ກະຊວງການຕ່າງປະເທດຮ່ວມກັບກະຊວງແຜນການ ແລະ ການລົງທຶນ, ໃນນາມກອງເລຂາຄະນະຊີ້ນໍາລະດັບຊາດເພື່ອຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ (ປພຍ) ຢູ່ ສປປ ລາວໄດ້ຈັດກອງປະຊຸມທົບທວນ ປະຈຳປີ 2018 ຂອງກອງເລຂາຄະນະຊີ້ນຳລະດັບຊາດ ແລະ ຈຸດປະສານງານແຫ່ງຊາດເພື່ອຈັດຕັ້ງປະຕິບັດ ປພຍ ຢູ່ ສປປ ລາວ, ໃນລະຫວ່າງວັນທີ 24 - 25 ທັນວາ 2018 ທີ່ ​ແຂວງ​ວຽງ​ຈັນ, ໂດຍການເປັນປະທານຂອງທ່ານອານຸພາບວົງໜໍ່ແກ້ວ, ຫົວໜ້າກົມອົງການຈັດຕັ້ງສາກົນ, ທັງເປັນຫົວໜ້າກອງເລຂາຄະນະຊີ້ນໍາລະດັບຊາດເພື່ອຈັດຕັ້ງປະຕິບັດ ປພຍ, ກະຊວງການຕ່າງປະເທດ, ​ເຊິ່ງມີຜູ້ເຂົ້າຮ່ວມຈາກບັນດາກະຊວງຕ່າງໆ ທີ່​ເປັນ​ຈຸດ​ປະສານ​ງານ​ໃນ​ການຈັດ​ຕັ້ງ​ປະຕິບັດ​ ປພຍ (SDGs). ກອງປະຊຸມຄັ້ງນີ້ເປັນກອງປະຊຸມລະດັບວິຊາການຊຶ່ງມີຈຸດປະສົງ ​ໃນ​ການທົບທວນຄວາມຄືບໜ້າຂອງບັນດາ​ຂະ​ແໜງ​ການ​ທີ່​ກ່ຽວຂ້ອງໃນການຈັດຕັ້ງປະຕິບັດ ປພຍ (SDGs) ​ໃນ​ປີ 2018 ທີ່​ຜ່ານ​ມາ ​ແລະ ປຶກສາ​ຫາລື​ກ່ຽວ​ກັບ​ແຜນ​ການ,​ ບັນດາ​ສິ່ງ​ທ້າ​ທ່າ​ຍ, ມາດຕະ​ການ​ແກ້​ໄຂ ​ແລະ ທິດ​ທາງ​ໃນ ປີ 2019.

ພ້ອມດຽວກັນນັ້ນ, ກອງປະຊຸມກໍ່ຍັງໄດ້ແລກປ່ຽນຄໍາຄິດຄໍາເຫັນ​ແລະ ​ປຶກສາ​ຫາລືແຜນການ​ຈັດ​ຕັ້ງ​ປະຕິບັດ​ໃນ​ປີ 2019 ​ໂດຍ​ແນ່​ໃສ່​​ແກ້​ໄຂ ​ແລະ ປັບປຸງ​ສິ່ງ​ທີ່​ຍັງ​ຄົງ​ຄ້າງ​ໃນ​ປີ​ທີ່​ຜ່ານ​ມາ, ໃນການປະຕິບັດວາລະການພັດທະນາ 2030, ​ເພື່ອ​ສ້າງສະພາບແວດລ້ອມທີ່ເອື້ອອໍານວຍໃຫ້ສປປລາວ ສາມາດບັນລຸເປົ້າໝາຍການພັດທະນາແບບຍືນຍົງ ແລະ ຮັດແຄບຊ່ອງວ່າງດ້ານການພັດທະນາລະຫວ່າງຊົນນະບົດ ແລະ ຕົວເມືອງ. ກອງປະຊຸມ​ໄດ້​ມີ​ການ​ຮັບຮອງ​ເອົາຮ່າງ​ຍຸດ​ທະ​ສາດ​ການ​ສື່ສານ, ​ໂຄສະນາ ​ແລະ ​ເຜີຍ​ແຜ່ ​ເພື່ອ​ການ​ພັດທະນາ (ສະບັບ​ພາສາ​ລາວ ​ແລະ ອັງກິດ) ​ແລະ ຮ່າງ​ແຜນ​ປະຕິບັດ​ງານ​ ປພຍ ແຫ່ງ​ຊາດ ຂອງ ສປປ ລາວ (ສະບັບພາສາລາວ ແລະ ອັງກິດ), ຊຶ່ງ​ທັງໝົດຈະ​ນໍາ​ໄປສະ​ເໜີ​ຕໍ່​ກອງ​ປະຊຸມ​ຄະນະ​ຊີ້​ນໍາ​ລະດັບ​ຊາດ ປພຍ ​ເປັນ​ຜູ້​ຮັບຮອງ​ເອົາ​ໃນ​ຕໍ່ໜ້າ. ສຸດທ້າຍນີ້, ກອງ​ປະຊຸມກໍ່ໄດ້ຮຽກຮ້ອງແລະເນັ້ນໜັກໃຫ້ບັນດາຂະແໜງການແລະທຸກໆພາກສ່ວນທີ່ກ່ຽວຂ້ອງສືບຕໍ່ຮັດແໜ້ນແລະເສີມຂະຫຍາຍການຮ່ວມມືເພື່ອຮັບປະກັນການບັນລຸເປົ້າໝາຍແລະບູລິມະສິດຂອງການພັດທະນາຂອງສປປລາວກໍຄືການຫຼຸດພົ້ນອອກຈາກສະຖານະພາບປະເທດດ້ອຍພັດທະນາ, ພ້ອມທັງການ​ບັນລຸເປົ້າໝາຍຕາມວາລະການພັດທະນາ 2030.

ກອງ​ເລຂາ​ຄະນະ​ຊີ້​ນໍາ​ລະດັບ​ຊາດ​ເພື່ອ​ຈັດ​ຕັ້ງ​ປະຕິບັດປພຍຖືກ​ແຕ່ງ​ຕັ້ງ​ຂື້ນ​ໃນ​ປີ 2017 ​ມີ​ພາລະ​ບົດບາດ​ເປັນເສນາ​ທິການ ​ໃຫ້​ແກ່​ຄະນະ​ຊີ້​ນໍາ​ລະດັບ​ຊາດ​ໃນ​ການ​ປະສານງານ​ກັບ​ບັນດາ​ກະຊວງ ​ແລະອົງການ​ລັດທຽບ​ເທົ່າ​ກະຊວງ​, ຕິດຕາມ, ລາຍງານ ​ແລະຊຸກຍູ້​ການຈັດ​ຕັ້ງ​ປະຕິບັດປພຍ ​ໃຫ້​ຄະນະ​ຊີ້​ນໍາ​ລະດັບ​ຊາດ, ​ເຜີຍ​ແຜ່​ໂຄສະນາ ​ແລະສ້າງ​ຄວາມ​ເຂົ້າ​ໃຈກ່ຽວ​ກັບປພຍ ​ໃຫ້​ພາກສ່ວນ​ລັດ ​ແລະສັງຄົມ​ຢູ່​ສູນ​ກາງ ​ແລະທ້ອງ​ຖິ່ນ, ລະດົມ​ການ​ຊ່ວຍ​ເຫຼືອ​ຈາກ​ພາຍ​ໃນ ​ແລະຕ່າງປະ​ເທດ. ສໍາລັບ​ຈຸດ​ປະສານ​ງານປພຍ ປະຈໍາກະຊວງກໍ​ເປັນ​ອີກ​ກົນ​ໄກການປະສານງານ​ໜຶ່ງ​ຂອງ​ລັດຖະບານ​​ໃນ​ການຈັດ​ຕັ້ງ​ປະຕິບັດປພຍ, ​ໂດຍ​ມີ​ພາລະ​ບົດບາດ ​ເປັນ​ເຈົ້າ​ການ​ໃນ​ການ​ນໍາພາ​ການຈັດຕັ້ງ​ປະຕິບັດປພຍຂອງ​ແຕ່​ລະ​ກະຊວງ ​ແລະອົງການ​ລັດ​ທຽບ​ເທົ່າ​ກະຊວງ, ຮັບປະກັນ​ການ​ປະສານງານ ​ແລະຮ່ວມ​ມື​​ເພື່ອ​ຈັດ​ຕັ້ງ​ປະຕິບັດປພຍໃຫ້ມີປະສິດຕິຜົນສູງ.