ໃນຕອນເຊົ້າ ຂອງ​ວັນ​ທີ 24 ເມສາ 2023, ສະ​ຖາ​ບັນ​ການ​ຕ່າງປະ​ເທດ, ກົມຈັດຕັ້ງ ແລະ ພະນັກງານ, ກະຊວງການຕ່າງປະເທດ ຮ່ວມກັບ ສະຖາບັນການເມືອງ ແລະ ການປົກຄອງແຫ່ງຊາດ ​ໄດ້​ຈັດ​ພິທີ​ເປີດຊຸດຮຽນທິດ​ສະ​ດີການ​ເມືອງ ຂັ້ນຕົ້ນ, ໄລຍະ 03 ເດືອນ, ຊຸດທີ I ໃຫ້ແກ່ສະມາຊິກພັກ, ພະນັກງານຫຼັກແຫຼ່ງ ພາຍໃນກະຊວງການຕ່າງປະເທດ ແລະ ຄະນະພົວພັນຕ່າງປະເທດສູນກາງພັກຂຶ້ນ. ໃຫ້ກຽດເປັນປະທານຮ່ວມພິທີເປີດ​​ໃນຄັ້ງນີ້ ມີ ທ່ານ ຮສ ພູວົງ  ອຸ່ນຄໍາແສນ, ກໍາມະການສູນກາງພັກ, ເລຂາຄະນະພັກ, ຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ ແລະ ທ່ານ ຕິ່ງ ສຸກສັນ, ຮອງເລຂາຄະນະບໍລິຫານງານພັກ, ຮອງລັດຖະມົນຕີ ກະຊວງ​ການ​ຕ່າງປະ​ເທດ. ນອກຈາກນັ້ນ, ຍັງມີຜູ້ຕາງໜ້າຈາກບັນດາກົມພາຍໃນກະຊວງ​ການ​ຕ່າງປະ​ເທດ, ຄະນະ​ພົວພັນ​ການ​ຕ່າງປະ​ເທດ​ສູນ​ກາງ​ພັກ, ຄູອາຈານຈາກສະຖາບັນການເມືອງ ແລະ ການປົກຄອງແຫ່ງຊາດ, ຄະນະຮັບຜິດຊອບຊຸດຮຽນ ແລະ ບັນດາຜູ້​ເຂົ້າ​ຮ່ວມ​ຮຽນ ທັງໝົດປະມານ 80 ທ່ານ.

ທ່ານ ໄມ ໄຊຍະວົງສ໌, ຫົວໜ້າສະ​ຖາ​ບັນ​ການ​ຕ່າງປະ​ເທດ ໄດ້ຂຶ້ນລາຍງານ ກ່ຽວກັບ ແຜນການຮຽນ-ການສອນຊຸດຮຽນທິດສະດີການເມືອງ ຂັ້ນຕົ້ນ, ປະກອບມີ 07 ກຸ່ມວິຊາຮຽນ, ມີ 55 ບົດ, ເທົ່າກັບ 13 ໜ່ວຍກິດ ໃນນັ້ນ ມີວິຊາຮຽນຄື: ກຸ່ມວິຊາປັດຊະຍາມາກ-ເລນິນ 07 ບົດ, ວິຊາເສດຖະສາດການເມືອງມາກ-ເລນິນ 09 ບົດ, ວິຊາລັດທິສັງຄົມນິຍົມວິທະຍາສາດ 12 ບົດ, ແນວຄິດໄກສອນ ພົມວິຫານ 05 ບົດ, ກຸ່ມວິຊາພື້ນຖານການຄຸ້ມຄອງບໍລິຫານລັດ 07 ບົດ, ກຸ່ມວິຊາປະຫວັດສາດພັກ ແລະ ກໍ່ສ້າງພັກ 10 