- ພໍ່ແມ່ ພີ່ນ້ອງ ປວງຊົນລາວ ທົ່ວປະເທດ ທີ່ເຄົາລົບ ແລະ ຮັກແພງທັງຫຼາຍ!
ປີ 2017 ນີ້ ເປັນປີສຳຄັນທາງປະຫວັດສາດ ຊຶ່ງແມ່ນປີ ຄົບຮອບ 50 ປີ ແຫ່ງການສ້າງຕັ້ງ ສະມາຄົມບັນດາປະຊາຊາດອາຊີຕາເວັນອອກສ່ຽງໃຕ້ ຫລື ອາຊຽນ (8 ສິງຫາ 1967 - 8 ສິງຫາ 2017) ແລະ ເປັນປີຄົບຮອບ 20 ປີ ທີ່ ສປປ ລາວ ເຮົາ ເຂົ້າເປັນສະມາຊິກອາຊຽນ (23 ກໍລະກົດ 1997 - 23 ກໍລະກົດ 2017).
ຂ້າພະເຈົ້າ ຂໍຖືໂອກາດນີ້ ຕາງຫນ້າ ລັດຖະບານ ແຫ່ງ ສປປ ລາວ ສະແດງຄວາມຢື້ຢາມຖາມຂ່າວອັນອົບອຸ່ນ ມາຍັງບັນດາທ່ານຜູ້ນຳພັກ-ລັດ, ພະນັກງານ, ທະຫານ, ຕຳຫຼວດແລະພີ່ນ້ອງຊາວລາວທຸກຖ້ວນໜ້າທັງຢູ່ພາຍໃນແລະຕ່າງປະເທດ, ກໍຄືຊາວຕ່າງປະເທດ ທີ່ພວມປະຕິບັດຫນ້າທີ່ ແລະ ດໍາລົງຊີວິດຢູ່ ສປປ ລາວ.
ຄືດັ່ງພວກເຮົາຊາບດີນຳກັນແລ້ວວ່າ ຕະຫລອດໄລຍະ 50 ປີທີ່ຜ່ານມາ, ອາຊຽນ ໄດ້ພັດທະນາຕົນເອງ ໃຫ້ສອດຄ່ອງກັບສະພາບການຂອງພາກພື້ນ ແລະ ສາກົນ ທີ່ມີການປ່ຽນແປງໃນແຕ່ລະໄລຍະ ໂດຍຄໍານຶງເຖິງຄວາມຫຼາກຫຼາຍຂອງພາກພື້ນທາງດ້ານວັດທະນະທຳ, ສາດສະໜາ, ພາສາ, ລະບົບການເມືອງ ແລະ ລະດັບການ ພັດທະນາທາງດ້ານເສດຖະກິດ ແລະ ອື່ນໆຊຶ່ງໄດ້ເຮັດໃຫ້ອາຊຽນເຕີບໃຫຍ່ຂະຫຍາຍຕົວເທື່ອລະກ້າວ.
ພາຍໃນອາຊຽນເອງ, ອາຊຽນ ໄດ້ຂະຫຍາຍສະມາຊິກຂອງຕົນໃຫ້ກວມເອົາ 10 ປະເທດໃນອາຊີຕາເວັນອອກສ່ຽງໃຕ້ແລະ ເພີ່ມທະວີການຮ່ວມມືກັນ ທັງລວງເລິກ ແລະ ລວງກວ້າງ ເທື່ອລະກ້າວ ຈົນກວມເອົາທຸກຂົງເຂດ ນັບແຕ່ດ້ານເສດຖະກິດ, ສັງຄົມ-ວັດທະນະທໍາ ໄປເຖິງດ້ານການເມືອງ-ຄວາມໝັ້ນຄົງ.
