ໃນຕອນເຊົ້າ ຂອງວັນທີ 15 ກັນຍາ 2022, ທີ່ ສະຖາບັນການຕ່າງປະເທດ ໄດ້ຈັດການປາຖະກະຖາ ໃນຫົວຂໍ້: “Russia-ASEAN: Regional Security Through Multilateral Cooperation ຫຼື ຣັດເຊຍ-ອາຊຽນ: ຄວາມໝັ້ນຄົງຢູ່ໃນພາກພື້ນ ຜ່ານຄວາມຮ່ວມມືຫຼາຍຝ່າຍ”, ໂດຍໄດ້ຮັບກຽດເປັນວິທະຍາກອນ ຂອງ ທ່ານທູດ Yuri Andreyvich Raikov, ອະດີດເອກອັກຄະລັດຖະທູດ ວິສາມັນ ຜູ້ມີອໍານາດເຕັມ ແຫ່ງ ສະຫະພັນ ຣັດເຊຍ ປະຈໍາ ສປປ ລາວ. ໃຫ້ກຽດເປັນປະທານເປີດພິທີປາຖະກະຖາ ໂດຍ ທ່ານ ທອງຜ່ານ ສະຫວັນເພັດ, ຮອງລັດຖະມົນຕີ ກະຊວງການຕ່າງປະເທດ. ເຂົ້າຮ່ວມຮັບຟັງການປາຖະກະຖາໃນຄັ້ງນີ້ ມີບັນດາພະນັກງານພາຍໃນກະຊວງການຕ່າງປະເທດ, ຄະນະພົວພັນຕ່າງປະເທດສູນກາງພັກ, ກະຊວງອ້ອມຂ້າງສູນກາງ ແລະ ມະຫາວິທະຍາ ໄລແຫ່ງຊາດລາວ ຫຼາຍກວ່າ 110 ທ່ານ.
ຈຸດປະສົງ ການຈັດປາຖະກະຖາຄັ້ງນີ້ແມ່ນ ເພື່ອ 1) ເປັນການເຫຼີມສະຫຼອງວັນສ້າງຕັ້ງສາຍພົວພັນການທູດ ລະ ຫວ່າງ ສປປລາວ ແລະ ສະຫະພັນ ຣັດເຊຍ ຄົບຮອບ 62 ປີ (07 ຕຸລາ 1960- 07 ຕຸລາ 2022); 2) ເປັນການຫວນຄືນການພົວພັນຮ່ວມມືສອງຝ່າຍ ໃນໄລຍະ 62 ປີຜ່ານມາ ແລະ ທິດທາງເພີ່ມທະວີຄວາມຮ່ວມມືໃນຕໍ່ໜ້າ ໃຫ້ເກີດດອກອອກຜົນຍິ່ງໆຂຶ້ນ; 3) ແລກປ່ຽນທັດສະນະ ກ່ຽວກັບ ສະພາບການເຄັ່ງຮ້ອນຢູ່ພາກພື້ນ ແລະ ສາກົນ 4) ໃຫ້ພະນັກງານການທູດ ຂອງກະຊວງການຕ່າງປະເທດ ແລະ ກະຊວງອ້ອມຂ້າງສູນກາງ ມີຄວາມຮັບຮູ້ ແລະ ເຂົ້າໃຈຕໍ່ການສະພາບການສາກົນ.
ໃນໂອກາດນີ້, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີ ກະຊວງການຕ່າງປະເທດ ໄດ້ຊີ້ໃຫ້ເຫັນເຖິງຄວາມໝາຍຄວາມສໍາຄັນຂອງການພົວພັນການທູດ ແລະ ການຮ່ວມມື ລະຫວ່າງ ລາວ ແລະ ຣັດເຊຍ ຕະຫຼອດໄລຍະ 62 ປີ, ອັນມີຄວາມໝາຍ, ມີຄວາມສໍາຄັນ ແລະ ມີຜົນສໍາເລັດອັນຍິ່ງໃຫຍ່ຈົບງາມຫຼາຍຢ່າງ, ເຊິ່ງມັນໄດ້ສະແດງເຖິງ ການພົວພັນຮ່ວມມືທີ່ດີຮ່ວມກັນຂອງສອງຝ່າຍ ລາວ-ຣັດເຊຍ ຕະຫຼອດມາ ແລະ ຈະສືບຕໍ່ພັດທະນາຂຶ້ນເລື້ອຍໆ. ເຖິງວ່າ, ໃນສະພາບການຂອງໂລກ ທີ່ມີການຜັນແປໄປຢ່າງໄວວາ, ແຕ່ການຮ່ວມມື ແລະ ຊ່ວຍເຫຼືອເຊິ່ງກັນແລະກັນ ຂອງສອງຊາດ ລາວ-ຣັດເຊຍ ຍັງຄົງແໜ້ນແຟ້ນ ແລະ ເຕັມໄປດ້ວຍຄວາມສາມັກຄີ ໄມຕີຈິດ-ມິດຕະພາບອັນດີງາມ ຮ່ວມກັນ ແລະ ສະເໝີຕົ້ນສະເໝີປາຍ ຢູ່ໃນເວທີພາກພື້ນ ແລະ ສາກົນ.
ຄຽງຄູ່ກັນນີ້, ທ່ານທູດ Yuri Andreyvich Raikov ກໍໄດ້ຕີລາຄາການພົວພັນສາກົນໃນຍຸກປັດຈຸບັນໂດຍສະເພາະແມ່ນການພົວພັນຂອງບັນດາປະເທດມະຫາອໍານາດ ເປັນຕົ້ນ: ສ. ອາເມຣິກາ, ສປ ຈີນ, ອີຢູ ແລະ ຣັດເຊຍ ເຊິ່ງກໍາລັງມີບົດບາດສໍາຄັນ ໃນເວທີຮ່ວມມືສອງຝ່າຍ ແລະ ຫຼາຍຝ່າຍ ໃນພາກພື້ນ ອາຊີ-ປາຊີຟິກ, ຕາເວັນອອກກາງ, ອາຟຣິກາ ແລະ ອື່ນໆ . ພິເສດ ທ່ານ ຍັງໄດ້ເນັ້ນຄືນເຖິງສາຍພົວພັນ ແລະ ມິດຕະພາບອັນດີງາມ ທີ່ສອງປະເທດ ລາວ-ຣັດເຊຍ ໄດ້ມີຮ່ວມກັນ ແລະ ຈະສືບຕໍ່ຮັກສາໄວ້ ໃຫ້ໝັ້ນຄົງທະນົງແກ່ນຕໍ່ໄປ.