ບົດ, ກຸ່ມວິຊາຫົວຂໍ້ລາຍງານເພີ່ມ 05 ບົດ. ໃນທ້າຍຊຸດຮຽນ, ຜູ້ເຂົ້າຮ່ວມ ຍັງຈະໄດ້ຂຽນບົດເກັບກ່ຽວ ເພື່ອປະເມີນຄວາມເຂົ້າໃຈ ທີ່ມີຄວາມຍາວ 10-15 ໜ້າ ເພື່ອປ້ອງກັນຈົບຂັ້ນ. ຊຸດຮຽນນີ້ນອກຈາກການຮຽນທິດສະດີແລ້ວ, ຜູ້ເຂົ້າຮ່ວມ ຍັງຈະໄດ້ລົງຮາກຖານຂັ້ນເມືອງ ແລະ ບ້ານ ເພື່ອຮຽນຮູ້ຕົວຈິງການຊີ້ນຳ-ນຳພາຂັ້ນຮາກຖານໃນການຜັນຂະຫຍາຍແນວທາງນະໂຍບາຍຕ່າງໆ ຂອງພັກ ກໍຄືແຜນພັດທະນາເສດຖະ ກິດ-ສັງຄົມຂອງລັດ. ນອກນັ້ນ, ຍັງເປັນການເປີດໂອກາດໃຫ້ລົງໃກ້ຊິດຕິດແທດກັບປະຊາຊົນ ກໍຄືອໍານາດການປົກຄອງຂັ້ນບ້ານ ເພື່ອຮັບຟັງ ແລະ ເກັບກຳຂໍ້ມູນ, ຄຳຄິດຄຳເຫັນ ແລະ ບັນຫາຕ່າງໆທີ່ເກີດຂື້ນ ມາຄົ້ນຄວ້າຊອກຫາວິທີແກ້ໄຂ ເພື່ອເຮັດໃຫ້ຮາກຖານມີຄວາມເຂັ້ມແຂງ, ໝັກແໜ້ນ ແລະ ໄດ້ການຮັບການພັດທະນາຕາມແນວທາງຂອງພັກ-ລັດ.  ອີກຄາດໝາຍໜຶ່ງຂອງຊຸດຮຽນນີ້ ແມ່ນການຍົກລະດັບຄວາມເຂົ້າໃຈທີ່ເປັນເອກະພາບທາງດ້ານແນວຄິດ-ທິດສະດີໃຫ້ແກ່ພະນັກງານ, ສະມາຊິກພັກ ມີຄວາມເຊື່ອໝັ້ນ, ຫຼັກແໜ້ນທາງດ້ານທິດສະດີ, ອຸດົມການຂອງພັກ ແລະ ມີຄຸນທາດການເມືອງ, ສິນທຳປະຕິວັດ ແລະ ຮູ້​ໝູນ​ໃຊ້ທິດສະດີຢ່າງປະດິດສ້າງ ​ເຂົ້າ​ໃນ​ໜ້າ​ທີ່​ວຽກ​ງານຂອງ​ຕົນ ​ສ້າງບາດກ້າວໃນການບຸກທະລຸທາງດ້ານຈິນຕະນາການອັນໃໝ່, ສ້າງແນວຄວາມຄິດໃຫ້ເປັນລະບົບ, ​ມີ​ຄວາມ​ເປັນ​ເອກະ​ພາບ​ຕໍ່​ແນວທາງ​ນະ​ໂຍບາຍຂອງ​ພັກ, ​ເສີມ​ຂະຫຍາຍ​ຄວາມ​ສາມັກຄີ​ທັງ​ພາຍ​ໃນ ​ແລະ ​ພາຍ​ນອກ, ​ເຮັດ​ວຽກ​ມີແບບ​ແຜນ, ມີ​ຫຼັກການ ​ແລະ ​ເບິ່ງບັນຫາແບບສັດຈະ​ວິພາກ, ພ້ອມ​ກັນ​ຈັດ​ຕັ້ງ​ປະຕິບັດ​ໜ້າ​ທີ່​ການ​ເມືອງຂອງ​ພັກ​ໃຫ້​ບັນລຸ​ຜົນ​ເປັນ​ຈິງ.

