ໃນຕອນເຊົ້າຂອງວັນພະຫັດ, ວັນທີ 07 ກັນຍາ 2023, ທີ່ ກະຊວງການຕ່າງປະເທດ, ສະຫາຍ ຕິ່ງ ສຸກສັນ, ຮອງລັດຖະມົນຕີກະຊວງການຕ່າງປະເທດ ໄດ້ພົບປະ ແລະ ເຮັດວຽກກັບ ສະຫາຍ ນາງ ເລ ທິ ຖູ່ ຮັ່ງ, ຮອງລັດຖະມົນຕີກະຊວງການຕ່າງປະເທດ, ປະທານຄະນະກຳມະການແຫ່ງລັດເພື່ອຊາວຫວຽດນາມຢູ່ຕ່າງປະເທດ ແຫ່ງ ສສ. ຫວຽດນາມ.
ການພົບປະຄັ້ງນີ້, ສະຫາຍ ຕິ່ງ ສຸກສັນ, ຮອງລັດຖະມົນຕີກະຊວງການຕ່າງປະເທດ, ໄດ້ຕາງໜ້າໃຫ້ຄະນະພັກ-ຄະນະນຳກະຊວງສະແດງຄວາມປິຕິຍິນດີຕ້ອນຮັບ ສະຫາຍ ນາງ ເລ ທິ ຖູ່ ຮັ່ງ, ພ້ອມດ້ວຍຄະນະ ຢ່າງອົບອຸ່ນ, ຊຶ່ງສອງຝ່າຍໄດ້ພ້ອມກັນຕີລາຄາສູງຕໍ່ໝາກຜົນຂອງການຮ່ວມມື ລະຫວ່າງ ຄະນະກໍາມະການພົວພັນຄົນເຊື້ອຊາດລາວຢູ່ຕ່າງປະເທດ ແລະ ຄະນະກໍາມະການແຫ່ງລັດເພື່ອຊາວຫວຽດນາມຢູ່ຕ່າງປະເທດໃນໄລຍະຜ່ານມາຢ່າງກົງໄປກົງມາ. ໃນໂອກາດນີ້, ສອງຝ່າຍໄດ້ພ້ອມກັນປຶກສາຫາລື ແລະ ແລກປ່ຽນບົດຮຽນເຊິ່ງກັນ ແລະ ກັນ ຢ່າງເລິກເຊິ່ງ, ກ່ຽວກັບວຽກງານພົວພັນຄົນເຊື້ອຊາດລາວ-ຄົນເຊື້ອຊາດຫວຽດນາມຢູ່ຕ່າງປະເທດ ໂດຍສະເພາະແມ່ນບັນຫາສະພາບລວມຂອງຄົນເຊື້ອຊາດລາວ-ຄົນເຊື້ອຊາດຫວຽດນາມຢູ່ຕ່າງປະເທດ, ວຽກງານຂົນຂວາຍ-ຍາດແຍ່ງ, ວຽກງານໂຄສະນາເຜີຍແຜ່, ວຽກງານນິຕິກໍາ ແລະ ຂໍ້ສະເໜີຕ່າງໆ ທີ່ເປັນປະໂຫຍດສໍາຄັນຮ່ວມກັນທັງສອງຝ່າຍ.
ພ້ອມດຽວກັນນັ້ນ, ທັງສອງຝ່າຍຍັງໄດ້ປຶກສາຫາລື ແລະ ແລກປ່ຽນຄວາມຄິດເຫັນຮ່ວມກັນ ກ່ຽວກັບທິດທາງ ແລະ ແຜນການຮ່ວມມື ເພື່ອສືບຕໍ່ຊຸກຍູ້ສົ່ງເສີມການຈັດຕັ້ງປະຕິບັດບົດບັນທຶກຄວາມເຂົ້າໃຈ (MOU) ລະຫວ່າງ ຄະນະກໍາມະການພົວພັນຄົນເຊື້ອຊາດລາວຢູ່ຕ່າງປະເທດ ແລະ ຄະນະກໍາມະການແຫ່ງລັດເພື່ອຊາວຫວຽດນາມຢູ່ຕ່າງປະເທດ ໃຫ້ໄດ້ຮັບໝາກຜົນສູງຂຶ້ນກວ່າເກົ່າ. ນອກຈາກນັ້ນ, ຝ່າຍ ສສ ຫວຽດນາມ ຍັງໄດ້ແຈ້ງໃຫ້ຝ່າຍ ສປປ ລາວ ຊາບວ່າ: ຈະເຊື້ອເຊີນເອົາພະນັກງານກົມພົວພັນຄົນເຊື້ອຊາດລາວຢູ່ຕ່າງປະເທດ, ກະຊວງການຕ່າງປະເທດ ແຫ່ງ ສປປ ລາວ ໄປແລກປ່ຽນບົດຮຽນ ກ່ຽວກັບ ວຽກງານດັ່ງກ່າວນີ້ຢູ່ ສສ ຫວຽດນາມ ໃນຕົ້ນປີ 2024 ທີ່ຈະມາເຖິງນີ້.