ໃນຕອນເຊົ້າຂອງວັນທີ 22 ມີນາ 2024, ກະຊວງການຕ່າງປະເທດ ໂດຍສົມທົບກັບບັນດາກະຊວງ, ຂະແໜງ ການຕ່າງໆທີ່ກ່ຽວຂ້ອງ ໄດ້ຈັດພິທີທາງການ ເພື່ອສະເຫຼີມສະຫຼອງວັນຟຣັງໂກໂຟນີສາກົນ 20 ມີນາ ປະຈຳປີ 2024 ພາຍໃຕ້ຫົວຂໍ້ "ສ້າງ, ປະດິດສ້າງ, ດໍາເນີນງານ ເປັນພາສາຝຣັ່ງ" ຢູ່ຫ້ອງປະຊຸມໃຫ່ຍຂອງຄະນະເສດຖະເສດ ແລະ ບໍລິຫານ-ທຸລະກິດ, ມະຫາວິທະຍາໄລແຫ່ງຊາດ ທີ່ ນະຄອນຫຼວງວຽງຈັນ. ພິທີທາງການດັ່ງກ່າວ ໄດ້ດຳເນີນໄປໂດຍການເປັນປະທານຂອງ ທ່ານ ໂພໄຊ ໄຂຄໍາພິທູນ, ຮອງລັດຖະມົນຕີກະຊວງການຕ່າງປະເທດ, ແລະ ມີການເຂົ້າຮ່ວມຂອງທ່ານ ຮອງເຈົ້າຄອງນະຄອນຫຼວງວຽງຈັນ, ທ່ານ ຮອງລັດຖະມົນຕີກະຊວງສຶກສາທິການ ແລະ ກິລາ, ທ່ານ ຮອງອະທິການບໍດີ ມະຫາວິທະຍາໄລແຫ່ງຊາດ, ທ່ານ ເອກອັກຄະລັດຖະທູດຝຣັ່ງ ປະຈຳ ສປປ ລາວ, ທ່ານ ຜູ້ຕາງໜ້າຈາກຫ້ອງການພາກພື້ນອາຊີ-ປາຊີຟິກຂອງອົງການຟຣັງໂກໂຟນີສາກົນ, ບັນດາທູຕານຸທູດ ທີ່ໃຊ້ພາສາຝຣັ່ງ, ທ່ານ ຜູ້ຕາງໜ້າຫ້ອງການມະຫາວິທະຍາໄລຟຣັງໂກໂຟນີ (AUF), ບັນດາຄູ-ອາຈານ, ນັກຮຽນ ແລະ ນັກສຶກສາ ເຂົ້າຮ່ວມປະມານ 300 ຄົນ.
ໃນພິທີດັ່ງກ່າວ, ທ່ານ ຮອງລັດຖະມົນຕີ ກະຊວງການຕ່າງປະເທດ ໄດ້ກ່າວຄຳເຫັນ ໂດຍໄດ້ຍົກໃຫ້ເຫັນເຖິງຄວາມໝາຍ ແລະ ຄວາມສຳຄັນຂອງວັນຟຮັງໂກໂຟນີສາກົນ ກໍ່ຄື ເນື້ອໃນຫົວຂໍ້ສຳຄັນ ສຳລັບການສະເຫຼີມສະຫຼອງວັນດັ່ງກ່າວ. ພ້ອມດຽວກັນ, ກໍໄດ້ລາຍງານໃຫ້ຊາບກ່ຽວກັບການພົວພັນຮ່ວມມືກັບອົງການຟຣັງໂກໂຟນີສາກົນ ຫຼື ອົງການ OIF ແລະ ການເຄື່ອນໄຫວວຽກງານໂດຍສັງເຂບ ຂອງ ສປປ ລາວ ໃນຂອບວຽກຟຣັງໂກໂຟນີ, ໂດຍສະເພາະໃນການສົ່ງເສີມພາສາຝຣັ່ງ ແລະ ຄຸນຄ່າຂອງຟຣັງໂກໂຟນີ, ພ້ອມທັງ ໄດ້ຕີລາຄາກ່ຽວກັບສະພາບການນໍາໃຊ້ພາສາຝຣັ່ງ ໃນພາກພື້ນ ແລະ ໃນທົ່ວໂລກ, ໄດ້ຊຸກຍູ້ການເສີມຂະຫຍາຍການຮ່ວມມື ເພື່ອສົ່ງເສີມການຮຽນ-ການສອນພາສາຝຣັ່ງ ຢູ່ໃນພາກພື້ນອາຊີ-ປາຊີຟິກ ກໍ່ຄືຢູ່ ສປປ ລາວ, ລວມທັງການສົ່ງເສີມການສ້າງວຽກເຮັດງານທຳໃຫ້ແກ່ຊາວໝຸ່ມຍິງ-ຊາຍ ກໍ່ຄືຜູ້ທີ່ເວົ້າພາສາຝຣັ່ງ. ນອກຈາກນີ້, ຍັງໄດ້ຕີລາຄາສູງຕໍ່ການພົວພັນຮ່ວມມື ລາວ - ຝຣັ່ງ ເນື່ອງໃນໂອກາດວັນສ້າງຕັ້ງສາຍພົວພັນການທູດ ຄົບຮອບ 70 ປີ ກໍ່ຄື ການພົວພັນຮ່ວມມື ຕະຫຼອດໄລຍະທີ່ຜ່ານມາ ໃນຫຼາຍຂົງເຂດວຽກງານ ໃນນັ້ນກໍ່ລວມມີການສົ່ງເສີມພາສາຝຣັ່ງ ຢູ່ ສປປ ລາວ.
ໃນໂອກາດດຽວກັນນີີ້, ທ່ານ ຮອງເຈົ້້າຄອງນະຄອນຫຼວງວຽງຈັນ, ທ່ານ ຮອງລັດຖະມົນຕີກະຊວງສຶກສາທິການ ແລະ ກິລາ, ທ່ານ ຮອງອະທິການບໍດີ ມະຫາວິທະຍາໄລແຫ່ງຊາດ, ທ່ານ ເອກອັກຄະລັດຖະທູດຝຣັ່ງ ປະຈຳ ສປປ ລາວ, ແລະ ທ່ານ ຜູ້ຕາງໜ້າຈາກຫ້ອງການພາກພື້ນອາຊີ - ປາຊີຟິກ ຂອງອົງການ OIF, ຕ່າງກໍ່ໄດ້ພັດປ່ຽນກັນປະກອບຄຳເຫັນ ໂດຍໄດ້ຍົກໃຫ້ເຫັນຄວາມສໍາຄັນໃນການສະເຫຼີມສະຫຼອງວັນສຳຄັນດັ່ງກ່າວ, ໄດ້ລາຍງານກ່ຽວກັບການເຄື່ອນໄຫວວຽກງານໃນຂອບເຂດຄວາມຮັບຜິດຊອບຂອງຕົນ ແລະ ການປະກອບສ່ວນຢ່າງຕັ້ງໜ້າ ເຂົ້າໃນການສົ່ງເສີມການພົວພັນ ແລະ ການຮ່ວມມືໃນຂອບວຽກງານຟຣັງໂກໂຟນີເວົ້າລວມ ແລະ ເວົ້າສະເພາະແມ່ນໃນຂອບການສົ່ງເສີມເສີມພາສາຝຣັ່ງ ກໍ່ຄືການຮຽນ-ການສອນພາສາຝຣັ່ງ ຢູ່ ສປປ ລາວ.
