ກະຊວງການຕ່າງປະເທດ ແຫ່ງ ສປປ ລາວ ແລະ ກະຊວງການຕ່າງປະເທດ ສ. ເກົາຫລີີ ໄດ້ເປັນປະທານຮ່ວມກອງປະຊຸມເວທີປຶກສາຫາລື ອາຊີຕາເວັນອອກ ຄັ້ງທີ 16 ໃນວັນທີ 29-30 ສິງຫາ 2018 ທີ່ແຂວງຫລວງພະບາງ ພາຍໃຕ້ຫົວຂໍ້: “ສົ່ງເສີມການພັດທະນາແບບຍືນຍົງ ແລະ ຄວາມສົມບູນພູນສຸກຢູ່ອາຊີຕາເວັນອອກ” ໂດຍການເຂົ້າຮ່ວມຂອງບັນດາຜູ້ແທນຂັ້ນສູງ ຂອງ 10 ປະເທດສະມາຊິກອາຊຽນ, ສປ. ຈີນ, ຍີ່ປຸ່ນ, ສ. ເກົາຫລີ ແລະ ກອງເລຂາອາຊຽນ.
ໃນພິທີີເປີດກອງປະຊຸມ, ທ່ານ ບົວທອງ ແພງສະຫວັນ, ຮອງເລຂາພັກແຂວງ, ປະທານກວດກາພັກ, ຫົວໜ້າອົງການກວດກາລັດແຂວງຫລວງພະບາງ ໄດ້ຂື້້ນກ່າວຕ້ອນຮັບບັນດາຄະນະຜູ້ແທນ ສູ່ແຂວງຫລວງພະບາງ ແລະ ຫລັງຈາກນັ້ນ, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ກໍໄດ້ໃຫ້ກຽດກ່າວເປີດກອງປະຊຸມເວທີປຶກສາຫາລືດັ່ງກ່າວ. ໃນນີ້, ທ່ານ ລັດຖະມົນຕີ ສະເຫລີໄຊ ກົມມະສິດ ໄດ້ຍົກໃຫ້ເຫັນເຖິງບົດບາດຄວາມສຳຄັນ ແລະ ຜົນສຳເລັດອັນພົ້ນເດັ່ນ ພາຍໃຕ້ກົນໄກການຮ່ວມມືອາຊຽນບວກສາມນັບແຕ່ໄດ້ຮັບການສ້າງຕັ້ງໃນປີ 1997 ເປັນຕົ້ນມາ ເປັນຕົ້ນແມ່ນ ດ້ານການເງິນ, ການສຶກສາ, ສາທາລະນະສຸກ, ການເຊື່ອມຈອດ, ພະລັງງານ ແລະ ການຄໍ້າປະກັນຄວາມໝັ້ນຄົງທາງສະບຽງອາຫານ. ຄຽງຄູ່ກັນນັ້ນ, ທ່ານຍັງໄດ້ຍົກໃຫ້ເຫັນເຖິງສິ່ງທ້າທາຍຕ່າງໆທີ່ເປັນອຸປະສັກຕໍ່ການເຊື່ອມໂຍງ ແລະ ການເຕີບໃຫຍ່ຂະຫຍາຍຕົວຂອງພາກພື້ນເຊັ່ນ: ຄວາມແຕກໂຕນທາງດ້ານການພັດທະນາລະຫວ່າງບັນດາປະເທດພາຍໃນພາກພື້ນ, ຄວາມບໍ່ໝັ້ນທ່ຽງຂອງສະພາບເສດຖະກິດໂລກ, ທ່າອ່ຽງການປົກປ້ອງຕະຫຼາດພາຍໃນ ແລະການຕ້ານຍຸກໂລກາພິວັດ, ສິ່ງທ້າທາຍຕ່າງໆທີ່ເກີດຈາກການປະຕິວັດອຸດສາຫະກຳຄັ້ງທີ 4, ໄພພິບັດທໍາມະຊາດ ແລະ ການປ່ຽນແປງສະພາບດິນຟ້າອາກາດ. ບົນຈິດໃຈດັ່ງກ່າວ, ທ່ານລັດຖະມົນຕີ ໄດ້ຊຸກຍູ້ໃຫ້ບັນດາຜູ້ແທນເຂົ້າຮ່ວມກອງປະຊຸມ ລະດົມຄວາມຄິດ, ປຶກສາຫາລື ແລະ ສ້າງຂໍ້ສະເຫນີແນະ ແນໃສ່ຮັບມືກັບບັນຫາສິ່ງທ້າທາຍເຫລົ່ານີ້ ເພື່ອຮັບປະກັນໃຫ້ແກ່ການເຊື່ອມໂຍງພາກພື້ນ ກໍຄື ການພັດທະນາແບບຍືນຍົງ ແລະ ກ້າວໄປສູ່ການສ້າງປະຊາຄົມອາຊີຕາເວັນອອກ ໃນໄລຍະຍາວໂດຍຜ່ານກົນໄກອາຊຽນບວກສາມທີ່ເປັນກົນໄກຫຼັກ ແລະ ມີອາຊຽນເປັນກຳລັງຂັບເຄື່ອນ.
ກອງປະຊຸມເວທີປຶກສາຫາລືອາຊີຕາເວັນອອກ ຄັ້ງທີ 16 ພາຍໃຕ້ການເປັນປະທານຮ່ວມຂອງ ທ່ານ ລັດສະໜີ ແກ້ວມະນີ, ທູດປະຈຳກະຊວງການຕ່າງປະເທດ ແລະ ທ່ານ Yoon Soon-gu, ຮອງລັດຖະມົນຕີກະຊວງການຕ່າງປະເທດ ສ. ເກົາຫລີ ໄດ້ສຸມໃສ່ການປຶກສາຫາລື 3 ຫົວຂໍ້ຫຼັກຄື: ເພີ່ມທະວີການເຊື່ອມໂຍງພາກພື້ນ ແລະຮັດແຄບຄວາມແຕກໂຕນດ້ານການພັດທະນາ, ສົ່ງເສີມການເປັນຜູ້ປະກອບການ ແລະ ການພັດທະນາຊັບພະຍາກອນມະນຸດ, ແລະ ຮັດແໜ້ນການຮ່ວມມືເພື່ອການພັດທະນາໃນພາກພື້ນທີ່ຂັບເຄື່ອນໂດຍນະວັດຕະກຳ. ກອງປະຊຸມຈະນໍາສະເຫນີ ຜົນຂອງກອງປະຊຸມ, ໂດຍສະເພາະບັນດາຂໍ້ສະເຫນີຕ່າງໆຕໍ່ກອງປະຊຸມເຈົ້າໜ້າທີ່ອາວຸໂສອາຊຽນບວກສາມ ແລະ ກອງປະຊຸມສຸດຍອດອາຊຽນບວກສາມ ໃນທ້າຍປີນີ້ ທີ່ ສິງກະໂປ ເພື່ອພິຈາລະນາ.