ໃນວັນທີ 2 ພະຈິກ 2023, ທ່ານ ໂພໄຊ ໄຂຄໍາພິທູນ, ຮອງລັດຖະມົນຕີກະຊວງການຕ່າງປະເທດ, ຫົວໜ້າຄະນະຜູ້ແທນຊາຍແດນ ລາວ-ຫວຽດນາມ ແລະ ທ່ານ ກົງຈີ ຢ່າງຈື່, ຮອງລັດຖະມົນຕີກະຊວງຍຸຕິທໍາ ພ້ອມດ້ວຍຜູ້ຕາງໜ້າຂອງຂະແໜງການທີ່ກ່ຽວຂ້ອງຂອງສູນກາງ ແລະ ແຂວງບໍລິຄໍາໄຊ ໄດ້ລົງເຄື່ອນໄຫວເຮັດວຽກ ຢູ່ ເມືອງວຽງທອງ, ແຂວງບໍລິຄໍາໄຊ, ຊຶ່ງໄດ້ຮັບການຕ້ອນຮັບໂດຍ ທ່ານ ຄໍາແຫວນ ປັນຍານຸວົງ, ຮອງເຈົ້າແຂວງແຂວງບໍລິຄໍາໄຊ ດ້ວຍບັນຍາກາດໄມຕີຈິດມິດຕະພາບອັນອົບອຸ່ນ.

ໃນໂອກາດມາເຄື່ອນໄຫວເຮັດວຽກຄັ້ງນີ້, ທ່ານ ໂພໄຊ ໄຂຄໍາພິທູນ ໄດ້ເຜີຍແຜ່ກ່ຽວກັບວຽກງານຊາຍແດນ ໂດຍສະເພາະກົດໝາຍວ່າດ້ວຍຊາຍແດນແຫ່ງຊາດ ແລະ ລະບຽບການຄຸ້ມຄອງຊາຍແດນ ລະຫວ່າງ ສປປ ລາວ ແລະ ສສ ຫວຽດນາມ ໃຫ້ຄະນະພັກ-ຄະນະນໍາ, ພະນັກງານຫຼັກແຫຼ່ງ, ທະຫານ, ຕໍາຫຼວດ ແລະ ພໍ່ແມ່ປະຊາຊົນບັນດາເຜົ່າ ທີ່ຢູ່ເມືອງວຽງທອງໃຫ້ໄດ້ຮັບຮູ້ ແລະ ເຂົ້າໃຈເຖິງວຽກງານຊາຍແດນ ເນັ້ນໃຫ້ພົນລະເມືອງລາວ ກໍຄືປະຊາຊົນທີ່ຢູ່ຕາມບໍລິເວນຊາຍແດນ ຕ້ອງໄດ້ເອົາໃຈໃສ່ໃນການຄົ້ນຄວ້າສຶກສາປະຕິບັດບັນດາຂໍ້ກໍານົດ, ກົດໝາຍ ແລະ ນິຕິກໍາຕ່າງໆຂອງ ສປປ ລາວ ໂດຍສະເພາະໃຫ້ເຂົ້າໃຈແຈ້ງກ່ຽວກັບກົດໝາຍວ່າດ້ວຍຊາຍແດນແຫ່ງຊາດ ທີ່ໄດ້ກໍານົດສິດ, ໜ້າທີ່ຂອງຂະແໜງການທີ່ກ່ຽວຂ້ອງ ແລະ ລະບຽບການຄຸ້ມຄອງຊາຍແດນ ລະຫວ່າງ ສປປ ລາວ ແລະ ສສ ຫວຽດນາມ ໃຫ້ພົນລະເມືອງລາວຮັບຮູ້ເຖິງສິດ, ໜ້າທີ່, ພັນທະ ແລະ ຂໍ້ຫ້າມຕ່າງໆ ທີ່ໄດ້ກໍານົດໄວ້ໃນກົດໝາຍ ເພື່ອເຮັດໃຫ້ຊາຍແດນເປັນຊາຍແດນສັນຕິພາບ, ມິດຕະພາບ ແລະ ການຮ່ວມມື.

ໃນກອງປະຊຸມທ່ານຮອງເຈົ້າແຂວງບໍລິຄໍາໄຊ ກໍໄດ້ມີຄໍາເຫັນຕື່ມເນັ້ນໃຫ້ປະຊາຊົນຢູ່ບໍລິເວນຊາຍແດນເອົາໃຈໃສ່ປະຕິບັດລະບຽບກົດໝາຍ, ປົກປັກຮັກສາຊາຍແດນ ກໍຄືກົດໝາຍຊາຍແດນ, ສະກັດກັ້ນປະກົດການຫຍໍ້ທໍ້, ຫ້າມເຮັດສິ່ງທີ່ຜິດກົດໝາຍ, ໃຫ້ທໍາການຜະລິດຫຼາຍຂຶ້ນກ່ອນເກົ່າ ເພື່ອໃຫ້ຊີວິດການເປັນຢູ່ດີຂຶ້ນເທື່ອລະກ້າວ.

********************************