ພ້ອມກັນນີ້, ອາຊຽນ ຍັງໄດ້ຮັດແໜ້ນການພົວພັນກັບພາຍນອກ ໂດຍໄດ້ຂະຫຍາຍການເປັນຄູ່ຮ່ວມເຈລະຈາ ກວມເອົາບັນດາປະເທດໃຫຍ່ໃນໂລກ ແລະ ໄດ້ສ້າງຫລາຍຮູບແບບການຮ່ວມມືກັບພາຍນອກຕາມທ່າແຮງ ແລະ ຄວາມເຫມາະສົມກັບສະພາບການຕົວຈິງຂອງແຕ່ລະປະເທດ. ອາຊຽນ ໄດ້ລິເລີ່ມສ້າງຕັ້ງບັນດາກົນໄກການຮ່ວມມືຄື: ອາຊຽນບວກໜຶ່ງ, ອາຊຽນບວກສາມ, ກອງປະຊຸມລັດຖະມົນຕີປ້ອງກັນປະເທດບວກ, ເວທີປຶກສາຫາລືພາກພື້ນອາຊຽນ ແລະ ກອງປະຊຸມສຸດຍອດອາຊີຕາເວັນອອກຊຶ່ງໄດ້ກາຍເປັນເວທີທີ່ສໍາຄັນ ບໍ່ພຽງແຕ່ສຳລັບໃຫ້ອາຊຽນພົວພັນຮ່ວມມືກັບຄູ່ເຈລະຈາຂອງຕົນ ແລະ ຄູ່ຮ່ວມມືພາຍນອກອື່ນໆ ເທົ່ານັ້ນ, ແຕ່ຍັງເປັນເວທີໃຫ້ຄູ່ເຈລະຈາ ແລະ ຄູ່ຮ່ວມມືພາຍນອກອື່ນ ລວມທັງ ບັນດາປະເທດມະຫາອໍານາດໄດ້ພົບປະປຶກສາຫາລືກັນ ກ່ຽວກັບ ບັນຫາຕ່າງໆຂອງຂົງເຂດ ແລະ ຂອງໂລກທີ່ມີຄວາມສົນໃຈ ແລະ ມີຄວາມຮັບຜິດຊອບຮ່ວມກັນ ຊຶ່ງເປັນການປະກອບສ່ວນເຂົ້າໃນການສົ່ງເສີມຄວາມເຂົ້າໃຈເຊິ່ງກັນ ແລະ ກັນ, ຄວາມໄວ້ເນື້ອເຊື່ອໃຈດ້ານຍຸດທະສາດ ແລະ ສ້າງສະພາບແວດລ້ອມທີ່ເອື້ອອຳນວຍໃຫ້ແກ່ການປົກປັກຮັກສາ ແລະ ສົ່ງເສີມສັນຕິພາບ, ສະຖຽນລະພາບ ແລະ ການຮ່ວມມື ເພື່ອການພັດທະນາໃນພາກພື້ນ ກໍຄື ໃນໂລກ. ສິ່ງສໍາຄັນທີ່ສຸດ, ຄວາມເປັນແກນກາງຂອງອາຊຽນ ເປັນທີ່ຮັບຮູ້ໃນໂຄງສ້າງພາກພື້ນທີ່ພວມຜັນແປ ຊຶ່ງໂຄງສ້າງດັ່ງກ່າວໄດ້ຮັບການເສີມຂະຫຍາຍຈາກບັນດາກົນໄກທີ່ອາຊຽນເປັນຜູ້ລິເລີ່ມຂຶ້ນ.
ຜົນສຳເລັດອັນພົ້ນເດັ່ນທີ່ສຸດ ຂອງ ອາຊຽນ ແມ່ນການປົກປັກຮັກສາສັນຕິພາບ, ຄວາມໝັ້ນຄົງ, ແລະ ສະຖຽນລະພາບ ຢູ່ອາຊີຕາເວັນອອກສ່ຽງໃຕ້ ຊຶ່ງໄດ້ກາຍເປັນເງື່ອນໄຂທີ່ເອື້ອອຳນວຍໃຫ້ແກ່ການພັດທະນາເສດຖະກິດ-ສັງຄົມ ຂອງບັນດາປະເທດສະມາຊິກອາຊຽນ ແລະ ການເພີ່ມທະວີການຮ່ວມມືພາຍໃນ ອາຊຽນ ກໍຄື ການສົ່ງເສີມການຮ່ວມມືກັບພາຍນອກ ອັນໄດ້ນໍາໄປສູ່ການສ້າງຕັ້ງເປັນປະຊາຄົມອາຊຽນໃນວັນທີ 31 ທັນວາ 2015 ຊຶ່ງເປັນປະຊາຄົມທີ່ມີຮາກຖານອັນແໜ້ນແກ່ນສູ່ອະນາຄົດ.
