ໃນ​ຕອນ​ບ່າຍ​ຂອງ​ວັນ​ທີ 20 ມິຖຸນາ 2023 ທີ່ ກະຊວງ​ການ​ຕ່າງປະ​ເທດ,​ ທ່ານ ໂພໄຊ ໄຂຄຳພິທູນ, ​ຮອງ​ລັດຖະມົນຕີ​ ກະຊວງ​ການ​ຕ່າງປະ​ເທດ ​ໄດ້​ຕ້ອນຮັບ​ການ​ເຂົ້າຢ້ຽມພົບປະ ​ຂອງ​ ທ່ານ ນາງ Jennifer R. Littlejohn), ຮັກສາການຜູ້ຊ່ວຍລັດຖະມົນຕີຕ່າງປະເທດ ຂອງ ສະຫະລັດອາເມລິກາ, ຜູ້ຊີ້ນຳວຽກງານດ້ານມະຫາສະໝຸດ ແລະ ສິ່ງແວດລ້ອມສາກົນ ພ້ອມດ້ວຍຄະນະ ໃນໂອກາດມາຢ້ຽມຢາມ ສປປ ລາວ.

ໃນ​ໂອກາດ​ດັ່ງກ່າວ, ທ່ານ ຮອງ​ລັດຖະມົນຕີ​ ກະຊວງ​ການ​ຕ່າງປະ​ເທດ​ ​ໄດ້​ສະ​ແດງ​ຄວາມ​ຍິນ​ດີ​ຕ້ອນຮັບ​ອັນ​ອົບ​ອຸ່ນ​ມາ​ຍັງ​ທ່ານ ນາງ Littlejohn ພ້ອມ​ທັງ​ສະ​ແດງ​ຄວາມ​ຂອບ​ໃຈ ​ແລະ ຕີ​ລາຄາ​ສູງ​ຕໍ່​ການ​ຮ່ວມ​ມື​ທີ່​ດີ ​ແລະ ການ​ຊ່ວຍ​ເຫຼືອ​ຂອງ ​ສະຫະລັດອາເມລິກາ ຕໍ່ ສປປ ລາວ ​ໃນ​ໄລຍະ​ທີ່​ຜ່ານ​ມາ.​ ໃນນັ້ນ, ທ່ານ ​ຮອງລັດຖະມົນຕີ ​ຍັງ​ໄດ້ສະແດງຄວາມເຊື່ອໝັັ້ນວ່າ ພາຍຫລັງການມາຢ້ຽມຢາມໃນຄັ້ງນີ້ ສະຫະລັດອາເມລິກາ ຈະສືບຕໍ່​ຮ່ວມ​ມື ​ແລະ ​ສືບຕໍ່​ໃຫ້ການຊ່ວຍເຫລືອ ສປປ ລາວ ​ໃນ​ການຈັດ​ຕັ້ງ​ປະຕິບັດ​​ແຜນພັດທະນາເສດຖະກິດ-ສັງຄົມແຫ່ງຊາດ, ການຫລຸດພົ້ນຈາກສະຖານະພາບປະເທດດ້ອຍພັດທະນາ ແລະ ການປະກອບສ່ວນເຂົ້າໃນການບັນລຸເປົ້າໝາຍການພັດທະນາແບບຍືນຍົງ ໂດຍສະເພາະວຽກງານດ້ານສິ່ງແວດລ້ອມເຊັ່ນ: ການຫລຸດຜ່ອນມົນລະພິດທີ່ເກີດຈາກການນຳໃຊ້ປລາສຕິກ, ບັນຫາການປ່ຽນແປງຂອງສະພາບດິນຟ້າອາກາດ ເຊິ່ງເປັນໜຶ່ງໃນວຽກບູລິມະສິດ ຂອງ ສປປ ລາວ ກໍຄື ບັນຫາພົ້ນເດັ່ນຂອງສາກົນ ທີ່ ຈະຕ້ອງໄດ້ດຳເນີນການແກ້ໄຂຮ່ວມກັນ ຢ່າງຮີບດ່ວນ. ພ້ອມກັນນັ້ນ, ທ່ານ ຮອງລັດຖະມົນຕີ ກໍໄດ້ຊົມເຊີຍຕໍ່ການພົວພັນຮ່ວມມືສອງຝ່າຍ ທີ່ມີທວງທ່າຂະຫຍາຍຕົວ ທຽບຈາກການຮ່ວມມືໃນໄລຍະຜ່ານມາ ທີ່ມີພຽງດ້ານວຽກງານການສຳຫລວດ ແລະ ຂຸດຄົ້ນສິ່ງເສດເຫລືອ ຂອງທະຫານອາເມລິກາ ທີ່ ຫາຍສາບສູນໃນປາງສົງຄາມຢູ່ ສປປ ລາວ (Mission in Action - MIA), ແລະ ການຊ່ວຍເຫລືອລັດຖະບານ ສປປ ລາວ ໃນວຽກງານການເກັບກູ້ລະເບີດບໍ່ທັນແຕກທີ່ຍັງຄົງຄ້າງຢູ່ ໃນ ສປປ ລາວ (UXO).

ໃນໂອກາດ​ດຽວ​ກັນ​ນີ້,​ ທ່ານ ນາງ Littlejohn ກໍ່​ໄດ້​ສະ​ແດງ​ຄວາມ​ຂອບ​ໃຈ​ຕໍ່​ການ​ຕ້ອນຮັບ​ອົບ​ອຸ່ນ​ຂອງ ທ່ານ ໂພໄຊ ໄຂຄຳພິທູນ, ຮອງ​ລັດຖະມົນຕີ​ ກະຊວງ​ການ​ຕ່າງປະ​ເທດ ​ແລະ ສະ​ແດງ​ຄວາມ​ຂອບ​ໃຈ​ມາ​ຍັງ​ລັດຖະບານ ​ແຫ່ງ ສປປ ລາວ ກໍຄື ບັນດາການນຳຂອງແຕ່ລະກະຊວງທີ່ກ່ຽວຂ້ອງ ທີ່ຕ້ອນຮັບເປັນຢ່າງດີ. ທ່ານ​ຍັງ​ໄດ້​ໃຫ້​ຄຳ​ໝັ້ນ​ສັນຍາ​ວ່າ​ ສະຫະລັດອາເມລິກາ ຈະ​ສືບ​ຕໍ່​ຮ່ວມ​ມື​ກັບ​ລັດຖະບານ ສປປ ລາວ ​ໃນ​ການຈັດ​ຕັ້ງ​ປະຕິບັດ​ແຜນພັດທະນາຕ່າງໆ ໂດຍສະເພາະ ວຽກງານທາງດ້ານສິ່ງແວດລ້ອມ ທີ່ບູລິມະສິດຂອງສາກົນ ກໍຄື ສປປ ລາວ ​ໃຫ້​ໄດ້​ຮັບ​ໝາກຜົນທີ່​ດີ​ໃນ​ອະນາຄົດ.​