ກອງປະຊຸມອະນຸກຳມະການເຕັກນິກຊາຍແດນຮ່ວມ ລາວ-ກໍາປູເຈຍ ແລະ ກໍາປູເຈຍ-ລາວ ຄັ້ງທີ 8 ໄດ້ຈັດຂຶ້ນ ໃນລະຫວ່າງວັນທີ 14-15 ທັນວາ 2023 ທີ່ແຂວງສີຫານຸວິນ,  ຣາຊະອານາຈັກກໍາປູເຈຍ, ຄະນະຜູ້ແທນຝ່າຍລາວ ນໍາໂດຍທ່ານ ໂພໄຊ ໄຂຄຳພິທູນ, ຮອງລັດຖະມົນຕີກະຊວງການຕ່າງປະເທດ ແລະ ຄະນະຜູ້ແທນຝ່າຍກໍາປູເຈຍ ນໍາໂດຍ ທ່ານ ໄອ ວຸທິ, ຮອງກອງເລຂາທິການແຫ່ງຊາດຮັບຜິດຊອບວຽກງານຊາຍແດນ, ຮອງລັດຖະມົນຕີ, ພ້ອມດ້ວຍຜູ້ຕາງໜ້າຈາກຂະແໜງການທີ່ກ່ຽວ ຂ້ອງຂອງສອງຝ່າຍເຂົ້າຮ່ວມ.

ຈຸດປະສົງກອງປະຊຸມແມ່ນເພື່ອສະຫຼຸບສັງເກດຕີລາຄາ ກ່ຽວກັບ ການຈັດຕັ້ງປະຕິບັດວຽກງານພາກສະໜາມຂອງຄະນະວິຊາການເຕັກນິກຊາຍແດນຮ່ວມສອງຝ່າຍທີ່ໄດ້ລົງໄປເຮັດວຽກງານກຳນົດຈຸດຈະປັກຫຼັກໝາຍຊາຍແດນແບບໃໝ່ ເພື່ອປ່ຽນແທນຫຼັກໝາຍຊາຍແດນເກົ່າຢູ່ພື້ນທີ່ຕົວຈິງ. ໂດຍສອງຝ່າຍໄດ້ຕີລາຄາສູງຕໍ່ຜົນການຈັດຕັ້ງປະຕິບັດວຽກງານພາກສະໜາມຂອງຄະນະວິຊາການເຕັກນິກຊາຍແດນຮ່ວມຂອງສອງຝ່າຍ ທີ່ໄດ້ດຳເນີນວຽກງານເລີ່ມແຕ່ເດືອນພຶດສະພາ 2023 ມາເຖິງເດືອນພະຈິກ 2023, ສອງຝ່າຍສາມາດກຳນົດຈຸດຈະປັກຫຼັກໝາຍຊາຍແດນໄດ້ຈຳນວນ 64 ຈຸດ ມີລວງຍາວປະມານ 38 ກິໂລແມັດ ທັງໝົດນີ້ກໍ່ເພື່ອຕອບສະໜອງໃຫ້ແກ່ວຽກງານບູລະນະຫຼັກໝາຍຊາຍແດນປະເທດລາວ ແລະ ກຳປູເຈຍ, ກຳປູເຈຍ ແລະ ລາວ ຊຶ່ງການປັກຫຼັກໝາຍຊາຍແດນເພີ່ມເຕີມນີ້ກໍ່ເພື່ອເຮັດໃຫ້ເສັ້ນຊາຍແດນມີຄວາມຈະແຈ້ງ ແລະ ຊັດເຈນກວ່າເກົ່າ ແລະ ການປ່ຽນຖ່າຍຫຼັກໝາຍຊາຍແດນແບບໃໝ່ກໍ່ເພື່ອໃຫ້ຫຼັກໝາຍຊາຍແດນມີຄວາມແໜ້ນໜາຖາວອນກວ່າເກົ່າ.

ພ້ອມດຽວກັນນີ້, ສອງຝ່າຍຍັງໄດ້ປຶກສາຫາລື ແລະ ເອກະພາບກັນວາງແຜນການປະຕິບັດວຽກງານຮ່ວມກັນຢູ່ພື້ນທີ່ຕົວຈິງໃນປີ 2024 ເພື່ອເປັນການຈັດຕັ້ງຜັນຂະຫຍາຍຜົນຂອງການຕົກລົງຂອງລັດຖະບານ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ລັດຖະບານ ແຫ່ງ ຣາຊະອານາຈັກກໍາປູເຈຍ, ກໍຄືການຈັດຕັ້ງປະຕິບັດເນື້ອໃນສົນທິສັນຍາ ວ່າດ້ວຍ ການກຳນົດຊາຍແດນປະເທດ, ສະບັບລົງນາມວັນທີ 13 ກຸມພາ 2023 ທີ່ນະຄອນຫຼວງວຽງຈັນ ແລະ ເນື້ອໃນບົດບັນທຶກກອງປະຊຸມຂອງຄະນະກຳມະການຊາຍແດນຮ່ວມ ລາວ-ກຳປູເຈຍ, ກຳປູເຈຍ-ລາວ, ສະບັບລົງວັນທີ 24 ເມສາ 2023, ທີ່ແຂວງສີຫານຸວິນ, ຣາຊະອານາຈັກກໍາປູເຈຍ ເພື່ອເປັນເງື່ອນໄຂ ແລະ ເປັນບ່ອນອີງໃຫ້ແກ່ຄະນະວິຊາການເຕັກນິກຊາຍແດນຮ່ວມສອງຝ່າຍ ນຳໄປສືບຕໍ່ຈັດຕັ້ງປະຕິບັດໃນການກຳນົດຈຸດ ແລະ ກໍ່ສ້າງປັກຫຼັກໝາຍຊາຍແດນແບບ  ໃໝ່ປ່ຽນແທນຫຼັກໝາຍເກົ່າ ແລະ ປັກຫຼັກໝາຍເພີ່ມເຕີມຢູ່ພື້ນທີ່ຕົວຈິງລວມທັງໝົດ 508 ຫຼັກໝາຍ ຕະຫຼອດເສັ້ນຊາຍແດນທີ່ໄດ້ເອກະພາບກັນ 86% ໃຫ້ສຳເລັດພາຍໃນກຳນົດ 2 ປີ ແນໃສ່ເຮັດໃຫ້ເສັ້ນຊາຍແດນ ລະຫວ່າງ ສອງປະເທດມີຄວາມຍືນຍົງ, ມີຄວາມຈະແຈ້ງ, ສະດວກໃນການຄຸ້ມຄອງຂອງເຈົ້າໜ້າທີ່ກ່ຽວຂ້ອງຂອງສອງປະເທດ ແລະ ທັງເປັນທີ່ເຂົ້າໃຈງ່າຍແກ່ປະຊາຊົນສອງຊາດທີ່ອາໄສຢູ່ຕາມບໍລິເວນຊາຍແດນ ລາວ-ກຳປູເຈຍ ແລະ ກຳປູເຈຍ-ລາວ.