ເພື່ອຂຳນັບຮັບຕ້ອນວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ ທີ່ຈະມາເຖິງນີ້, ໃນວັນທີ 14 ທັນວາ 2018, ສະຖານເອກອັກຄະລັດຖະທູດແຫ່ງ ສປປ ລາວ ປະຈຳ ສ. ຣັດເຊຍ ໄດ້ຈັດຕັ້ງປາຖະກະຖາຫວນຄືນມູນເຊື້ອແຫ່ງການກຳເນີດເຕີບໃຫຍ່ຂະຫຍາຍຕົວ ຂອງກອງທັບປະຊາຊົນລາວຄົບຮອບ 70 ປີ ທີ່ ໂຮງແຮມ ຣັດເຊຍ, ນະຄອນ ຊັງປີເຕີສະເບີກ ແລະ ໃນວັນທີ 16ທັນວາ 2018 ທີ່ ສະຖານເອກອັກຄະລັດຖະທູດແຫ່ງ ສປປ ລາວ, ນະຄອນ ຫຼວງມົດສະກູ.

ໃນພິທີປາຖະກະຖາສອງຄັ້ງດັ່ງກ່າວ ແມ່ນພາຍໃຕ້ການເປັນປະທານຂອງ ທ່ານ ປອ ສີວຽງເພັດ ເພັດວໍລະສັກ, ເອກອັກຄະລັດຖະທູດແຫ່ງ ສປປ ລາວ ແລະ ປາຖະກະຖາໂດຍ ທ່ານ ພັນເອກ ບຸນຍົງ ພັນດານຸວົງ, ທີ່ປຶກສາທູດ ຝ່າຍປ້ອງກັນຊາດ ປະຈຳສະຖານເອກອັກຄະລັດຖະທູດແຫ່ງ ສປປ ລາວ ປະຈຳ ສ. ຣັດເຊັຍ. ໃນພິທີດັ່ງກ່າວ, ໃດ້ມີ ພະນັກງານ ແລະ ສະມາຊິກຄອບຄົວຂອງພະນັກງານສະຖານທູດ, ມີນັກສຶກສາທະຫານ, ນັກສຶກສາພົນລະເຮືອນ, ຄົນລາວທີ່ອາໃສຢູ່ຣັດເຊຍ ແລະ ຄົນຣັດເຊຍຈຳນວນໜຶ່ງຜູ້ທີ່ມີການພົວພັນກັບລາວ ເຂົ້າຮ່ວມ ປະມານ 170 ກ່ວາຄົນ. ໃນພິທີປາຖະກະຖາຄັ້ງນີ້, ທ່ານ ພັນເອກ ບຸນຍົງ ພັນດານຸວົງ ກໍ່ໄດ້ຍົກໃຫ້ເຫັນເຖິງມູນເຊື້ອການສ້າງຕັ້ງ, ສູ້ຮົບມີໄຊແລະ ການເຕີບໃຫຍ່ຂະຫຍາຍຕົວຂອງກອງທັບປະຊາຊົນລາວນັບແຕ່ມື້ສ້າງຕັ້ງຈົນຮອດປັດຈຸບັນ ພາຍໃຕ້ການຊີ້ນຳພາອັນປີຊາສາມາດ ແລະ ສະຫຼາດສ່ອງໃສຂອງພັກປະຊາຊົນ ປະຕິວັດລາວ ແລະ ໃດ້ຊີ້ໃຫ້ເຫັນຜົນງານ ແລະ ໄຊຊະນະຂອງ ກອງທັບປະຊາຊົນລາວ ໃນພາລະກິດຕໍ່ສູ້ປົົດປ່ອຍປະເທດຊາດ ຈົນໄດ້ສະຖາປະນາເປັນປະເທດ ສປປ ລາວໃນວັນທີ 2ທັນວາ 1975ຢ່າງສະຫງ່າງາມ. ນອກນັ້ນ, ຍັງໃດ້ຍົກໃຫ້ເຫັນພາລະບົດບາດ, ໜ້າທີ່ຂອງກອງທັບປະຊາຊົນລາວ ໃນໄລຍະປະຕິບັດສອງໜ້າທີ່ຍຸດທະສາດຂອງພັກຄື: ປົກປັກຮັກສາ ແລະ ສ້າງສາພັດທະນາປະເທດຊາດ ແລະ ຍົກໃຫ້ເຫັນເຖິງທາດແທ້ ແລະ ມູນເຊື້ອອັນສະຫງ່າອົງອາດຂອງກອງທັບປະຊາຊົນລາວ ລວມທັງທິດທາງການພັດທະນາກອງທັບໃນຕໍ່ໄປ. ພ້ອມກັນນັ້ນ, ໃນພິທີຍັງໃດ້ມີໂອກາດໃດ້ຮັບຟັງການໂອ້ລົມ ແລະ ໃຫ້ຄຳໂອວາດຕັກເຕຶອນຕໍ່ຜູ້ເຂົ້າຮ່ວມຈາກ ທ່ານ ປອ ສີວຽງເພັດ ເພັດວໍລະສັກ, ເອກອັກຄະລັດຖະທູດແຫ່ງ ສປປ ລາວ ປະຈຳ ສ. ຣັດເຊຍ ນຳອີກ.