ສະຖາບັນການຕ່າງປະເທດ, ກະຊວງການຕ່າງປະເທດ ຮ່ວມກັບ ສະຖານເອກອັກຄະລັດຖະທູດ ອິນເດຍ ປະຈໍາ ສປປ ລາວ ໄດ້ເປັນເຈົ້າພາບໃນການຈັດປາຖະກະຖາພາຍໃຕ້ຫົວຂໍ້: “ການຮ່ວມມືກັບອິນເດຍ ໃນໄລຍະໃໝ່: ເປີດກວ້າງການຮ່ວມມືກັບ ສປປ ລາວ ແລະ ອາຊຽນ (Engaging with an Emergent New India: Expanding Collaboration with Lao PDR and ASEAN)”, ໃນວັນທີ 02 ກຸມພາ 2024, ທີ່ ສູນການຮ່ວມມືສາກົນ ແລະ ການຝຶກອົບຮົມ, ໂດຍໃຫ້ກຽດເຂົ້າຮ່ວມເປັນປະທານກ່າວເປີດຂອງ ທ່ານ ບຸນເຫຼືອ ພັນດານຸວົງ, ຮອງລັດຖະມົນຕີກະຊວງການຕ່າງປະເທດ ພ້ອມດ້ວຍຜູ້ເຂົ້າຮ່ວມ ຈາກຫຼາຍພາກສ່ວນຕ່າງໆເປັນຕົ້ນ: ກະຊວງການຕ່າງປະເທດ, ຄະນະພົວພັນຕ່າງປະເທດສູນກາງພັກ, ທູດອາວຸໂສບໍານານ, ກະຊວງອ້ອມຂ້າງທີ່ກ່ຽວຂ້ອງ, ອົງການທຽບເທົ່າ ແລະ ນັກສຶກສາຈາກມະຫາວິທະຍາໄລແຫ່ງຊາດ ຕະຫຼອດຮອດຜູ້ຕາງໜ້າຈາກ ສະຖານເອກອັກຄະລັດຖະທູດ ອິນເດຍ ປະຈໍາ ສປປ ລາວ ຫຼາຍກວ່າ 150 ທ່ານ.
ການຈັດປາຖະກະຖາຄັ້ງນີ້, ແມ່ນເປັນກິດຈະກໍາໜຶ່ງ ເພື່ອສະເຫຼີມສະຫຼອງວັນສ້າງຕັ້ງສາຍພົວພັນການທູດລາວ-ອິນເດຍ ຄົບຮອບ 68 ປີ (02 ກຸມພາ 1956 ເຖິງ 02 ກຸມພາ 2024) ແນ່ໃສ່ເພື່ອເປັນການສົ່ງເສີມການພົວພັນ ແລະ ການຮ່ວມມື ລະຫວ່າງ ສປປ ລາວ ແລະ ອິນເດຍ ໃນໄລຍະຜ່ານມາ ກໍຄືເສີມຂະຫຍາຍການຮ່ວມມືທີ່ເປັນທ່າແຮງຂອງສອງປະເທດໃນອານາຄົດ. ນອກຈາກນີ້, ກໍ່ເພື່ອເສີມຂະຫຍາຍການຮ່ວມມື ລະຫວ່າງ ອິນເດຍ ແລະ ອາຊຽນ ໃນໄລຍະທີ່ ສປປ ລາວ ເປັນປະທານອາຊຽນ ໃນປີ 2024 ອີກດ້ວຍ, ເຊິ່ງຜູ້ເຂົ້າຮ່ວມຈະໄດ້ຮັບຟັງ ແລະ ແລກປ່ຽນຄໍາຄິດຄໍາເຫັນຕໍ່ກັບຂົງເຂດວຽກງານຕ່າງໆ ພາຍໃຕ້ການຮ່ວມມື ລາວ-ອິນເດຍ ແລະ ອາຊຽນ-ອິນເດຍ ໃນໄລຍະຜ່ານ, ກາລະໂອກາດ, ສິ່ງທ້າທ້າຍ ແລະ ຂົງເຂດວຽກງານທີ່ເປັນທ່າແຮງສໍາລັບການຮ່ວມມື ລະຫວ່າງ ສອງປະເທດໃນອານາຄົດ.
ສປປ ລາວ ແລະ ອິນເດຍ ໄດ້ສ້າງສາຍພົວພັນການທູດຮ່ວມກັນ ໃນວັນທີ 02 ກຸມພາ 1956. ຕະຫຼອດໄລຍະ 68 ປີຜ່ານມາ, ການພົວພັນການທູດ ລະຫວ່າງ ສອງປະເທດ ໄດ້ຮັບການເສີມຂະຫຍາຍຢ່າງຕໍ່ເນື່ອງ ແລະ ເປັນຮູບປະທໍາ ເຊິ່ງມີລັກສະນະມູນເຊື້ອດ້ານປະຫວັດສາດ ເນື່ອງຈາກມີຄວາມຄ້າຍຄືກັນທາງດ້ານວັດທະນະທໍາ ແລະ ສາດສະໜາ, ສອງຝ່າຍໄດ້ໃຫ້ການສະໜັບສະໜູນເຊີ່ງກັນ ແລະ ກັນ, ມີການແລກປ່ຽນການຢ້ຽມຢາມກັນຢ່າງເປັນປົກກະຕິໃນລະດັບການນໍາຂັ້ນສູງ ຈົນເຖິງວິຊາການ, ມີການຮ່ວມມືກັນໃນຫຼາຍຂົງເຂດວຽກງານເຊັ່ນ: ການເມືອງ, ເສດຖະກິດ, ວັດທະນະທໍາ-ສັງຄົມ, ສາທາລະນະສຸກ, ສຶກສາ, ເຕັກໂນໂລຊີ, ການຄ້າ-ການລົງທຶນ ແລະ ອື່ນໆ. ນອກນີ້, ທັງສອງຝ່າຍ ກໍ່ໄດ້ລົງນາມຮ່ວມກັນໃນນິຕິກໍາຕ່າງໆຫຼາຍສະບັບ ເຊິ່ງໃນນັ້ນ ກໍ່ແມ່ນບົດບັນທຶກຄວາມເຂົ້າໃຈ ລະຫວ່າງ ສະຖາບັນການຕ່າງປະເທດ ຂອງ ສປປ ລາວ ແລະ ສະຖາບັນການຕ່າງປະເທດ ຂອງ ອິນເດຍ ເພື່ອເສີມຂະຫຍາຍການຮ່ວມມືສອງຝ່າຍ ໂດຍຜ່ານການຈັດຕັ້ງປະຕິບັດກິດຈະກໍາໃນຂົງເຂດຕ່າງໆ ທີ່ຕ່າງຝ່າຍຕ່າງໄດ້ຮັບຜົນປະໂຫຍດຮ່ວມກັນ.