​ໃນ​ວັນ​ທີ 26 ມັງກອນ 2021, ທ່ານ ທອງ​ຜ່ານ ສະ​ຫວັນ​ເພັດ, ຮອງ​ລັດ​ຖະ​ມົນ​ຕີ​ກະ​ຊວງ​ການ​ຕ່າງ​ປະ​ເທດ   ທັງ​ເປັນຫົວ​ໜ້າ​ເຈົ້າ​ໜ້າ​ທີ່​ອາ​ວຸ​ໂສອາ​ຊຽນຂອງ ສ​ປ​ປ ລ​າວ ໄດ້​ນ​ໍາ​ພາ​ຄະ​ນະ​ ເຂົ້າ​ຮ່ວມກອງ​ປະ​ຊຸມ​ເຈົ້າ​ໜ​້າ​ທີ່​ອາ​ວຸ​ໂສ ອາ​ຊຽນ-ຣັດ​ເຊຍ ຄັ້ງ​ທີ 17 ແບບທາງໄກ ພາຍ​ໃຕ້​ການ​ເປັນ​ປະ​ທານ​ຮ່ວມຂອງ​ ອິນ​ໂດ​ເນ​ເຊຍ ແລະ ຣັດ​ເຊຍ. ເຂົ້າຮ່ວມກອງປະຊຸມຄັ້ງນີ້ ຍັງມີບັນດາຫົວໜ້າເຈົ້າໜ້າທີ່ອາວຸໂສອາຊຽນ, ຮອງເລຂາທິການໃຫຍ່ອາຊຽນ ແລະ ວິຊາການຈໍານວນນື່ງ.

ກອງ​ປະ​ຊຸມໄດ້​ຕີລາຄາສູງ ຕໍ່ຜົນ​ການ​ຈັດ​ຕັ້ງ​ປະ​ຕິດ​ບັດ​ແຜນ​ປະ​ຕິ​ບັດງານ ອາ​ຊຽນ-ຣັດ​ເຊຍ ສຳ​ລັບ​ປີ 2016-2020 ໃນໄລຍະຜ່ານມາ, ເຊິ່ງກວມ​ເອົາ​ 3 ເສົາຄໍ້າການສ້າງປະຊາຄົມອາຊຽນ: ການ​ເມືອງ-ຄວາມ​ໝັ້ນ​ຄົງ, ເສດ​ຖະ​ກິດແລະວັດ​ທະ​ນະ​ທຳ-ສັງ​ຄົມ ລວມທັງ ການ​ຕ້ານ​ການ​ກໍ່​ການ​ຮ້າຍແລະອາ​ຊະ​ຍາ​ກຳ​ຂ້າມຊ​າ​ດ, ​ວິ​ທະ​ຍາ​ສາດແລະເຕັກ​ໂນ​ໂລ​ຊີ, ພະ​ລັງ​ງານ, ກະ​ສິ​ກຳ,ການ​ຄຸ້ມ​ຄອງ​ໄພ​ພິ​ບັດທຳ​ມະ​ຊາດ, ການ​ສຶກ​ສາ, ກ​ານ​ແລກ​ປ່ຽນ​ທາງວັດ​ທະ​ນາ​ທຳແລະການໄປ​ມາ​ຫາ​ສູ່ລະ​ຫວ່າງປະ​ຊາ​ຊົນ ກັບປະຊາຊົນ. ພ້ອມນີ້,​ ກອງປະຊຸມຍັງໄດ້ຮັບຊາບຄວາມຄືບໜ້າຂອງ ການຮ່າງແຜນ​ປະ​ຕິ​ບັດງານ ອາ​ຊຽນ-ຣັດ​ເຊຍສະບັບໃໝ່ ສໍາລັບໄລຍະ 2021-2025 ແລະ ມອບໃຫ້ຄະນະກໍາມະການຜູ້ຕາງໜ້າຖາວອນ ປະຈໍາອາຊຽນ ແລະ ທູດຣັດເຊຍ ປະຈໍາອາຊຽນ ເລັ່ງລັດປຶກສາຫາລື ໃຫ້ສໍາເລັດໂດຍໄວ. ສໍາລັບທິດທາງໃນຕໍ່ໜ້າ, ສອງຝ່າຍ ອາຊຽນ ແລະ ຣັດເຊຍ ຈະສືບຕໍ່ ເພີ່ມ​ທະ​ວີ​ການ​ຮ່ວມມື​ ໃນບາງຂະແໜງການບູລິມະສິດເປັນຕົ້ນ: ຂະແໜງສາທາລະນະສຸກ ໂດຍສະເພາະ ການຊ່ວຍເຫຼືອຢາວັກແຊັງໃຫ້ແກ່ອາຊຽນ, ເຊິ່ງໃນນີ້​, ສປປ ລາວ ໄດ້ສະແດງຄວາມຂອບໃຈຕໍ່ ຣັດເຊຍ ທີ່ໄດ້ໃຫ້ການຊ່ວຍເຫຼືອຢາວັກແຊັງ ຕ້ານໂຄວິດ-19 Spunik V ແກ່ ສປປ ລາວ; ການຕ້ານການກໍ່ການຮ້າຍ ແລະ ອາຊະຍາກໍາຂ້າມຊາດ; ການຮ່ວມມືດ້ານເສດຖະກິດ, ອຸດສາຫະກໍາ, ວິທະຍາສາດ ແລະ ເຕັກໂນໂລຊີ ລວມທັງ ການຟື້ນຟູເສດຖະກິດ ຫຼັງການແຜ່ລະບາດພະຍາດໂຄວິດ-19; ແລະ ການຮ່ວມມື ໃນການຮັບມືກັບໄພພິບັດ ແລະ ການໄປມາຫາສູ່ ລະຫວ່າງ ປະຊາຊົນ ກັບ ປະຊາຊົນ.