ການເຕີບໃຫຍ່ຂະຫຍາຍຕົວຂອງອາຊຽນດັ່ງກ່າວ ເຖິງວ່າຈະມີລັກສະນະຊ້າ, ແຕ່ກໍ່ມີຄວາມຫນັກແຫນ້ນ ແລະ ຕໍ່ເນື່ອງ ແລະ ທຸກປະເທດສະມາຊິກກ້າວໄປພ້ອມໆກັນ ໃນຈັງຫວະທີ່ທຸກປະເທດມີຄວາມສະບາຍໃຈ. ຜົນສໍາເລັດ ທີ່ອາຊຽນ ຍາດມາໄດ້ໃນໄລຍະ 5 ທົດສະວັດທີ່ຜ່ານມານີ້ ກໍແມ່ນຍ້ອນຫຼາຍໆປັດໄຈ, ໜຶ່ງໃນນັ້ນກໍແມ່ນ “ວີຖີທາງອາຊຽນ”ທີ່ອີງໃສ່ລັກສະນະສະເພາະ ແລະ ຈຸດພິເສດຂອງພາກພື້ນອາຊຽນ ທີ່ມີຄວາມຫຼາກຫຼາຍ, ອີງໃສ່ຄວາມເຂົ້າໃຈເຊິ່ງກັນ ແລະ ກັນ ແລະ ການຍຶດໝັ້ນໃນບັນດາຫຼັກການພື້ນຖານຂອງອາຊຽນດັ່ງທີ່ລະບຸໃນສົນທິສັນຍາໄມຕີຈິດ ແລະ ການຮ່ວມມືໃນອາຊີຕາເວັນອອກສ່ຽງໃຕ້, ກົດບັດອາຊຽນ, ແລະ ເອກະສານອື່ນໆຂອງອາຊຽນ.
ບັນດາທ່ານ, ບັນດາສະຫາຍ ແລະ ພໍ່ແມ່ພີ່ນ້ອງທັງຫຼາຍ!
ໃນທ່າມກາງທີ່ສະພາບການຜັນແປທີ່ສັບສົນຂອງພາກພື້ນ ແລະ ຂອງໂລກ ໃນປະຈຸບັນ ທີ່ເຕັມໄປດ້ວຍຄວາມສ່ຽງນີ້, ອາຊຽນ ຈະຕ້ອງໄດ້ສືບຕໍ່ເສີມຂະຫຍາຍບັນດາຜົນສຳເລັດທີ່ຍາດມາໄດ້, ເພີ່ມທະວີການເຊື່ອມໂຍງເສດຖະກິດພາຍໃນພາກພື້ນອາຊຽນ ແລະ ກັບພາຍນອກ, ດຳເນີນນະໂຍບາຍເປີດກວ້າງການຮ່ວມມືກັບພາຍນອກ ໂດຍການຮັດແໜ້ນການພົວພັນກັບພາຍນອກ ແລະ ເສີມຂະຫຍາຍທ່ວງທ່າທີ່ດີໃນການພົວພັນກັບ ກັບບັນດາຄູ່ເຈລະຈາຂອງອາຊຽນ ລວມທັງ ເສີມຂະຫຍາຍການພົວພັນ ກັບຄູ່ຮ່ວມມືພາຍນອກອື່ນໆ ໂດຍນໍາໃຊ້ຮູບແບບການຮ່ວມມືຕ່າງໆທີ່ແທດເໝາະ ແລະ ປັບຕົວໄດ້ຢ່າງຄ່ອງແຄ້ວ, ໜັກແໜ້ນ ແລະ ສະເໝີຕົ້ນສະເໝີປາຍ. ພ້ອມດຽວກັນນີ້, ອາຊຽນ ຍັງຈະສົ່ງເສີມ ບັນດາກົນໄກທີ່ອາຊຽນສ້າງຕັ້ງຂຶ້ນໃຫ້ເຂັ້ມແຂງ ແລະ ສົ່ງເສີມຄວາມເປັນແກນກາງ ແລະ ຄວາມເປັນເອກະພາບ ຂອງຕົນໃນການພົວພັນກັບພາຍນອກ ແລະ ໃນໂຄງສ້າງພາກພື້ນທີ່ພວມຜັນແປ. ສໍາຄັນທີ່ສຸດ, ອາຊຽນ ຈະສືບຕໍ່ກ້າວໄປໃນຫຼັກການແຫ່ງຄວາມເປັນເຈົ້າການ, ຍຶດໝັ້ນໃນບັນດາຫຼັກການທີ່ໄດ້ກໍານົດໄວ້ໃນກົດບັດອາຊຽນ ທັງເປັນປະຊາຄົມທີ່ ສ້າງຄວາມເພິ່ງພໍໃຈ ແລະ ສະບາຍໃຈໃຫ້ແກ່ກັນ ແລະ ກັນ.
