ໃນຕອນເຊົ້້າຂອງວັນທີ 15 ມິຖຸນາ 2016, ທີ່ ນະຄອນຫຼວງດິລິ, ສະທາລະນະລັດ ປະຊາທິປະໄຕ ຕີມໍ ເລັດສະເຕ, ທ່ານ ນາງ ພາວັນ ນວນທະສິງ ໄດ້ຍື່ນສານຕາຕັ້ງຕໍ່ ພະນະທ່ານ ເຕົາ ມາເຕັນ ຣຸອັກ (Taur Matan RUAK), ປະທານາທິບໍດີ ແຫ່ງ ສະທາລະນະລັດ ປະຊາທິປະໄຕ ຕີມໍ ເລັດສະເຕ ເພື່ອດຳລົງຕຳແໜ່ງເປັນເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສະທາລະນະລັດ ປະຊາທິປະໄຕ ປະຊາຊົນລາວ ຄົນໃໝ່ ປະຈຳ ສະທາລະນະລັດ ປະຊາທິປະໄຕ ຕີມໍ ເລັດສະເຕ ໂດຍມີສຳນັກງານຕັ້ງຢູ່ ນະຄອນຫຼວງຈາກາຕາ, ສະທາລະນະລັດ ອິນໂດເນເຊຍ.

  ໃນໂອກາດດັ່ງກ່າວ, ທ່ານປະທານາທິບໍດີ ແຫ່ງ ສະທາລະນະລັດ ປະຊາທິປະໄຕ ຕີມໍ ເລັດສະເຕ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍຕໍ່ ທ່ານ ນາງ ພາວັນ ນວນທະສິງ ທີ່ໄດ້ຖືກແຕ່ງຕັ້ງໃຫ້ມາດຳລົງຕຳແໜ່ງເປັນເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສະທາລະນະລັດ ປະຊາທິປະໄຕ ປະຊາຊົນລາວ ຄົນໃໝ່ ປະຈຳ ສະທາລະນະລັດ ປະຊາທິປະໄຕ ຕີມໍ ເລັດສະເຕ. ພ້ອມດຽວກັນນັ້ນ, ທ່ານປະທານາທິບໍດີ ຍັງໄດ້ແຈ້ງໃຫ້ຊາບເຖິງຜົນສຳເລັດ ແລະ ສິ່ງທ້າທາຍໃນການສ້າງສາພັດທະນາປະເທດຊາດ, ຄວາມພະຍາຍາມຂອງລັດຖະບານໃນການຫຼຸດຜ່ອນຄວາມທຸກຍາກຂອງປະຊາຊົນ ແລະ ການປະກອບສ່ວນຂອງ ຕີມໍ ເລັດສະເຕ ເຂົ້ຳໃນການເຊື່ອມໂຍງພາກພື້ນ ແລະ ສາກົນ. ໃນໂອກາດດຽວກກັນ, ທ່ານເອກອັກຄະລັດຖະທູດເຮົາ ໄດ້ນຳເອົາຄວາມຢ້ຽມຢາມຖາມຂ່າວ ແລະ ອວຍພອນໄຊອັນປະເສີດ ຈາກພະນະທ່ານ ບຸນຍັງ ວໍລະຈິດ, ປະທານປະເທດ ແຫ່ງ ສປປ ລາວ ເຖິງ ທ່ານ Taur Matan RUAK, ປະທານາທິບໍດີ ແຫ່ງ ສະທາລະນະລັດ ປະຊາທິປະໄຕ ຕີມໍ ເລັດສະເຕ. ພ້ອມດຽວກັນນັ້ນ, ທ່ານທູດລາວ ກໍໄດ້ສະແດງຄວາມຂອບໃຈ ຕໍ່ລັດຖະບານ ສະທາລະນະລັດ ປະຊາທິປະໄຕ ຕີມໍ ເລັດສະເຕ ທີ່ໄດ້ຍິນດີຕ້ອນຮັບການມາລົງຕຳແໜ່ງເປັນເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສະທາລະນະລັດ ປະຊາທິປະໄຕ ປະຊາຊົນລາວ ຄົນໃໝ່ ປະຈຳ ສະທາລະນະລັດ ປະຊາທິປະໄຕ ຕີມໍ ເລັດສະເຕ. ພ້ອມດຽວກັນນັ້ນ, ທ່ານທູດຍັງໄດ້ຕີລາຄາສູງ ຕໍ່ສາຍພົວພັນມິດຕະພາບ ແລະ ການຮ່ວມມື ລະຫວ່າງສອງປະເທດ ຊຶ່ງເປັນການປະກອບສ່ວນສຳຄັນ ເຂົ້າໃນການພັດທະນາເສດຖະກິດ-ສັງຄົມ ຂອງສອງປະເທດ ແລະ ໃນນາມເປັນເອກອັກຄະລັດຖະທູດ ແຫ່ງ ສປປ ລາວ ປະຈຳ ຕີມໍ ເລັດສະເຕ ຈະສຸມທຸກສະຕິປັນຍາ ເພື່ອສືບຕໍ່ເສີມຂະຫຍາຍ ແລະ ຫັດແໜ້ນສາຍພົວພັນມິດຕະພາບ ແລະ ການຮ່ວມມື ລະຫວ່າງສອງປະເທດ ໃຫ້ແໜ້ນແຟ້ນ ແລະ ແຕກດອກອອກຜົນຍິ່ງໆຂຶ້ນ ເພື່ອຜົນປະໂຫຍດຂອງປະຊາຊົນສອງຊາດ ລາວ-ຕີມໍ ເລັດສະເຕ.

  ໃນຕອນທ້າຍ, ທ່ານປະທານາທິບໍດີ Taur Matan RUAK ໄດ້ສະແດງຄວາມຂອບໃຈຕໍ່ຄວາມຢື້ຢາມຖາມຂ່າວຂອງປະທານປະເທດ ແຫ່ງ ສປປ ລາວ ແລະ ໄດ້ສົ່ງຄວາມຢື້ຢາມຖາມຂ່າວ ໂດຍຜ່ານທ່ານເອກອັກຄະລັດຖະທູດລາວ ໄປຍັງ ພະນະທ່ານ ປະທານປະເທດ ແຫ່ງ ສປປ ລາວ ເຊັ່ງດຽວກັນ ແລະ ອວຍພອນໃຫ້ທ່ານທູດ ຈົ່ງມີຜົນສຳເລັດໃນການປະຕິບັດໜ້າທີ່ອັນມີກຽດຂອງຕົນ. ທ່ານເອກອັກຄະລັດຖະທູດ ກໍໄດ້ອວຍພອນໃຫ້ປະທານາທິບໍດີ Taur Matan RUAK ຈົ່ງມີພະລານາໄມສົມບູນ, ມີຄວາມຜາສຸກ ແລະ ໄດ້ຮັບຜົນສຳເລັດອັນຍິ່ງໃຫຍ່ໃນການບໍລິຫານ ແລະ ສ້າງສາພັດທະນາປະເທດຊາດຂອງຕົນ.

   ພິທີຍື່ນສານດັ່ງກ່າວ ໄດ້ຈັດຂຶ້ນທີ່ ທຳນຽບປະທານປະເທດ ແຫ່ງ ສາທາລະນະລັດ ປະຊາທິປະໄຕ ຕີມໍ ເລັດສະເຕ ຢ່າງສົມກຽດ ພາຍໃຕ້ບັນຍາກາດແຫ່ງໄມຕີຈິດ ມິດຕະພາບລະຫວ່າງສອງຝ່າຍ.