ໃນໂອກາດສົ່ງທ້າຍປີເກົ່າ ພ.ສ 2565 ແລະ ຕ້ອນຮັບວັນຂຶ້ນປີໃໝ່ ພ.ສ 2566, ສະຖານກົງສູນໃຫ່ຍ ແຫ່ງ ສປປ ລາວ ປະຈໍາ ຂອນແກ່ນ, ຣາຊະອານາຈັກໄທ ໄດ້ຈັດພິທີສະເຫຼີມສະຫຼອງປີໃໝ່ລາວ​ ໃນວັນທີ 2 ເມສາ 2023,​ ໂດຍເປັນກຽດເຂົ້າຮ່ວມຂອງ ທ່ານ ຕີ່ງ ສຸກສັນ, ຮອງລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ, ຜູ້ວ່າຣາດຊະການຈັງຫວັດຂອນແກ່ນ, ຮອງຜູ້ວ່າຣາດສະການຈັງຫວັດໜອງຄາຍ, ເຈົ້າໜ້າທີ່ທີ່ກ່ຽວຂ້ອງທຸກພາກສ່ວນ, ພາກທຸລະກິດ ແລະ ພີ່ນ້ອງຊາວໄທ ໃຫ້ກຽດເຂົ້າຮ່ວມ.

ຈຸດປະສົງຂອງການຈັດງານດັ່ງກ່າວ ກໍ່ເພື່ອ ເປັນການສະເຫຼີມສະຫຼອງບຸນປີໃໝ່ລາວ ຫຼື ບຸນກຸດສົງການ ພສ 2566, ຊຶ່ງເປັນບຸນປະເພນີທີ່ມີຄວາມສໍາຄັນ ແລະ ປະຕິບັດມາແຕ່ບູຮານນະການ. ການຈັດງານຄັ້ງນີ້ ເປັນໂອກາດອັນດີໃຫ້ພີ່ນ້ອງຊາວລາວ ແລະ ໄທ ທີ່ເປັນປະເທດບ້ານໃກ້ເຮືອນຄຽງ, ຜູກພັນທາງດ້ານປະຫວັດສາດອັນຍາວນານ, ຮີດຄອງປະເພນີຄ້າຍຄືກັນ, ເພິ່ງພາອາໄສຊຶ່ງກັນ ແລະ ກັນ. ສະນັ້ນ, ທ່ານຮອງລັດຖະມົນຕີ ຈຶ່ງໄດ້ຢໍ້າຄືນເຖິງສາຍພົວພັນ ແລະ ການຮ່ວມມືລະຫວ່າງສອງປະເທດ ໂດຍສະເພາະ ແມ່ນການຍົກລະດັບການພົວພັນ ແລະ ຮ່ວມມື ລະຫວ່າງ ສອງປະເທດ ທີ່ເປັນຄູ່ຮ່ວມຍຸດທະສາດ ເພື່ອການຈະເລີນເຕີບໂຕ ແລະ ການພັດທະນາແບບຍືນຍົງ. ພ້ອມກັນນີ້, ໃນໂອກາດດັ່ງກ່າວ, ທ່ານ ສົມສັກ ວິໄລທອນ, ກົງສຸນໃຫຍ່ ແຫ່ງ ສປປ ລາວ ທີ່ ຂອນແກ່ນ ຍັງໄດ້ສະແດງຄວາມຂອບໃຈ ຕໍ່ທຸກພາກສ່ວນທີ່ກ່ຽວຂ້ອງ ຂອງ ສປປ ລາວ ແລະ ຣາຊະອານາຈັກໄທ ທີ່ໄດ້ໃຫ້ການຮ່ວມມື ແລະ ສະໜັບສະໜູນ ໃນການຈັດງານສະເຫຼີມສະຫຼອງບຸນປີໃໝ່ ຄັ້ງນີ້ດໍາເນີນໄປດ້ວຍບັນຍາກາດອັນມ່ວນຊື່ນ ແລະ ປະສົບຜົນສໍາເລັດຢ່າງຈົບງາມ.