ທ່ານຍິງ ທ່ານຊາຍ ທີ່ຮັກແພງທັງຫຼາຍ!
ສປປ ລາວ ເຮົາ ມີຄວາມພາກພູມໃຈເປັນຢ່າງຍິ່ງ ທີ່ເປັນສ່ວນໜຶ່ງຂອງຄອບຄົວອາຊຽນ. ນັບແຕ່ ສປປ ລາວ ເຂົ້າເປັນສະມາຊິກອາຊຽນ ໃນປີ 1997, ອາຊຽນ ໄດ້ກາຍເປັນເສົາຄ້ຳໜຶ່ງທີ່ສໍາຄັນ ໃນນະໂຍບາຍການຕ່າງ ປະເທດ ຂອງ ສປປ ລາວ. ຕະຫຼອດໄລຍະ 20 ປີ ຜ່ານມາ, ສປປ ລາວ ໄດ້ເຄື່ອນໄຫວວຽກງານອາຊຽນຢ່າງຕັ້ງຫນ້າ ໃນທຸກໆຂົງເຂດການຮ່ວມມືພາຍໃຕ້ 3 ເສົາຄໍ້າປະຊາຄົມ ອາຊຽນ, ລວມທັງການພົວພັນກັບພາຍນອກຂອງອາຊຽນ ແລະ ໄດ້ປະຕິບັດພັນທະຕ່າງໆຂອງຕົນ ອັນໄດ້ນໍາຜົນປະໂຫຍດມາສູ່ປະເທດຊາດ ແລະ ປະຊາຊົນລາວ. ອັນສໍາຄັນ ໃນໄລຍະຜ່ານມາ, ສປປ ລາວ ກໍໄດ້ສໍາເລັດການເປັນປະທານອາຊຽນ 2 ຄັ້ງ ຄື ຄັ້ງທີ 1 ໃນປີ 2004-2005, ພາຍໃຕ້ຄໍາຂວັນ “ເສີມສ້າງຄອບຄົວອາຊຽນ ໃຫ້ຫມັ້ນຄົງ ແລະ ຄ່ອງຕົວ ດ້ວຍຄວາມມະຫາສາມັກຄີ, ດ້ວຍການເຊື່ອມໂຍງດ້ານເສດຖະກິດ ແລະ ຄວາມກ້າວຫນ້າທາງສັງຄົມ”ແລະ ຄັ້ງທີ 2 ໃນປີ 2016 ທີ່ຫາກໍສໍາເລັດລົງ, ພາຍໃຕ້ຄໍາຂວັນ “ຫັນວິໄສທັດໃຫ້ເປັນຮູບປະທຳ ເພື່ອຄວາມເຂັ້ມແຂງ ຂອງປະຊາຄົມອາຊຽນ”. ໃນການເປັນປະທານອາຊຽນ ຄັ້ງທີ 2 ນີ້ ພວກເຮົາໄດ້ສໍາເລັດການສ້າງເອກະສານຫລາຍສະບັບ ອັນເປັນພື້ນຖານສໍາລັບ ການຮ່ວມມືພາຍໃນອາຊຽນ ພາຍໃຕ້ 3 ເສົາຄໍ້າ ແລະ ການຮ່ວມມື ລະຫວ່າງ ອາຊຽນ ກັບພາຍນອກ. ຜົນສໍາເລັດດັ່ງກ່າວໄດ້ສົ່ງເສີມຖານະບົດບາດຂອງ ສປປ ລາວ ໃນເວທີພາກພື້ນ ແລະ ສາກົນໃຫ້ສູງເດັ່ນຂຶ້ນ.
