ພາຍຫຼັງທີ່ທ່ານໄດ້ຮັບການແຕ່ງຕັ້ງໃຫ້ດຳລົງຕຳແໜ່ງໃໝ່ ຕາມການສະເໜີຂອງນາຍົກ ແລະ ຜ່ານການຮັບຮອງຂອງກອງປະຊຸມຄັ້ງປະຖົມມະລຶກຂອງສະພາແຫ່ງຊາດ ຊຸດທີ 8, ໃນວັນທີ 20 ເມສາ 2016 ທີ່ຜ່ານມາ; ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຄຳນັບອວຍພອນຂອງບັນດາ ເອກອັກຄະລັດຖະທູດຕ່າງປະເທດ ປະຈຳ ສປປ ລາວ.

ນັບແຕ່ວັນທີ 11 ພຶດສະພາ 2016 ເປັນຕົ້ນມາ, ທີ່ ກະຊວງການຕ່າງປະເທດ, ທ່ານ ລັດຖະມົນຕີກະຊວງການຕ່າງປະເທດ ໄດ້ໃຫ້ກຽດຕອນຮັບການເຂົ້າຢ້ຽມຄຳນັບອວຍພອນຂອງບັນດາທູດປະເທດເພື່ອນມິດ ປະຈຳ ສປປ ລາວ ເປັນຕົ້ນແມ່ນ ທ່ານ ຫງວຽນ ແມ້ງ ຮຸ່ງ, ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ສັງຄົມນິຍົມ ຫວຽດນາມ ປະຈຳ ສປປ ລາວ.

ທ່ານເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ອົດສະຕຣາລີ, ມາຣົກໂກ, ມາເລເຊຍ, ສິງກະໂປ ແລະ ຜູ້ຕາງໜ້າຈາກອົງການຢູນີເຊັບ ປະຈໍາ ສປປ ລາວ ຕາມລຳດັບ, ຊຶ່ງບັນດາເອກອັກຄະລັດຖະທູດ ແລະ ຜູ້ຕາງໜ້າດັ່ງກ່າວ ໄດ້ສະແດງຄວາມຊົມເຊີຍ ແລະ ອວຍພອນໃຫ້ ທ່ານລັດຖະມົນຕີກະຊວງການຕ່າງປະເທດ ຈົ່ງໄດ້ຮັບຜົນສຳເລັດໃນການປະຕິບັດໜ້າທີ່ອັນໃໝ່, ຊົມເຊີຍ ແລະ ຕີລາຄາອັນດີຕໍ່ໝາກຜົນສຳເລັດ ແຫ່ງການສ້າງສາພັດທະນາປະເທດຊາດ ແລະ ການເຕີບໃຫຍ່ຂະຫຍາຍຕົວຂອງວຽກງານການທູດລາວ, ຍິນດີໃຫ້ການສະໜັບສະໜູນ ສປປ ລາວ ໃນການເປັນປະທານອາຊຽນ ແລະ ຈະສືບຕໍ່ພົວພັນຮ່ວມມືກັບ ສປປ ລາວ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ດີນຳກັນກັບ ສປປ ລາວ ຕໍ່ໄປ.