ທ່ານ ໂພໄຊ ໄຂຄຳພິທູນ, ຮອງລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ເຂົ້າຮ່ວມພິທີສະເຫຼີມສະຫຼອງວັນສ້າງຕັ້ງອົງການສະຫະປະຊາຊາດ ຄົບຮອບ 78 ປີ, ໃນວັນທີ 24 ຕຸລາ 2023, ທີ່ UN House, ອົງການສະຫະປະຊາຊາດ ປະຈຳ ສປປ ລາວ.
ໃນພິທີ ທ່ານ ບາໂຄເດັຍ ເບີຄະນ໋ອຟ, ຜູ້ປະສານງານອົງການສະຫະປະຊາຊາດ ປະຈຳ ສປປ ລາວ ໄດ້ຂຶ້ນກ່າວຄຳເຫັນບາງຕອນ ວ່າ:
ໃນທົ່ວໂລກ, ພຽງແຕ່ຂອງເປົ້າໝາຍ SDG ເທົ່ານັ້ນ ທີ່ໄດ້ບັນລຸຕາມເປົ້າໝາຍ ແລະ ຫຼາຍໆເປົ້າໝາຍກຳລັງຈະປ່ຽນໄປໃນທາງກົງກັນຂ້າມ. ບາງເປົ້າໝາຍກໍ່ຊ້າເຫຼືອເກີນທີ່ຈະເຮັດໃຫ້ຊີວິດການເປັນຢູ່ຂອງປະຊາຊົນມີຄວາມແຕກຕ່າງ ເຊັ່ນ: ຄວາມໝັ້ນຄົງທາງດ້ານອາຫານ, ການຈັດ ການກັບສະພາບອາກາດ ແລະ ການປົກປ້ອງຄວາມຫຼາກຫຼາຍທາງຊີວະພາບແມ່ນນັບມື້ນັບຖອຍຫຼັງ. ພະຍາດລະບາດ, ການເພີ່ມຂຶ້ນຂອງຄ່າຄອງຊີບ, ຄວາມຂັດແຍ່ງ ແລະ ໄພພິບັດ ໄດ້ເຮັດໃຫ້ຄວາມຄືບໜ້າດ້ານການພັດທະນາ ຊ້າລົງຢ່າງຫຼວງຫຼາຍ.
ບົດລາຍງານ ການພັດທະນາແບບຍືືນຍົງສາກົນ ສະບັບປີ 2023 ໄດ້ລະບຸໄວ້ວ່າ ‘ໃຫ້ສຳເລັດທຸກເປົ້າໝາຍພາຍໃນໄລຍະເຈັດປີທີ່ເຫຼືອແມ່ນເປັນການຍາກ, ແຕ່ທຸກໆຄວາມຄືບໜ້າລ້ວນແຕ່ມີຄວາມສຳຄັນຫຼາຍ ແລະບັນຫານີ້ຕ້ອງບັນລຸໃນລະດັບສາກົນ - ບໍ່ປະຖິ້ມປະເທດໃດ, ສັງຄົມໃດ ຫຼື ບຸກຄົນໃດ ໄວ້ຂ້າງຫຼັງ.’
ໃນ ສປປ ລາວ, ຂໍ້ຫຍຸ້ງຍາກບໍ່ໄດ້ເຮັດໃຫ້ເຮົາຫວາດຫວັ່ນ ເຊັ່ນດຽວກັນກັບທີ່ອື່ນໆໃນໂລກໃບນີ້, ຂໍ້ຫຍຸ້ງຍາກສ້າງໂອກາດໃໝ່ໆ ແລະ ໂອກາດນັ້ນກໍ່ເສີິມສ້າງຈຸດຍືນ, ຄວາມຕັ້ງໝັ້ນທີ່ພວກເຮົາໃຊ້ຮ່ວມກັນ. ທຸກໆທ່ານທີ່ຢູ່ໃນຫ້ອງນີ້, ໄດ້ແບ່ງປັນຄວາມຕັັ້ງໝັ້ນຕໍ່ປະເທດລາວ, ລວມທັງຄວາມສະເໝີພາບ ແລະ ການພັດທະນາແບບຍືນຍົງ ດ້ວຍການປະສານງານຮ່ວມກັນຢ່າງມີປະສິດທິພາບຫຼາຍກວ່າທີ່ໄດ້ເຮັດຜ່ານມາ ພວກເຮົາຈະສາມາດນຳໃຊ້ໂອກາດທີ່ຢູ່ຕໍ່ໜ້າຂອງພວກເຮົາໃຫ້ເກີດຜົນປະໂຫຍດສູງສຸດ.
ດ້ວຍຄວາມຕັ້ງໝັ້ນຂອງພວກເຮົາທີ່ຈະບໍ່ປະຖິ້ມໃຜໄວ້ຂ້າງຫຼັງ, ໃນຄໍ່າຄືນນີ້, ພວກເຮົາຂໍນຳສະເໜີ ສິ່ງທ້າທາຍຂອງບຸກຄົນພິການ.
ເຊິ່ງກວມເອົາເຖິງ 16% ຂອງປະຊາກອນໃນໂລກນີ້, ຫຼາຍຄັ້ງກໍ່ແມ່ນຜູ້ທີ່ທຸກຍາກໃນຊຸມຊົນ, ນີ້ແມ່ນກຸ່ມຄົນທີ່ສຳຄັນທີ່ພວກເຮົາຕ້ອງປະສານງານຮ່ວມກັນ ເພື່ອໃຫ້ໄດ້ມາເຊິ່ງຜົນສຳເລັດທີ່ພວກເຮົາຕັ້ງໄວ້.
ໃນບໍລິບົດສະເພາະຂອງ ສປປ ລາວ, ບ່ອນທີ່ຜົນຈາກລະເບີດໃນສົງຄາມຍັງສົ່ງຜົນຕໍ່ເນື່ອງຕໍ່ຊີວິດຂອງປະຊາຊົນ, ພວກເຮົາມີເປົ້າໝາຍການພັດທະນາແບບຍືນຍົງທີ 18, ຊີວິດທີ່ປອດໄພຈາກ ລະເບີິດທີ່ຍັງບໍ່ທັນແຕກ, ສິ່ງນີ້ແມ່ນມີຄວາມສຳຄັນຫຼາຍ.
ໃນຈິດວິນຍານແຫ່ງການສະເຫຼີມສະຫຼອງວັນສ້າງຕັ້ງອົງການສະຫະປະຊາຊາດ ແລະ ການຮຽກຮ້ອງຈາກເລຂາທິການໃຫຍ່ ສະຫະປະຊາຊາດ ທີ່ຕ້ອງການໃຫ້ພວກເຮົາເປັນຊາດທີ່ສາມັກຄີກັນຢ່າງແທ້ຈິງ ຂ້າພະເຈົ້າຫວັງວ່າ ພວກເຮົາສາມາດສືບຕໍ່ ແລະ ຜັນຂະຫຍາຍຄວາມຕັ້ງໃຈຂອງພວກເຮົາໃຫ້ກັບວິໃສທັດ ແລະ ອະນາຄົດທີ່ສົດໃສ.
ໃນຕອນຄ່ຳຂອງວັນດຽວກັນ, ກໍ່ໄດ້ມີພິທີເປີດໄຟໃສ່ປະຕູໄຊ ໃນໂອກາດສະເຫຼີມສະຫຼອງວັນສ້າງຕັ້ງອົງການສະຫະປະຊາຊາດ ຄົບຮອບ 78 ປີ, ທີ່ ນະຄອນຫຼວງວຽງຈັນ