ໂດຍລວມແລ້ວ, ການເປັນສະມາຊິກອາຊຽນ ຕະຫຼອດໄລຍະສອງທົດສະວັດ ຜ່ານມາ ໄດ້ນຳຜົນປະໂຫຍດ ມາສູ່ ສປປ ລາວ ຫຼາຍດ້ານເຊັ່ນ:
1.) ຖານະບົດບາດຂອງ ສປປ ລາວ ໃນເວທີພາກພື້ນ ແລະ ສາກົນ ໄດ້ສູງເດັ່ນຂຶ້ນ;
2.) ພວກເຮົາ ໄດ້ປະກອບສ່ວນສ້າງສະພາບແວດລ້ອມພາກພື້ນແຫ່ງສັນຕິພາບ ແລະ ສະຖຽນລະພາບ ທີ່ອຳນວຍໃຫ້ແກ່ການພັດທະນາເສດຖະກິດ-ສັງຄົມ ຂອງ ສປປ ລາວ ພ້ອມທັງ ໄດ້ມີສ່ວນຮ່ວມ ອັນສຳຄັນ ໃນການກຳນົດຫຼັກການ ແລະ ສ້າງລະບຽບການອັນສຳຄັນຂອງອາຊຽນ;
3.) ຕະຫຼອດ 20 ປີ ແຫ່ງການເປັນສະມາຊິກອາຊຽນນີ້, ສປປ ລາວ ພວກເຮົາ ໄດ້ຮັບການສະໜັບສະໜູນຊ່ວຍເຫລືອຫລາຍດ້ານຈາກປະເທດສະມາຊິກອາຊຽນ, ຄູ່ເຈລະຈາ ແລະ ຄູ່ຮ່ວມພາຍນອກອື່ນໆ ໃນຂອບສອງຝ່າຍ ແລະ ຫລາຍຝ່າຍ ເພື່ອສົ່ງເສີມ ແລະ ຊຸກຍູ້ຄວາມພະຍາຍາມ ຂອງ ສປປ ລາວ ໃນການເຊື່ອມໂຍງເສດຖະກິດພາກພື້ນ ແລະ ສາກົນ ເຊັ່ນ: ອາຊຽນ ເປັນໜຶ່ງໃນປັດໄຈຊ່ວຍຊຸກຍູ້ ສປປ ລາວ ເຂົ້າອົງການການຄ້າໂລກ ໄດ້ສຳເລັດ;
4.) ພວກເຮົາ ໄດ້ກາຍເປັນສ່ວນຫນຶ່ງຂອງຕະຫລາດອາຊຽນ ທີ່ມີເສດຖະກິດໃຫຍ່ອັນດັບ 6 ຂອງໂລກ ຊຶ່ງໄດ້ເປີດໂອກາດໃຫ້ແກ່ ສປປ ລາວ ສາມາດເຂົ້າເຖິງຕະຫຼາດສາກົນ ຫຼາຍຂຶ້ນ ໂດຍຜ່ານເຂດການຄ້າເສລີ ລະຫວ່າງ ອາຊຽນ ກັບແຕ່ລະຄູ່ເຈລະຈາ ແລະ ເຂດການຄ້າເສລີໃນຂອບການເປັນຄູ່ຮ່ວມເສດຖະກິດແບບຮອບດ້ານລະດັບພາກພື້ນ (RCEP) ຊຶ່ງຄາດວ່າຈະສຳເລັດໃນໄວໆນີ້;
5.) ພວກເຮົາ ໄດ້ປັບປຸງນິຕິກຳ ແລະ ລະບຽບພາຍໃນຂອງຕົນ ຊຶ່ງໄດ້ອຳນວຍຄວາມສະດວກເຮັດໃຫ້ບໍລິມາດການຄ້າ ແລະ ການລົງທຶນ ໃນ ສປປ ລາວ ເພີ່ມຂຶ້ນ;
6.) ການໄປມາຫາສູ່ກັນ ຂອງປະຊາຊົນ ມີຄວາມສະດວກຫຼາຍຂຶ້ນ ເຮັດໃຫ້ນັກທ່ອງທ່ຽວ ເຂົ້າມາ ສປປ ລາວ ເປັນຈຳນວນຫຼວງຫຼາຍ;
7.) ວັດທະນະທຳ-ຮີດຄອງປະເພນີອັນດີງາມທີ່ເປັນເອກະລັກຂອງ ລາວ ໄດ້ຮັບການສົ່ງເສີມ ແລະ ເປັນທີ່ຮັບຮູ້ຂອງວົງຄະນາຍາດສາກົນ; ແລະ
8.) ການເຂົ້າຮ່ວມວຽກງານອາຊຽນ ເປັນການສ້າງຊັບພະຍາກອນມະນຸດໃຫ້ມີຄວາມສາມາດ ໄດ້ມາດຕະຖານພາກພື້ນ ແລະ ສາກົນ ເທື່ອລະກ້າວ.