ສປປ ລາວ ໄດ້ເຂົ້າເປັນສະມາຊິກສົມບູນຂອງອົງການຟຣັງໂກໂຟນີສາກົນ ໃນປີ 1991 ແລະ ກໍໄດ້ປະກອບ ສ່ວນຢ່າງຕັ້ງໜ້າ ໃນການເຄື່ອນໄຫວວຽກງານຕ່າງໆຂອງອົງການດັ່ງກ່າວ, ລວມທັງການຮ່ວມມື ໃນການສົ່ງເສີມພາສາຝຣັ່ງ, ຄວາມຫຼາກຫຼາຍທາງດ້ານວັດທະນະທຳ, ການຮ່ວມມືດ້ານເສດຖະກິດ ແລະ ດິຈິຕອນ. ສປປ ລາວ ໄດ້ດຳເນີນການຮຽນ-ການສອນພາສາຝຣັ່ງ ຢູ່ນະຄອນຫຼວງວຽງຈັນ ແລະ ຢູ່ 3 ແຂວງ ຄື: ຫຼວງພະບາງ, ສະຫວັນນະເຂດ ແລະ ຈຳປາສັກ. ພາສາຝຣັ່ງ ແມ່ນໄດ້ຮັບການສົ່ງເສີມ ແລະ ນຳໃຊ້ ຢູ່ໃນຂະແໜງການສຶກສາ ແລະ ສາທາລະນະສຸກ, ໂດຍສະເພາະແມ່ນໄດ້ມີການສົ່ງເສີມການຮຽນ-ການສອນພາສາຝຣັ່ງ, ການຝຶກອົບຮົມຄູ-ອາຈານ ແລະ ການພັດທະນາຫ້ອງຮຽນສອງພາສາລາວ-ຝຣັ່ງ ໃນລະດັບປະຖົມ ແລະ ມັດທະຍົມ, ລວມທັງໃນສະຖາບັນການສຶກສາລະດັບສູງ. ນອກຈາກນີ້, ຍັງໄດ້ມີການຮ່ວມມືໃນຂົງເຂດອື່ນໆ ເຊັ່ນ: ວັດທະນະທຳ, ສື່ມວນຊົນ, ເສດຖະກິດ, ການພັດທະນາ ແລະ ເຕັກໂນໂລຊີ-ຂໍ້ມູນຂ່າວສານ.
ອົງການຟຣັງໂກໂຟນີສາກົນ (OIF) ແມ່ນອົງການຈັດຕັ້ງສາກົນລະຫວ່າງລັດຖະບານ ທີ່ເຕົ້າໂຮມເອົາບັນດາປະເທດຕ່າງໆ ທີ່ໃຊ້ພາສາຝຣັ່ງ ເຂົ້າດ້ວຍກັນ, ສ້າງຕັ້ງຂຶ້ນໃນວັນ 20 ມີນາ 1970 ໂດຍຜູ້ນໍາຈາກ 21 ປະເທດໄດ້ເຊັນສັນຍາຮ່ວມກັນ, ຊຶ່ງໃນເບື້ອງຕົ້ນມີຊື່ວ່າ ອົງການຮ່ວມມືທາງດ້ານວັດທະນະທໍາ ແລະ ເຕັກນິກ( Agence de Cooperation, Culturelle et Technique), ເຄື່ອນໄຫວທາງດ້ານການຝຶກອົບຮົມວິຊາຊີບ ແລະ ເຕັກນິກ; ແລະ ດ້ານວັດທະນະທໍາ. ຈົນມາຮອດປີ 2005, ຈຶ່ງໄດ້ປ່ຽນຊື່ມາເປັນ ອົງການຟຣັງໂກໂຟນີສາກົນ ຫຼື Organisation Internationale de la Francophonie (OIF), ມີສະມາຊິກທັງໝົດ 88 ປະເທດ (54 ປະເທດສະມາຊິກສົມບູນ, 7 ປະເທດສະມາຊິກສົມທົບ ແລະ 27 ປະເທດສະມາຊິກສັງເກດການ) ທີ່ຢູ່ໃນ 5 ທະວີບຂອງໂລກ, ມີສຳນັກງານໃຫຍ່ຕັ້ງຢູ່ ນະຄອນຫຼວງປາຣີ, ປະເທດຝຣັ່ງ.