ວັນທີ 11 ພຶດສະພາ 2021 ທີ່ ສະຖານເອກອັກຄະລັດຖະທູດ ແຫ່ງ ສປປ ລາວ ປະຈຳ ສສ ຫວຽດນາມ, ສະຫາຍ ເຈີ່ນ ກວາງ ຮຸຍ, ກໍາມະການຄະນະປະທານສະຫະພັນແຮງງານຫວຽດນາມ, ປະທານກຳມະບານອຸດສາຫະກຳ ແລະ ການຄ້າຫວຽດນາມ ພ້ອມດ້ວຍຄະນະ ໄດ້ນຳເອົາ ຜ້າອັດປາກ ການແພດ ຈຳນວນ 250.000 ອັນ ແລະ ນ້ຳຢາຂ້າເຊື້ອພະຍາດ ຂະໜາດ 500 ml ຈໍານວນ 100 ແກ້ວ (ກວດ) ມາມອບໃຫ້ ສະຫາຍ ແສງເພັດ ຮຸ່ງບຸນຍວງ, ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈຳ ສສ ຫວຽດນາມ ເພື່ອສົ່ງຕໍ່ໃຫ້ສູນກາງສະຫະພັນກໍາມະບານລາວ ໂດຍການເຂົ້າຮ່ວມເປັນສັກຂີພິຍານຂອງຄະນະນຳສະຖານທູດລາວ ທີ່ ຮ່າໂນ້ຍ ພ້ອມດ້ວຍພະນັກງານຂອງທັງສອງຝ່າຍ ລາວ-ຫວຽດນາມ.
ສະຫາຍ ເຈີ່ນ ກວາງ ຮຸຍ ໄດ້ກ່າວສະແດງຄວາມເປັນຫ່ວງເປັນໄຍຕໍ່ການລະບາດພະຍາດໂຄວິດ-19 ຮອບໃໝ່ຢູ່ ສປປ ລາວ ຊຶ່ງຜ້າອັດປາກ ແລະ ນ້ຳຢາຂ້າເຊື້ອທີ່ນຳມາມອບໃນຄັ້ງນີ້ ເຖິງວ່າ ຈຳນວນບໍ່ຫຼາຍ ແຕ່ກໍເປັນການປະກອບສ່ວນດ້ວຍຄວາມຈິງໃຈຈາກສະຫະພັນກຳມະບານອຸດສາຫະກຳ ແລະ ການຄ້າຫວຽດນາມ ເພື່ອປະກອບສ່ວນຊ່ວຍເຫຼືອສູນກາງສະຫະພັນກໍາມະບານລາວ ກໍຄື ປະຊາຊົນລາວ ໃນການປ້ອງກັນ, ຄວບຄຸມ ແລະ ສະກັດກັ້ນການແຜ່ລະບາດຂອງເຊື້ອພະຍາດໂຄວິດ 19 ທີ່ກຳລັງລະບາດຢູ່ລາວໃນປັດຈຸບັນ. ຫວັງວ່າ ລັດຖະບານ ແລະ ປະຊາຊົນລາວ ຈະພ້ອມກັນ ຄວບຄຸມ ແລະ ສະກັດກັ້ນການແຜ່ລະບາດພະຍາດດັ່ງກາວໄດ້ໂດຍໄວ ເພື່ອເຮັດໃຫ້ປະຊາຊົນລາວໄດ້ກັບມາໃຊ້ຊີວິດແບບປົກກະຕິ.
ໃນໂອກາດນີ້, ສະຫາຍ ແສງເພັດ ຮຸ່ງບຸນຍວງ ກໍໄດ້ສະແດງຄວາມຮູ້ບຸນຄຸນ ແລະ ຂອບອົກຂອບໃຈຢ່າງຈິງໃຈມາຍັງ ສະຫາຍ ເຈີ່ນ ກວາງ ຮຸຍ ພ້ອມຄະນະ ໃນການຊ່ວຍເຫຼືອຄັ້ງນີ້ ຊຶ່ງເປັນການສະແດງເຖິງນຳ້ຈິດນ້ຳໃຈຂອງສະຫະ ພັນກຳມະບານອຸດສາຫະກຳ ແລະ ການຄ້າຫວຽດນາມ ເຖິງວ່າຢູ່ຫວຽດນາມກໍມີການລະບາດຂອງເຊື້ອພະຍາດໂຄວິດ 19 ຮອບໃໝ່ ກໍຕາມ ແຕ່ກໍໄດ້ບິແບ່ງຄວາມຫຍຸ້ງຍາກທີ່ປະຊາຊົນລາວກຳລັງປະເຊີນຢູ່ໃນປັດຈຸບັນ, ເປັນການປະກອບສ່ວນເຂົ້າໃນການເພີ່ມພູນຄູນສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບ ດ້ານລະຫວ່າງສອງພັກ, ສອງລັດ ແລະ ປະຊາຊົນສອງຊາດລາວ-ຫວຽດນາມ ໂດຍສະເພາະແມ່ນ ສູນກາງສະຫະພັນກຳມະບານລາວ ແລະ ສະຫະພັນກຳມະບານອຸດສາຫະກຳ ແລະ ການຄ້າຫວຽດນາມ ພ້ອມທັງຢືນຢັນວ່າ ຈະປະສານໄປຍັງພາກສ່ວນທີ່ກ່ຽວຂ້ອງຂອງລາວ ເພື່ອຮັບເອົາເຄື່ອງຈຳນວນດັ່ງກ່າວ ສົ່ງຕໍ່ໃຫ້ເຖິງສະມາຊິກກໍາມະບານລາວ ກໍຄືປະຊາຊົນລາວ ໄດ້ນຳໃຊ້ຢ່າງມີປະສິດທິພາບສູງ ໂດຍໄວ.