ໃນຕອນເຊົ້າຂອງວັນທີ 19 ທັນວາ 2018, ທີ່ ນະຄອນຫລວງພຽງຢາງ, ສະຫາຍ ສີສະຫວາດ ຄໍາສາລີ, ໄດ້ເຂົ້າຍື່ນສານຕາຕັ້ງຕໍ່ ສະຫາຍ ກິມ ຢົງ ນາມ, ປະທານຄະນະປະທານຄະນະກຳມາທິການ ປະຈໍາສະພາປະຊາຊົນສູງສຸດ ແຫ່ງ ສາທາລະນະລັດ ປະຊາຊົນ ປະຊາທິປະໄຕເກົາຫລີ ເພື່ອດຳລົງຕໍາແໜ່ງເປັນເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ປະຈຳ ສາທາລະນະລັດ ປະຊາຊົນ ປະຊາທິປະໄຕເກົາຫລີ ຕັ້ງຢູ່ນະຄອນຫລວງພຽງຢາງ.
ໃນໂອກາດດັ່ງກ່າວ, ສະຫາຍ ສີສະຫວາດ ຄໍາສາລີ, ໄດ້ນຳເອົາຄວາມຢື້ຢາມຖາມຂ່າວອັັນອົບອຸ່ນ ພ້ອມດ້ວຍພອນໄຊອັນປະເສີດ ຂອງ ສະຫາຍ ບຸນຍັງ ວໍລະຈິດ, ເລຂາທິການໃຫ່ຍ ຄະນະບໍລິຫານງານສູນກາງພັກປະຊາຊົນປະຕິວັດລາວ, ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ຝາກເຖິງ ສະຫາຍ ກິມ ຢົງ ນາມ, ປະທານຄະນະປະທານຄະນະກຳມາທິການ ປະຈໍາສະພາປະຊາຊົນສູງສຸດ ສປປ ເກົາຫລີ ແລະ ໂດຍຜ່ານ ສະຫາຍ ກິມ ຢົງ ນາມ, ໄປຍັງສະຫາຍ ກິມ ເຈິງ ອຸນ, ປະທານພັກແຮງງານເກົາຫລີ, ປະທານຄະນະກຳມະການກິດຈະການແຫ່ງລັດ, ຜູ້ບັນຊາການສູງສຸດກອງທັບປະຊາຊົນເກົາຫລີ ແລະ ປະຊາຊົນ ສປປ ເກົາຫລີ ອ້າຍນ້ອງທຸກຖ້ວນໜ້າ.
ສະຫາຍ ກິມ ຢົງ ນາມ, ໄດ້ສະແດງຄວາມຊົມເຊີຍຕໍ່ ສະຫາຍ ສີສະຫວາດ ຄໍາສາລີ, ທີ່ໄດ້ຖືກແຕ່ງຕັ້ງໃຫ້ມາດຳລົງຕຳແໜ່ງ ເປັນເອກອັກຄະລັດຖະທູດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ຄົນໃໝ່ ປະຈໍາ ສາທາລະນະລັດ ປະຊາຊົນ ປະຊາທິປະໄຕເກົາຫລີ ເພື່ອປະຕິບັດໜ້າທີ່ອັນຊົງກຽດ ແລະ ສູງສົ່ງ, ພ້ອມທັງອວຍພອນໃຫ້ ສະຫາຍ ເອກອັກຄະລັດຖະທູດ ຈົ່ງປະສົບຜົນສຳເລັດ ໃນການເຄື່ອນໄຫວວຽກງານການທູດຂອງຕົນ. ພ້ອມດຽວກັນນີ້, ສະຫາຍ ປະທານ ກິມ ຢົງ ນາມ ຍັງໄດ້ຝາກຄວາມຢື້ຢາມຖາມຂ່າວອັນອົບອຸ່ນ ແລະ ພອນໄຊອັນປະເສີດ ມາຍັງ ສະຫາຍ ປະທານປະເທດ ບຸນຍັງ ວໍລະຈິດ ແລະ ປະຊາຊົນລາວ ໃນໂອກາດນີ້ດ້ວຍ.
ໃນໂອກາດຍື່ນສານດັ່ງກ່າວ, ສະຫາຍ ສີສະຫວາດ ຄໍາສາລີ ໄດ້ຕີລາຄາສູງຕໍ່ການພົວພັນຮ່ວມມືອັນດີ ລະຫວ່າງ ສປປ ລາວ ແລະ ສປປ ເກົາຫລີ ເຊິ່ງແມ່ນການພົວພັນຮ່ວມມືທີ່ມີມູນເຊື້ອມາແຕ່ດົນນານ ທີ່ໄດ້ຮັບການກໍ່ຕັ້ງຂື້ນໂດຍ ສະຫາຍ ປະທານ ໄກສອນ ພົມວິຫານ, ຜູ້ນໍາທີ່ແສນເຄົາລົບຮັກຂອງປະຊາຊົນລາວ ແລະ ສະຫາຍ ປະທານ ກິມ ອິນ ຊຸງ, ຜູ້ນໍາທີ່ຍິ່ງໃຫ່ຍ ແລະ ອໍາມະຕະ ຂອງ ປະຊາຊົນເກົາຫລີ ແລະ ສືບທອດໂດຍບັນດາຜູ້ນໍາລຸ້ນຕໍ່ມາຂອງສອງປະເທດ, ສປປ ລາວ ແລະ ສປປ ເກົາຫລີ ສອງປະເທດພວກເຮົາໃຫ້ການສະໜັບສະໜູນຊ່ວຍເຫຼືອ ເຊິ່ງກັນ ແລະ ກັນ ໃນໄລຍະການຕໍ່ສູ້ເພື່ອປົດປ່ວຍປະເທດຊາດໃນເມື່ອກ່ອນ, ກໍ່ຄືການປົກປັກຮັກສາ ແລະ ພັດທະນາປະເທດຊາດຂອງແຕ່ລະປະເທດໃນປັດຈຸບັນ. ສາຍພົວພັນດັ່ງກ່າວ ໄດ້ປະກອບສ່ວນເຂົ້າໃນການຮັດແໜ້ນການພົວພັນຮ່ວມມື ລະຫວ່າງ ສອງປະເທດ ກໍ່ຄືປະກອບສ່ວນເຂົ້າໃນພາລະກິດປົກປັກຮັກສາສັນຕິພາບ ແລະ ເສີມຂະຫຍາຍການຮ່ວມມີເພື່ອພັດທະນາໃນພາກພື້ນ ແລະ ໃນໂລກ.
ສະຫາຍ ສີສະຫວາດ ຄໍາສາລີ, ໄດ້ສະແດງຄວາມຂອບໃຈຢ່າງຈິງໃຈ ຕໍ່ການຕ້ອນຮັບອັນອົບອຸ່ນ ແລະ ຄໍາເວົ້າອັນດີງາມຂອງ ສະຫາຍ ກິມ ຢົງ ນາມ ທີ່ມີຕໍ່ສາຍພົວພັນມິດຕະພາບຖານອ້າຍນ້ອງ ລະຫວ່າງ ສອງປະເທດ. ພ້ອມດຽວກັນນັ້ນ, ກໍ່ໄດ້ອວຍພອນໄຊອັນປະເສີດໃຫ້ ສະຫາຍ ກິມ ຢົງ ນາມ ຈົ່ງມີພະລານາໄມສົມບູນ ແລະ ປະສົບຜົນສໍາເລັດໃນໜ້າທີ່ວຽກງານອັນຊົງກຽດຂອງຕົນ.