ຂ້າພະເຈົ້າ ຂໍຖືໂອກາດນີ້ສະແດງຄວາມຊົມເຊີຍ ມາຍັງບັນດາທ່ານ ກໍຄືບັນດາຂະແຫນງການ ທີ່ໄດ້ປະກອບສ່ວນຢ່າງຫ້າວຫັນ ເຂົ້າໃນການເຄື່ອນໄຫວວຽກງານອາຊຽນໃນໄລຍະຜ່ານມາ ລວມທັງ ສະແດງຄວາມຂອບໃຈ ມາຍັງພໍ່ແມ່ພີ່ນ້ອງປວງຊົນລາວ ທີ່ໄດ້ປະກອບສ່ວນຕໍ່ການເປັນເຈົ້າພາບຈັດກອງປະຊຸມອາຊຽນຕ່າງໆ ໂດຍສະເພາະ ກອງປະຊຸມສຸດຍອດອາຊຽນ ຄັ້ງທີ 28 ແລະ 29 ແລະ ກອງປະຊຸມສຸດຍອດອື່ນໆທີ່ກ່ຽວຂ້ອງ ໃນເດືອນກັນຍາ 2016 ດ້ວຍຜົນສໍາເລັດຢ່າງຈົບງາມ.
ບັນດາທ່ານ, ບັນດາສະຫາຍ, ພໍ່ແມ່ພີ່ນ້ອງ ທີ່ຮັກແພງທັງຫຼາຍ!
ໃນການເປັນປະຊາຄົມອາຊຽນ ຊຶ່ງ ລາວເຮົາ ໄດ້ເປັນໜຶ່ງໃນສິບປະເທດນັ້ນ, ໃນຕໍ່ໜ້າ ພວກເຮົາ ຈະຕ້ອງໄດ້ເອົາໃຈໃສ່ຢ່າງຕັ້ງໜ້າ ເພື່ອເປັນສະມາຊິກທີ່ດີ, ມີຄວາມເຂັ້ມແຂງ ໄປຄຽງຄູ່ກັບປະເທດສະມາຊິກໃນປະຊາຄົມເຊັ່ນ:
1.) ສົ່ງເສີມຄວາມຮັບຮູ້ຂອງປະຊາຊົນ ກ່ຽວກັບ ປະຊາຄົມອາຊຽນ;
2.) ປັບປຸງກົນໄກການປະສານງານພາຍໃນຂອງພວກເຮົາ ລະຫວ່າງ ຂະແຫນງການດ້ວຍກັນ ແລະ ລະຫວ່າງ ສູນກາງ ກັບ ທ້ອງຖິ່ນໃຫ້ວ່ອງໄວ ແລະ ທັນການ;
3.) ສົ່ງເສີມການຜະລິດເປັນສິນຄ້າ ແລະ ການບໍລິການທີ່ຕິດພັນກັບທ່າແຮງຂອງ ສປປ ລາວ ໃຫ້ສາມາດແຂ່ງຂັນໃນຕະຫລາດອາຊຽນ ແລະ ນອກອາຊຽນ ໂດຍສະເພາະໃນປະເທດຄູ່ເຈລະຈາ;
4.) ປັບປຸງນິຕິກຳແລະລະບຽບການຕ່າງໆສຳລັບການສ້າງຕັ້ງ ແລະດຳເນີນທຸລະກິດ ເພື່ອໃຫ້ພາກທຸລະກິດປັບປຸງຕົນເອງ ແລະເພີ່ມຄວາມສາມາດໃນການແຂ່ງຂັນໃຫ້ນັບມື້ນັບສູງຂຶ້ນ; ແລະ
5.) ສ້າງບຸກຄະລາກອນທັງສູນກາງ ແລະ ທ້ອງຖິ່ນທີ່ເຂົ້າຮ່ວມເຄື່ອນໄຫວການເຊື່ອມໂຍງເສດຖະກິດພາກພື້ນ ແລະ ສາກົນ.
ພໍ່ແມ່ພີ່ນ້ອງ ທີ່ເຄົາລົບທັງຫຼາຍ!
