBTA). ການກວດດັ່ງກ່າວ ແມ່ນການເຮັດວຽກຮ່ວມກັນຂອງເຈົ້າໜ້າທີ່ຂອງສອງປະເທດ ໃນການກວດກາສິນຄ້າ ແລະ ບຸກຄົນຂ້າມແດນ ຢູ່ດ່ານຊາຍແດນເບື້ອງໃດເບື້ອງໜຶ່ງ ໂດຍຈະບໍ່ມີການກວດກາຊໍ້າຊ້ອນກັນຢູ່ດ່ານອີກປະເທດໜຶ່ງ, ຊຶ່ງການກວດກາດັ່ງກ່າວ ຈະເປັນການຫຼຸດຜ່ອນໄລຍະເວລາໃນການແຈ້ງເອກະສານເຂົ້າ-ອອກ ແລະ ການກວດກາສິນຄ້າ ເພື່ອອໍານວຍຄວາມສະດວກໃນການໄປມາຂອງປະຊາຊົນ, ຊຸກຍູ້ດ້ານການທ່ອງທ່ຽວ, ການຄ້າ, ການລົງທຶນ ແລະ ການຂົນສົ່ງສິນຄ້າຂ້າມແດນ.

ໃນໂອກາດດັ່ງກ່າວ ທ່ານ ໂພໄຊ ໄຂຄໍາພິທູນ ຍັງໄດ້ຢ້ຽມຢາມສູນພັດທະນາ ແລະ ບໍລິການກະສິກໍາ-ປ່າໄມ້ ແຂວງສະຫວັນນະເຂດ (ໜອງເຕົ່າ) ທີ່ ບ້ານໂພນສີມ, ນະຄອນໄກສອນພົມວິຫານ ເພື່ອຕິດຕາມການຈັດຕັ້ງປະຕິບັດຜ່ານມາຂອງໂຄງການທີ່ໄດ້ມີການລິເລີ່ມຈັດຕັ້ງປະຕິບັດນັບແຕ່ປີ 2014 ເປັນຕົ້ນມາ, ຊຶ່ງເປັນໂຄງການຮ່ວມມື ລາວ-ໄທ, ພ້ອມກັນນີ້, ກໍຍັງໄດ້ສືບຕໍ່ພົບປະ ແລະ ເຮັດວຽກຮ່ວມກັບ ແຂວງສາລະວັນ, ຊຶ່ງໄດ້ຮັບຟັງການລາຍງານໂດຍຫຍໍ້ ໂດຍ ທ່ານ ພູທົງ ຄຳມະນີວົງ, ຮອງເຈົ້າແຂວງໆ ສາລະວັນ, ກ່ຽວກັບ ສະພາບການຈັດຕັ້ງປະຕິບັດ ແລະ ການປັບປຸງພັດທະນາຂອງແຂວງ, ພ້ອມທັງໄດ້ປຶກສາຫາລື ແລະ ສໍາຫຼວດພື້ນທີ່ຕົວຈິງ ຂອງໂຄງການກໍ່ສ້າງຂົວມິດຕະພາບລາວ-ໄທ ແຫ່ງ ທີ 6 ແລະ ຄວາມພ້ອມໃນການຍົກລະດັບດ່ານທ້ອງຖິ່ນ ປາກຕະພານ, ເມືອງລະຄອນເພັງ, ແຂວງສາລະວັນ ເຊິ່ງກັບດ່ານຖາວອນ ປາກແຊງ, ອໍາເພີນາຕານ, ຈັງຫວັດອຸບົນຣາຊະທານີ ຂອງໄທ ຂຶ້ນເປັນດ່ານສາກົນ, ຊຶ່ງການຍົກລະດັບດ່ານດັ່ງກ່າວ ຈະກາຍເປັນການຊຸກຍູ້ການພັດທະນາທາງດ້ານເສດຖະກິດຂອງແຂວງ ເປັນຕົ້ນແມ່ນການຄ້າ, ການລົງທຶນ ແລະ ການທ່ອງທ່ຽວ ໃນໄລຍະຕໍ່ໜ້າ.

ການເດີນທາງໄປເຄື່ອນໄຫວໃນຄັ້ງນີ້ ທ່ານຮອງລັດຖະມົນຕີ ໄດ້ໃຫ້ຄໍາຄິດເຫັນ ແລະ ແນະນໍາໃຫ້ພາກສ່ວນທີ່ກ່ຽວຂ້ອງເອົາໃຈໃສ່ສຸມໃສ່ການກະກຽມຄວາມພ້ອມດ້ານຕ່າງໆ ເຊັ່ນ: ການພັດທະນາພື້ນຖານໂຄງລ່າງ, ບຸກຄະລາກອນ, ອຸປະກອນການຮັບໃຊ້ວຽກງານ, ນິຕິກໍາຕ່າງໆທີ່ກ່ຽວຂ້ອງ ແລະ ອື່ນໆ ເພື່ອສ້າງຄວາມສະດວກໃນການຈັດຕັ້ງປະຕິບັດ ແລະ ຕອບສະໜອງໃຫ້ແກ່ການພັດທະນາເສດຖະກິດ-ສັງຄົມ ກໍຄືນໍາເອົາຜົນປະໂຫຍດຕົວຈິງມາສູ່ປະຊາຊົນ.