ວັນທີ 4 ​ພຶດສະພາ2021 ທີ່ ສະຖານ​ເອກ​ອັກຄະ​ລັດຖະທູດ ແຫ່ງ​ ສປປ ລາວ ປະຈຳ ສສ ຫວຽດນາມ ສະຫາຍ ບູ່​ຍ ມິ​ງ ຖື່ ​ຫົວໜ້າ​ຄະນະ​ປະສານ​ງານ​ທະຫານ​ອາສາ​ສະໝັກ ແລະ ຊ່ຽວຊານການທະຫານ ​ນະຄອນຫຼວງ​ຮ່າ​ໂນ້ຍ ພ້ອມ​ດ້ວຍຄະນະປະສານງານຄະນະຊ່ຽວຊານການທະຫານ 959 ​ໄດ້​ນຳເອົາ ຜ້າ​ອັດ​ປາກກາ​ນ​ແພດຈຳນວນ 250.000 ອັນ ​ ມາມອບໃຫ້ ສະຫາຍ ​ແສງ​ເພັດ​ ຮຸ່ງ​ບຸນ​ຍວງ ​ເອກ​ອັກຄະ​ລັດຖະທູດວິສາມັນ​ຜູ້​ມີ​ອຳນາດ​ເຕັມ ​ແຫ່ງ​ ສປປ ລາວ ປະຈຳ ສສ ຫວຽດນາມ ເພື່ອສົ່ງຕໍ່ໃຫ້ລັດ​ຖະບານ​ລາວ ໂດຍການເຂົ້າຮ່ວມເປັນສັກຂີພິຍານຂອງຄະນະ​ນຳສະຖານ​ທູດລາວ​ທີ່​ຮ່າ​ໂນ້ຍ ພ້ອມ​ດ້ວຍພະນັກງານຂອງທັງສອງຝ່າຍ ລາວ-​ຫວຽດນາມ.

​​​ສະຫາຍ ບູ່​ຍ ມິ​ງ ຖື່ ​​ໄດ້​ກ່າວສະ​ແດງ​ຄວາມ​ເປັນ​ຫ່ວງ​ເປັນ​ໄຍຕໍ່​ການລະບາດພະຍາດ​ໂຄ​ວິດ-19 ​ຮອບ​ໃໝ່​ຢູ່​ ສປປ ລາວ ຊຶ່ງຜ້າ​ອັດ​ປາກທີ່​ນຳ​ມາ​ມອບໃນ​ຄັ້ງ​ນີ້​ເຖິງ​ວ່າ​ຈຳນວນ​ບໍ່​ຫຼາຍ​ແຕ່​ກໍ​ເປັນ​ການ​ປະກອບ​ສ່ວນດ້ວຍ​ຄວາມ​ຈິງ​ໃຈຈາກສະມາຊິກ ແລະ ຄອບຄົວຂອງຄະນະດັ່ງກ່າວ ເພື່ອປະກອບສ່ວນ​ເຂົ້າ​ໃນ​ການ​ຊ່ວຍ​ເຫຼືອປະຊາຊົນ​ລາວໃນ​ການ​ປ້ອງ​ກັນ​ໂຄ​ວິດ-19​ທີ່​ກຳລັງ​ລະບາດ​ຢູ່​ລາວ​ໃນ​ປັດຈຸ​ບັນ​. ​​ ຫວັງ​ວ່າ​ລັດຖະບານ ​ແລະ ປະຊາຊົນ​ລາວຈະ​ພ້ອມ​ກັນ​ຕ້ານ ​ແລະ​ ສະກັດ​ກັ້ນ​ພະຍາດ​ໂຄດ​ວິດ-19 ​ ໄດ້ ​ແລະ ຂໍ​ໃຫ້​ປະຊາຊົນ​ລາວກັບ​ມາ​ໃຊ້​ຊີວິດ​ແບບ​ປົກກະຕິ​ໂດຍ​ໄວ.