ປີນີ້ພາຍໃຕ້ການເປັນປະທານອາຊຽນ ຂອງ ຟິລິບປິນ ໂດຍມີຄໍາຂວັນ “ຮ່ວມມືເພື່ອການປ່ຽນແປງ, ຜູກພັນກັບສາກົນ”, ພວກເຮົາ ຈະຮ່ວມກັນສະເຫຼີມສະຫຼອງຄົບຮອບ 50 ປີ ຂອງອາຊຽນຢ່າງມີຄວາມໝາຍ ເພື່ອຢືນຢັນຢ່າງຫນັກແຫນ້ນວ່າ ອາຊຽນ ເປັນອົງການຈັດຕັ້ງພາກພື້ນ ລະຫວ່າງ ລັດຖະບານ ທີ່ມີບົດບາດສໍາຄັນ (relevance) ແລະ ມີຜົນສໍາເລັດ ທີ່ຫລາຍພາກພື້ນ ແລະ ສາກົນ ຮັບຮູ້ ແລະ ອາຊຽນ ຈະສືບຕໍ່ກ້າວໄປຂ້າງໜ້າຢ່າງໜັກແໜ້ນ ໂດຍສືບຕໍ່ຮັດແໜ້ນປະຊາຄົມອາຊຽນ ດ້ວຍການຈັດຕັ້ງປະຕິບັດວິໄສທັດປະຊາຄົມອາຊຽນ 2025 ກໍຄື ແຜນແມ່ບົດສາມເສົາຄໍ້າປະຊາຄົມອາຊຽນ, ແຜນແມ່ບົດ ວ່າດ້ວຍ ການເຊື່ອມຈອດອາຊຽນ 2025, ແລະ ແຜນງານສໍາລັບຂໍ້ລິເລີ່ມເພື່ອການເຊື່ອມໂຍງອາຊຽນ ສະບັບທີ 3 ຢ່າງມີປະສິດທິພາບ ເພື່ອປະກອບສ່ວນເຂົ້າໃນ ການປົກປັກຮັກສາ ແລະ ສົ່ງເສີມສັນຕິພາບ, ສະຖຽນລະພາບ ແລະ ຄວາມວັດທະນາຖາວອນໃນພາກພື້ນ ແລະ ໃນໂລກ.
ສະນັ້ນ, ໃນໂອກາດ ອັນສະຫງ່າລາສີນີ້, ຂ້າພະເຈົ້າ ຂໍເຊີນຊວນ ບັນດາທ່ານ, ບັນດາສະຫາຍ ແລະ ພໍ່ແມ່ພີ່ນ້ອງ ປວງຊົນລາວ ທັງຊາດ ຈົ່ງພ້ອມກັນສະເຫລີມສະຫລອງ ຄົບຮອບ 50 ປີ ແຫ່ງການສ້າງຕັ້ງອາຊຽນ ແລະ ຄົບຮອບ 20 ປີ ທີ່ ສປປ ລາວ ເຂົ້າເປັນສະມາຊິກອາຊຽນ ຢ່າງເບີກບານມ່ວນຊື່ນ ແລະ ເຕັມໄປດ້ວຍຄວາມທະນົງໃຈ.
ສຸດທ້າຍນີ້, ຂ້າພະເຈົ້າ ຂໍອວຍພອນໄຊອັນປະເສີດ ມາຍັງບັນດາຜູ້ນໍາ ພັກ-ລັດ, ພະນັກງານ, ທະຫານ, ຕໍາຫລວດ, ນັກທຸລະກິດ, ພໍ່ຄ້າຊາວຂາຍ ແລະ ປວງຊົນລາວ ທຸກຖ້ວນຫນ້າ ທັງຢູ່ ພາຍໃນ ແລະ ຕ່າງປະເທດ ກໍຄື ຊາວຕ່າງປະເທດ ທີ່ເຮັດວຽກ ແລະ ດໍາລົງຊີວິດ ຢູ່ ສປປ ລາວ ຈົ່ງມີສຸຂະພາບເຂັ້ມແຂງ, ມີຄວາມສຸກກາຍສະບາຍໃຈ, ປະສົບຜົນສໍາເລັດໃນຫນ້າທີ່ການງານທຸກປະການ ເພື່ອປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ຂອງ ສປປ ລາວ ເຮົາ ກໍຄື ການຮັດແຫນ້ນປະຊາຄົມອາຊຽນ ໃຫ້ກ້າວຂຶ້ນຢ່າງບໍ່ຢຸດຢັ້ງ.
ຂໍຂອບໃຈ.