​ນອກຈາກນີ້, ກອງ​ປະ​ຊຸມ​​ໄດ້​ແລກ​ປ່ຽນ​ຄຳ​ຄິດ​​ເຫັນ ຕໍ່ບາງບັນ​ຫາເດັ່ນຢູ່​ພາກ​ພື້ນ ແລະ ສາ​ກົນທີ່​ມີ​ຄວາມ​ສົນ​ໃຈ​ຮ່ວມ​ກັນ ເຊັ່ນ​: ​ໂຄງ​ສ້າງ​ຄວາມ​ໝັ້ນ​ຄົງພາກ​ພື້ນ, ການ​ບໍ່​ແຜ່​ຜາຍອາ​ວຸດ​ນິວ​ເຄ​ລຍ, ການຜັນຂະຫຫຍາຍເອກະສານແນວຄວາມຄິດ ອາຊຽນ ວ່າດ້ວຍ ອິນໂດ-ປາຊີຟິກ ແລະ ສະ​ພາບ​ການ​ໃນ​ແຫຼມ​ເກົາຫຼີ. ພິເສດ, ກອງ​ປະ​ຊຸ​ມ​ຍັງ​ໄດ້​ປຶກສາຫາລື ກ່ຽວກັບ ການກະກຽມທັງທາງດ້ານເນື້ອໃນ ແລະ ພະລາທິການ ໃຫ້ແກ່ກ​ອງ​ປະ​ຊຸມ​ລັດ​ຖະ​ມົນ​ຕີ​ຕ່າງ​ປະ​ເທດ ​ອາ​ຊຽນ-ຣັດ​ເຊຍ ທີ່ຈະມີຂຶ້ນ ໃນຕົ້ນເດືອນສິງຫາ 2021 ພາຍໃຕ້ການເປັນປະທານຮ່ວມຂອງ ອິນໂດເນເຊຍ ແລະ ຣັດເຊຍ.

----------//----------