ໃນ​ໂອກາດ​ນີ້, ​ສະຫາຍ​ ແສງ​ເພັດ ຮຸ່ງ​ບຸນ​ຍວງ ​​ ກໍໄດ້ສະ​ແດງ​ຄວາມ​ຮູ້ບຸນຄຸນ ແລະ ຂອບ​​ອົກຂອບໃຈຢ່າງຈິງໃຈມາຍັງ ສະຫາຍ ບູ່​ຍ ມິ​ງ ຖື່ ພ້ອມ​ຄະນະ, ໃນການ​ຊ່ວຍ​ເຫຼືອ​ຄັ້ງ​ນີ້ ຊຶ່ງ​ເປັນ​ການສະ​ແດງ​ເຖິງ ນຳ້​ຈິດ​ນ້ຳໃຈຂອງ​ຄອບຄົວ​ຄະນະ​ປະສານ​ງານ​​ທະຫານ​ອາສາ​ສະໝັກ ແລະ ຊ່ຽວຊານການທະຫານ​ນະຄອນຫຼວງ​ຮ່າ​ໂນ້ຍ ແລະ ຄະນະປະສານງານຄະນະຊ່ຽວຊານການທະຫານ 959 ທີ່​ໄດ້​ບິ​ແບ່ງ​ຄວາມຫ​ຍຸ້ງ​ຍາກ​ທີ່​ປະຊາຊົນ​ລາວ​ກຳລັງ​ປະ​ເຊີນ​ຢູ່​ໃນ​ປັດຈຸບັນ, ສະຫາຍ​ໄດ້​ຕີ​ລາຄາ​ສູງ ​ທີ່ຍາມ​ໃດ ສປປ ​ລາວ​​ພົບ​ຄວາມຫ​ຍຸ້ງ​ຍາກ ແມ່ນຈະໄດ້​ຮັບການ​ປະກອບສ່ວນ​ຊ່ວຍ​ເຫຼືອ​ຂອງ​ສະຫາຍ ຫວຽດນາມອ້າຍ​ນ້ອງ, ​ ​ຮ່ວມ​ສຸກ​ຮ່ວມ​ທຸກ​ນຳ​ກັນ​ ​​ຊຶ່ງ​ເຫັນ​ໄດ້ນັບ​ແຕ່​ສະ​ໄໝ່ຕໍ່ສູ້​ຕ້ານ​ຈັກກະພັດ​ແບບ​ເກົ່າ ​ແລະ ​ແບບ​ໃໝ່ ຈົນ​ມາ​ຮອດ​ປັດຈຸບັນ​ກໍ​ຍັງ​ສືບ​ຕໍ່​ຊ່ວຍ​ເຫຼືອ​ປະຊາຊົນ​ລາວ​ຕະຫຼອດ​ມາ, ​ເປັນ​ການ​ປະກອບ​ສ່ວນ​ເຂົ້າ​ໃນ​ການເພີ່ມພູນຄູນສ້າງສາຍ​ພົວພັນ​​ມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ສອງ​ກອງທັບ ແລະ ປະຊາຊົນສອງຊາດລາວ-​ຫວຽດນາມ ​ໂດຍ​ສະ​ເພາະ​ແມ່ນ ​ຄະນະ​ປະສານ​ງານ​​ທະຫານ​ອາສາ​ສະໝັກ ແລະ ຊ່ຽວຊານການທະຫານ​ນະຄອນຫຼວງ​ຮ່າ​ໂນ້ຍ ແລະ ຄະນະປະສານງານຄະນະຊ່ຽວຊານການທະຫານ 959​ກໍ​ຄືສອງ​ກອງທັບ​ປະຊາຊົນ​ລາວ ​ແລະ ກອງທັບ​ປະຊາຊົນ​ຫວຽດນາມ. ພ້ອມ​ທັງ​ຢືນຢັນ​ວ່າ​ຈະ​ນຳ​ເອົາ​ເຄື່ອງ​ຈຳນວນ​ດັ່ງ​ກ່າວ​ສົ່ງ​ຕໍ່​ໃຫ້​ເຖິງປະ​ຊົນ​ຊົນ​ລາວ​ໄດ້​ນຳ​ໃຊ້​ຢ່າງມີ​ປະສິດທິພາບ​ສູງ ໂດຍໄວ​.

ນອກຈາກ​ນັ້ນ, ​ໃນ​ທ້າຍ​ອາທິດ​ຜ່ານ​ມາ ຊາວ​ໝຸ່ມກອມ​ມູນິດ​ໂຮ່ຈີ​ມິນ​ກໍ​ໄດ້​ນຳ​ຜ້າ​ອັດ​ປາກ​ຈຳນວນ 25.000 ອັນ ມາ​ມອບ​ໃຫ້​ສະຖານເອກອັກຄະລັດຖະທູດ ແຫ່ງ ສປປ ລາວ ປະຈໍາ ສສ ຫວຽດນາມ ເພື່ອສົ່ງຕໍ່ໄປໃຫ້ສູນກາງຊາວ​ໜຸ່ມປະຊາຊົນປະຕິວັດ​ລາວ​ເຊັ່ນ​ດຽວ​ກັນ ​ເພື່ອ​ປະກອບສ່ວນ​ແບ່ງ​ເບົາ​ໃນ​ການ​ຕ້ານ​ໂຄ​ວິດ​ຢູ່ ສປປ ລາວ ໃນປັດຈຸບັນ.