ໃນ​ວັນ​ທີ 29 ມີນາ 2016, ​ເວລາ 10:00 ​ໂມງ ທີ່ ກະຊວງ​ການ​ຕ່າງປະ​ເທດ, ທ່ານ ອາລຸນແກ້ວ ກິດຕິຄຸນ, ລັດຖະມົນຕີຊ່ວຍວ່າການກະຊວງການຕ່າງປະເທດ ທັງ​ເປັນ​ຫົວໜ້າ​ເຈົ້າໜ້າທີ່​ອາວຸ​ໂສ​ອາຊຽນຂອງ ສປປ ລາວ ​ໄດ້ພົບປະກັບ ທ່ານ KimHyoung-zhin, ລັດຖະມົນຕີ​ຊ່ວຍ​ວ່າການ​ກະຊວງ​ການຕ່າງປະ​ເທດ, ຜູ້​ຮັບຜິດຊອບ​ວຽກງານ​ການ​ເມືອງ ທັງ​ເປັນ​ຫົວໜ້າ​ເຈົ້າໜ້າທີ່​ອາວຸ​ໂສຂອງ ສ. ​ເກົາຫຼີ ໃນໂອກາດທີ່​ທ່ານ​ເດີນທາງ​ມາ​ຢ້ຽມຢາມ​ ສປປ ລາວ ​​ແຕ່​ວັນ​ທີ 28-30 ມີນາ 2016.

​ໃນ​ການ​ພົບ​ປະຄັ້ງນີ້, ສອງ​ຝ່າຍ​ໄດ້​ປຶກສາ​ຫາລື ​ແລະ ແລກປ່ຽນຄຳ​ຄິດ​ຄຳ​ເຫັນ ກ່ຽວກັບ​ການ​ພົວພັນ ແລະ ຮ່ວມ​ມືລະຫວ່າງ ອາຊຽນ ​ແລະ ສ. ​ເກົາຫຼີ, ​ ເຊິ່ງສອງ​ຝ່າ​ຍ​ຕ່າງ​ກໍ​​ໄດ້ສະ​ແດງ​ຄວາມ​ເພິ່ງ​ພໍ​ໃຈ​ຕໍ່ໝາກຜົນ​ຂອງ​ການ​ຮ່ວມ​ມື​ ອາຊຽນ-ສ. ​ເກົາຫຼີ ​ຕະລອດ​ໄລຍະທີ່​​ຜ່ານ​ມາ ​ໂດຍ​ສະ​ເພາະ​ແມ່ນ​ດ້ານ​ການ​ຄ້າ, ການ​ລົງທຶນ ​ແລ​ະ ການ​ໄປມາຫາສູ່​ກັນ​ລະຫວ່າງ​ປະຊາຊົນ​. ທ່ານ KimHyoung-zhin ​ໄດ້​ຢໍ້າຄືນ​ຄວາມໝາຍໝັ້ນຂອງ ສ. ​ເກົາຫຼີ ​ໃນ​ການສືບຕໍ່ໃຫ້ການສະໜັບສະໜູນ​ອາຊຽນໂດຍ​ຜ່ານ​ການສະໜັ​ບສະໜູນການຈັດຕັ້ງປະຕິບັດ​ວິ​ໄສ​ທັດ​ປະຊາ​ຄົມ​ອາຊຽນ 2025​, ການຮັດ​ແຄບ​ຄວາມ​ແຕກ​ໂຕນ​ດ້ານ​ການ​ພັດ ທະນາ ​ແລະ ການ​ເຊື່ອມ​ຈອດ​​ໃນ​ພາກພື້ນ. ​ ​ພ້ອມກັນນັ້ນ, ສ. ເກົາຫຼີ ຍັງໄດ້ໃຫ້ການສະໜັບສະໜູນ ບັນ ດາບູລິມະສິດ ໃນການ​ເປັນ​ປະທານ​ອາຊຽນຂອງ ສປປ ລາວ ​ໃນ​ປີ 2016 ແລະ ເຫັນ​ດີ​ເຮັດ​ວຽກຮ່ວມ​ກັນຢ່າງ​ໃກ້ຊິດ ພາຍ​ໃຕ້​ການ​ເປັນ​ປະທານ​ອາຊຽນ ຂອງ ສປປ ລາວ ​ເພື່ອ​ຈັດຕັ້ງປະຕິບັດ​ບັນດາ​ຂໍ້​ຕົກລົງ​ຂອງ​ຜູ້ນຳ ​ແລະ ກິດຈະກຳ​ຮ່ວມ​ຕ່າງໆ​ໃນ​ແຜນ​ປະຕິ​ບັດ​ງານ ອາຊຽນ-ສ. ​ເກົາຫຼີ 2016-2020 ​ໃຫ້​​ເກີດ​ດອກ​ອອກ​ຜົ​ນຢ່າງ​ເປັນ​ຮູບ​ປະ​ທຳ.

ນອກ​ນັ້ນ, ສ. ​ເກົາຫຼີ ຍັງ​ຈະ​ສືບຕໍ່​ໃຫ້ການສະໜັບສະໜູນການ​ສ້າງ​ຂີດ​ຄວາມ​ສາມາດ​ໃນ​ດ້ານ​ຕ່າງໆ​ໃຫ້​ແກ່​ບັນດາ​ປະ​ເທດ​ລຸ່ມ​ແມ່ນ້ຳຂອງ ​ໂດຍ​ຜ່ານ​ຂອບການ​ຮ່ວມ​ມື​ແມ່ຂອງ-ສ. ​ເກົາຫຼີ. ສອງ​ຝ່າຍ​ຍັງ​ໄດ້​ແລກປ່ຽນຄຳ​ຄິດ​ຄຳ​ເຫັນ ກ່ຽວກັບ​ບັນຫາ​ພາກພື້ນ ​ແລະ ສາກົນ​ຕ່າງໆ​ ລວມທັງ​ບັນຫາ​ແຫຼມ​ເກົາຫຼີ.