ໃນວັນທີ 11 ທັນວາ 2018, ທີ່ ສຳນັກງານປະທານາທິບໍດີແຫ່ງ ສາທາລະນະລັດ ເກຼັກ (Presidential Palace), ທ່ານ ຄຳອິນ ຄິດຈະເດດ ໄດ້ເຂົ້າຍື່ນສານຕາຕັ້ງຕໍ່ພະນະທ່ານ ໂປຣໂກປິສ ປາໂລປູລອສ (Prokopis K. PAVLOPOULOS), ປະທານາທິບໍດີ ແຫ່ງ ສາທາລະນະລັດ ເກຼັກ ເພື່ອດຳລົງຕຳແໜ່ງເປັນເອກອັກຄະລັດຖະທູດ ວິສາມັນ ຜູ້ມີອຳນາດເຕັມແຫ່ງ ສປປ ລາວ ປະຈຳປະເທດ ສາທາລະນະລັດເກຼັກ ເຊິ່ງມີສະຖານທູດຕັ້ງຢູ່ນະຄອນເຊີແນວ, ປະເທດສະວິດສະແລນ.

ພາຍຫຼັງການຢື່ນສານຕາຕັ້ງ, ທ່ານທູດລາວຄົນໃໝ່ ໄດ້ພົບປະໂອ້ລົມກັບ ພະນະທ່ານປະທານາທິບໍດີ ເຊິ່ງກ່ອນ ອື່ນທ່ານທູດໄດ້ນຳເອົາຄວາມຍື້ຢາມຖາມຂ່າວອັນອົບອຸ່ນ, ພອນໄຊອັນປະເສີດ ແລະ ຄວາມຮັກແພງຖານເພື່ອນມິດ ຈາກພະນະທ່ານ ບຸນຍັງ ວໍລະຈິດ, ປະທານປະເທດ ແຫ່ງ ສປປ ລາວ ສົ່ງເຖິງ ພະນະທ່ານ ໂປຣໂກປິສ ປາໂລປູລອສ ແລະ ຜ່ານພະນະທ່ານໄປຍັງລັດຖະບານ ແລະ ປະຊາຊົນເກຼັກ ທຸກຖ້ວນໜ້າ. ໃນໂອກາດດັ່ງກ່າວ ທ່ານ ປະທານາທິບໍດີ ໄດ້ຕີລາຄາສູງຕໍ່ການມາດໍາລົງຕໍາແໜ່ງຂອງທ່ານເອກອັກຄະລັດຖະທູດລາວຄົນໃໝ່ປະຈຳ ສາທາລະນະລັດ ເກຼັກ ແລະ ອວຍພອນໃຫ້ທ່ານເອກອັກຄະລັດຖະທູດປະສົບຜົນສຳເລັດໃນການ ປະຕິບັດໜ້າທີ່ ເພື່ອສົ່ງເສີມການຮ່ວມມືຂອງສອງ ປະເທດໃນຕໍ່ໜ້າ.

ໃນໂອກາດນີ້, ພະນະທ່ານ ປະທານາທິບໍດີ ແຫ່ງ ສາທາລະນະລັດເກຣັກ ໄດ້ຝາກຄວາມອວຍພອນໄຊ ແລະ ຄວາມຢ້ຽມຢາມອັນອົບອຸ່ນມາຍັງ ພະນະທ່ານ ບຸນຍັງ ວໍລະຈິດ, ປະທານປະເທດແຫ່ງ ສປປລາວ ແລະ ຜ່ານທານໄປຍັງ ລັດຖະບານ ແລະ ປະຊາຊົນລາວທຸກທົ່ວໜ້າ.

ໃນໄລຍະເຄື່ອນໄຫວຍື່ນສານຕາຕັ້ງ, ທ່ານທູດລາວຄົນໃໝ່ ໄດ້ພົບປະສອງຝ່າຍກັບ ເຈົ້າໜ້າທີ່ກ່ຽວຂ້ອງ ກະຊວງການຕ່າງປະເທດ ສາທາລະນະລັດ ເກຼັກ ເພື່ອປຶກສາຫາລືການຮ່ວມມືທາງດ້ານການພັດທະນາເສດຖະກິດ ສັງຄົມ ຂອງສອງປະເທດໃນຕໍ່ໜ້າ.

ສາທາລະນະລັດເກຼັກ ແລະ ສປປ ລາວ ໄດ້ສ້າງຕັ້ງສາຍພົວພັນການທູດນຳກັນ ໃນວັນທີ 15 ມິຖຸນາ 1989.