ໃນວັນທີ 04 ພຶດສະພາ 2021, ກະຊວງການຕ່າງປະເທດ ໄດ້ມອບເຄື່ອງສະໜັບສະໜູນແພດໝໍທີ່ປະຕິບັດໜ້າທີ່ຢູ່ແນວໜ້າ ໃນການຕ້ານ ແລະ ຄວບຄຸມການແຜ່ລະບາດຂອງພະຍາດໂຄວິດ-19 ຮອບໃໝ່ ໃຫ້ແກ່ໂຮງຫມໍມິດຕະພາບ, ໂຮງຫມໍເສດຖາທິລາດ,ກົມຄວບຄຸມພະຍາດຕິດຕໍ່ ແລະ ສູນວິເຄາະ ແລະ ລະບາດວິທະຍາ, ຊຶ່ງຕາງໜ້າມອບໃນຄັ້ງນີ້ໂດຍ ທ່ານ ໂພໄຊ ໄຂຄຳພິທູນ, ຫົວໜ້າຫ້ອງການ, ກະຊວງການຕ່າງປະເທດ, ມີຕາງໜ້າ 3 ອົງການຈັດຕັ້ງມະຫາຊົນ ແລະ ພະນັກງານກ່ຽວຂ້ອງເຂົ້າຮ່ວມ.
ການມອບເຄື່ອງສະໜັບສະໜູນໃນຄັ້ງນີ້ແມ່ນພາຍໃຕ້ເນື້ອໃນ “ຂໍເປັນກຳລັງໃຈໃຫ້ນັກຮົບຊຸດຂາວ ຈາກພະນັກງານກະຊວງການຕ່າງປະເທດ” ເພື່ອເປັນກຳລັງໃຈສົ່ງໃຫ້ບັນດາເເພດໝໍທີ່ພວມປະຕິບັດໜ້າທີ່ຢ່າງຫ້າວຫັນ ໃນການຕ້ານ ແລະ ຄວບຄຸມການແຜ່ລະບາດຂອງພະຍາດ ໂຄວິດ-19 ພາຍໃນປະເທດ ໃຫ້ມີຜົນສໍາເລັດຢ່າງຈົບງາມ,ໂດຍສະເພາະທີມງານທີ່ກວດຕົວຢ່າງ, ວິເຄາະ ແລະ ປິ່ນປົວຜູ້ຕິດເຊື້ອ ຢູ່ 4 ພາກສ່ວນດັ່ງກ່າວນັ້ນ, ຊຶ່ງເຄື່ອງສະໜັບສະໜູນທີ່ນໍາມາມອບໃນຄັ້ງນີ້ ປະກອບມີ: ນໍ້າດື່ມຫົວເສືອຕຸກກາງ ພາກສ່ວນລະ 50 ແກັດ, ຊຸດປ້ອງກັນ PPE ພາກສ່ວນລະ 100 ຊຸດ ແລະ ຜ້າອັດປາກ-ດັງ ພາກສ່ວນລະ 5.000 ອັນ.