ໃນພິທີດັ່ງກ່າວ, ທ່ານ ຕິ່ງ ສຸກສັນ, ຮອງເລຂາຄະນະບໍລິຫານງານພັກ, ຮອງລັດຖະມົນຕີ ກະຊວງການຕ່າງປະ ເທດ ປະທານ​ພິທີ ໄດ້​​ໃຫ້​ຄຳ​ເຫັນໂອ້ລົມ ແລະ ກ່າວເປີດຊຸດຮຽນ ໂດຍ​ໄດ້​ຍົກ​ໃຫ້​ເຫັນ​ເຖິງ​ຄວາມ​ສຳ​ຄັນຂອງການຈັດຊຸດຮຽນນີ້ ເພື່ອຍົກສູງສະຕິຄວາມຮັບຜິດຊອບໃຫ້ໜັກແໜ້ນຕື່ມ, ບົນພື້ນຖານການຮຽນຮູ້ບັນດາຫຼັກມູນຂອງທິດສະດີມາກ-ເລນິນ, ແນວຄິດໄກສອນ ພົມວິຫານ ແລະ ແນວທາງນະໂຍບາຍຂອງພັກ ຢ່າງເປັນລະບົບ ເປັນວິທີໜຶ່ງໃນການສ້າງພູມຄຸ້ມກັນໃຫ້ແກ່ສະມາຊິກພັກ-ພະນັກງານ ໃຫ້ມີຄວາມອຸ່ນອ່ຽນ ທຸ່ນທ່ຽງ, ເຊື່ອໝັ້ນຕໍ່ແນວທາງນະໂຍບາຍຂອງພັກ ກໍຄືອຸດົມການສັງຄົມນິຍົມຢ່າງສະເໜີຕົ້ນສະເໜີປາຍ.  ການເຮັດແນວນີ້ ຈຶ່ງສາມາດສະກັດກັ້ນ, ຕີຖອຍປະກົດການຫຍໍ້ທໍ້ຕ່າງໆທີ່ຈະເກີດຂຶ້ນພາຍໃນຖັນແຖວສະມາຊິກພັກໄດ້. ນອກນັ້ນ, ທ່ານ ຍັງໄດ້ເນັ້ນໜັກໃຫ້ຜູ້ເຂົ້າຮ່ວມຊຸດຮຽນ ຈົ່ງເພີ່ມທະວີຄວາມເອົາໃຈໃສ່ໃນການຄົ້ນຄວ້າຮໍ່າຮຽນທັງທິດສະດີ ໂດຍສົມທຽບໃສ່ພຶດຕິກຳຕົວຈິງ, ຮຽນແລ້ວ ຕ້ອງຮູ້ໜູນໃຊ້ຢ່າງປະດິດສ້າງ, ມີວິທະຍາສາດ ເຂົ້າໃສ່ວຽກງານຕົວຈິງ.   ໃນໂອກາດນີ້, ທ່ານປະທານພິທີ ຍັງ​ໄດ້ສະ​ແດງ​ຄວາມ​ຊົມ​ເຊີຍ ​ຕໍ່​ຄະນະ​ຮັບຜິດຊອບ​ຊຸດ​ຮຽນ ກໍ​ຄື ​ສະ​ຖາ​ບັນ​ການ​ຕ່າງປະ​ເທດ, ກົມຈັດຕັ້ງ ແລະ ພະນັກງານ ພ້ອມ​ດ້ວຍ​ຄູ​ອາຈານທີ່ມາຈາກ ສະຖາບັນການເມືອງ ແລະ ການປົກຄອງແຫ່ງຊາດ ທີ່ໄດ້ເອົາໃຈໃສ່ໃນການກະກຽມຈັດຊຸດຮຽນນີ້ ຈົນສາມາດຈັດຕັ້ງຂື້ນໄດ້ຢ່າງເປັນຮູບປະທຳ.