ໃນໂອກາດຂໍ່ານັບຮັບຕ້ອນວັນກຳມະກອນສາກົນ ທີ່ໄດ້ໝູນວຽນມາບັນຈົບຄົບຮອບ 131 ປີ ( 1/5/1886-1/5/2017 ), ໃນວັນທີ 10 ພຶດສະພາ 2017, ທີ່ ກະຊວງການຕ່າງປະເທດ ໄດ້ຈັດພິທີປາຖະກະຖາຫວນຄືນມູນເຊື້ອວັນສ້າງຕັ້ງວັນກຳມະກອນສາກົນຂຶ້ນ ພາຍໃຕ້ການເປັນປະທານຂອງ ທ່ານ ແສງເພັດ ຮຸ່ງບຸນຍວງ, ຮອງເລຂາຄະນະພັກກະຊວງການຕ່າງປະເທດ, ຮອງລັດຖະມົນຕີກະຊວງການຕ່າງປະເທດ, ໂດຍມີບັນດາການນຳ, ຄະນະກົມ, ຄະນະພະແນກ, ສະມາຊິກກຳມະບານ ແລະ ພະນັກງານອ້ອມຂ້າງກະຊວງການຕ່າງປະເທດ ເຂົ້າຮ່ວມຮັບຟັງຢ່າງພ້ອມພຽງ.

ໃນໂອກາດນີ້, ທ່ານ ແສງເພັດ ຮຸ່ງບຸນຍວງ ໄດ້ຍົກໃຫ້ເຫັນມູນເຊື້ອປະຫວັດຄວາມເປັນມາຂອງວັນກຳມະກອນສາກົນ, ຜົນງານການເຄື່ອນໄຫວຂອງກະມຳກອນລາວ ໃນພາລະກິດປະຕິວັດປົກປ່ອຍຊາດ ກໍຄືການປົກປັກຮັກສາ ແລະ ສ້າງສາພັດທະນາປະເທດຊາດ. ໃນໄລຍະຜ່ານມາ, ຊົນຊັ້ນກຳມະກອນ ໄດ້ຜ່ານຂະບວນວິວັດແຫ່ງການຕໍ່ສູ້ກັບການກົດຂີ່ຂູດຮີດແຮງງານຂອງຊົນຊັ້ນນາຍທຶນ ຢ່າງໜັກໜ່ວງ ໂດຍໄດ້ບັງຄັບໃຫ້ກຳມະກອນເຮັດວຽກມື້ໜຶ່ງເຖິງ 14-15 ຊົ່ວໂມງ ໃນເງື່ອນໄຂການອອກແຮງງານສຸດທີ່ລຳບາກ ແລະ ມີຄວາມສ່ຽງສູງຕໍ່ຊີວິດ. ຈົນມາຮອດວັນທີ 01 ພຶດສະພາ 1886, ຊົນຊັ້ນກຳມະກອນ ແລະ ຊາວຜູ້ອອກແຮງງານໃນທົ່ວໂລກ ໄດ້ລຸກຂຶ້ນຕໍ່ສູ້ປະທ້ວງ ເພື່ອທວງໃຫ້ພວກນາຍທຶນ ຫຼຸດຊົ່ວໂມງເຮັດວຽກຂອງກຳມະກອນລົງ ໂດຍບໍ່ໃຫ້ເກີນ 8 ຊົ່ວໂມງຕໍ່ມື້ຄື: 8 ຊົ່ວໂມງ ເຮັດວຽກ, 8 ຊົ່ວໂມງພັກຜ່ອນ ແລະ 8 ຊົ່ວໂມງຮຳ່ຮຽນ ແລະ ບັງຄັບໃຫ້ພວກນາຍທຶນຮັບຮອງເອົາສິດທິດັ່ງກ່າວຂອງກຳມະກອນ ຈົນມາເຖິງປະຈຸບັນນີ້.

ທ່ານຮອງລັດຖະມົນຕີ ຍັງໄດ້ໃຫ້ທິດຊີ້ນຳຕໍ່ບັນດາພະນັກງານ-ລັດຖະກອນອ້ອມຂ້າງກະຊວງການຕ່າງປະເທດ ຈົ່ງເຊີດຊູມູນເຊື້ອອັນດີງາມຂອງວັນທີ 01 ພຶດສະພາ ວັນກຳມະກອນສາກົນ, ເສີມຂະຫຍາຍມູນເຊື້ອອັນຂະຫຍັນໝັ່ນພຽນຂອງຊາວຜູ້ອອກແຮງງານລາວ, ຂອງຊົນຊັ້ນກຳມະກອນລາວ ເຂົ້າໃນໜ້າທີ່ວຽກງານ ແລະ ຄວາມຮັບຜິດຊອບຂອງຕົນເອງໃຫ້ສູງຂຶ້ນ ເພື່ອສ້າງຄວາມເຂັ້ມແຂງໃຫ້ຕົນເອງ ກໍຄືປະເທດຊາດ ໃຫ້ຈະເລີນຮຸ່ງເຮືອງສີວິໄລ ຂຶ້ນເປັນກ້າວໆ.