ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ, ທັງເປັນຫົວໜ້າເຈົ້າໜ້າທີ່ອາວຸໂສອາຊຽນຂອງ ສປປ ລາວ, ໄດ້ນໍາພາຄະນະຜູ້ແທນລາວ ເຂົ້າຮ່ວມເວທີປຶກສາຫາລືອາຊຽນ-ອົດສະຕຣາລີ ຄັ້ງທີ 29, ເຊິ່ງໄດ້ຈັດຂຶ້ນໃນວັນທີ 09-10 ມີນາ 2017, ທີ່ ເນປິດໍ, ມຽນມາ, ພາຍໃຕ້ການເປັນປະທານຮ່ວມຂອງ ມຽນມາ ແລະ ອົດສະຕຣາລີ.
ກອງປະຊຸມ ໄດ້ທົບທວນຄືນຄວາມຄືບໜ້າຂອງການຮ່ວມມື ອາຊຽນ-ອົດສະຕຣາລີ ໃນໄລຍະນຶ່ງປີທີ່ຜ່ານມາ, ກວມເອົາຂົງເຂດການເມືອງ-ຄວາມໝັ້ນຄົງ, ເສດຖະກິດ, ວັດທະນະທໍາ-ສັງຄົມ ເປັນຕົ້ນແມ່ນການຕ້ານການກໍ່ການຮ້າຍ ແລະ ອາຊະຍາກຳຂ້າມຊາດ, ການຄຸ້ມຄອງໄພພິບັດ, ການຄ້າແລະການລົງທຶນ, ການເຊື່ອມຈອດ, ການສຶກສາ, ສາທາລະນະສຸກ, ການໄປມາຫາສູ່ລະຫວ່າງປະຊາຊົນ ແລະ ອື່ນໆ. ກອງປະຊຸມ ໄດ້ຕີລາຄາສູງຕໍ່ຜົນສໍາເລັດຂອງກອງປະຊຸມສຸດຍອດ ອາຊຽນ-ອົດສະຕຣາລີ ຈັດຂຶ້ນທຸກໆສອງປີ, ຄັ້ງທີ 1 ຈັດຂຶ້ນ ໃນວັນທີ 7 ກັນຍາ 2016, ທີ່ ນະຄອນຫຼວງວຽງຈັນ, ສປປ ລາວ, ເຊິ່ງເປັນບາດລ້ຽວອັນສໍາຄັນ ໃນການເສີມຂະຫຍາຍສາຍພົວພັນ ແລະ ການຮ່ວມມື ອາຊຽນ-ອົດສະຕຣາລີ ໃນຕໍ່ໜ້າ. ນອກນັ້ນ, ກອງປະຊຸມ ກໍໄດ້ປຶກສາຫາລືການກະກຽມໃຫ້ແກ່ກອງປະຊຸມລັດຖະມົນຕີຕ່າງປະເທດ ອາຊຽນ-ອົດສະຕຣາລີ ທີ່ຈະຈັດຂຶ້ນໃນເດືອນສິງຫາ 2017 ຢູ່ ຟີລິບປິນ ແລະ ກອງປະຊຸມສຸດຍອດອາຊຽນ-ອົດສະຕຣາລີ ສະໄໝພິເສດ, ຊຶ່ງຈະຈັດຂຶ້ນໃນເດືອນມີນາ ປີ 2018 ທີ່ ອົດສະຕຣາລີ. ກອງປະຊຸມ ຍັງໄດ້ແລກປ່ຽນຄໍາຄິດເຫັນ ກ່ຽວກັບ ບັນຫາພາກພື້ນ ແລະ ສາກົນ ທີ່ມີຄວາມສົນໃຈຮ່ວມກັນ.