ໃນຕອນບ່າຍຂອງວັນທີ 23 ສິງຫາ 2022, ທີ່ ກະຊວງການຕ່າງປະເທດ ທ່ານ ໂພໄຊ ໄຂຄຳພິທູນ, ຮອງລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂ່ຳນັບ ຂອງ ທ່ານ ນາງ ອຸຣິຣັດ ຈະເລີນໂຕ, ຫົວໜ້າກົມຮ່ວມມືລະຫວ່າງປະເທດ (TICA), ກະຊວງການຕ່າງປະເທດໄທ ເນື່ອງໃນໂອກາດທີ່ໄດ້ເດີນທາງມາຢ້ຽມຢາມ ແລະ ເຂົ້າຮ່ວມກອງປະຊຸມການຮ່ວມມືທາງດ້ານວິຊາການລາວ-ໄທ ຄັ້ງທີ 24 ທີ່ ແຂວງຫຼວງພະບາງ.

ໃນໂອກາດດັ່ງກ່າວ ທ່ານຮອງລັດຖະມົນຕີ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍທ່ານ ນາງ ອຸຣິຣັດ ຈະເລີນໂຕ ທີ່ໄດ້ເອົາໃຈໃສ່ໃນການຊຸກຍູ້ການຮ່ວມມືທາງດ້ານວິຊາການ ນັບຕັ້ງແຕ່ຖືກແຕ່ງຕັ້ງເປັນອະທິບໍດີກົມຮ່ວມມືລະຫວ່າງປະເທດ ໃນປີ 2021 ເປັນຕົ້ນມາ, ຈົນສາມາດປະຕິບັດບັນດາໂຄງການຮ່ວມມືຕ່າງໆ ໄດ້ສໍາເລັດຫຼາຍໂຄງການ, ພ້ອມທັງຕີລາຄາສູງຕໍ່ສາຍການພົວພັນຮ່ວມມື, ມູນເຊື້ອຄວາມສາມັກຄີຮັກແພງ ລະຫວ່າງ ປະຊາຊົນ ສອງປະເທດ ຖານປະເທດເພື່ອນບ້ານໃກ້ເຮືອນຄຽງທີ່ມີມາແຕ່ດົນນານ, ເຊິ່ງປະຊາຊົນຂອງ 2 ຊາດ ມີການພົວພັນ, ໄປມາຫາສູ່ ແລະ ຄ້າຂາຍນໍາກັນເປັນປົກກະຕິ ເຮັດໃຫ້ການພົວພັນຮ່ວມມືໄດ້ຮັບການເສີມຂະຫຍາຍຍິ່ງໆຂຶ້ນ. ພ້ອມດຽວກັນນັ້ນ, ທ່ານຮອງລັດຖະມົນຕີ ໂພໄຊ ໄຂຄຳພິທູນ ຍັງໄດ້ສະແດງຄວາມຂອບໃຈ ຕໍ່ລັດຖະບານຣາຊະອານາຈັກໄທ ເເລະ ກົມຮ່ວມມືລະຫວ່າງປະເທດ (TICA), ທີ່ໄດ້ໃຫ້ການຊ່ວຍເຫຼືອ ສປປ ລາວຕະຫຼອດມາ ໂດຍສະເພາະນັບຕັ້ງແຕ່ການສ້າງກົນໄກການຮ່ວມມືທາງດ້ານວິຊາການ ປີ 1992 ເປັນຕົ້ນມາ ເປັນຕົ້ນເເມ່ນດ້ານການສຶກສາ, ການພັດທະນາຊັບພະຍາກອນ, ສາທາລະນະສຸກ ແລະ ກະສິກໍາ. ມາຮອດປະຈຸບັນ ໄດ້ຂະຫຍາຍອອກກວມເອົາ 7 ຂົງເຂດເເລ້ວ. ພ້ອມທັງໄດ້ອວຍພອນໃຫ້ທ່ານ ນາງ ອຸຣິຣັດ ຈະເລີນໂຕ ພ້ອມດ້ວຍຄະນະ ທີ່ເດີນທາງມາຮ່ວມກອງປະຊຸມການຮ່ວມມືວິຊາການລາວ-ໄທ ຄັ້ງນີ້ປະສົບຜົນສໍາເລັດຢ່າງຈົບງາມ, ເພີ່ມພູມຄູນສ້າງສາຍພົວພັນມິດຕະພາບ ແລະ ການຮ່ວມມືລາວ-ໄທ ຈົ່ງແຕກດອກອອກຜົນຕະຫຼອດໄປ.

ໃນໂອກາດດຽວກັນນີ້, ທ່ານ ນາງ ອຸຣິຣັດ ຈະເລີນໂຕ ກໍໄດ້ສະແດງຄວາມຂອບໃຈຕໍ່ ທ່ານຮອງລັດຖະມົນຕີ, ທີ່ໄດ້ໃຫ້ກຽດຕ້ອນຮັບຢ່າງອົບອຸ່ນ ແລະ ໃຫ້ຄໍາໝັ້ນສັນຍາວ່າ ຈະພະຍາຍາມທັງທາງດ້ານເຫື່ອແຮງ ແລະ ສະຕິປັນຍາຂອງຕົນ ປະກອບສ່ວນເຂົ້າໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ລະຫວ່າງ ສອງປະເທດ ໃຫ້ນັບມື້ນັບຂະຫຍາຍຕົວຍິ່ງໆຂຶ້ນ.