ໃນວັນທີ 3 ກັນຍາ 2016, ໄດ້ຈັດມີກອງປະຊຸມຄະນະກຳມະການຜູ້ຕາງໜ້າຖາວອນ ປະຈຳອາຊຽນ ຄັ້ງທີ 14 ຂຶ້ນ ທີ່ນະຄອນຫລວງວຽງຈັນ, ເພື່ອເລັ່ງແກ້ໄຂບັນດາວຽກງານທີ່ຍັງຄົງຄ້າງພາຍໃຕ້ຄວາມຮັບຜິດຊອບຂອງຕົນ. ພິເສດ ໄດ້ສຸມໃສ່ການຮ່າງເອກະສານຜົນໄດ້ຮັບສຳລັບກອງປະຊຸມລະດັບເຈົ້າໜ້າທີ່ອາວຸໂສອາຊຽນ, ກອງປະຊຸມສະພາປະສານງານອາຊຽນ ຄັ້ງທີ 18, ກອງປະຊຸມສຸດຍອດອາຊຽນ ຄັ້ງທີ 28, 29 ແລະ ກອງປະຊຸມສຸດຍອດທີ່ກ່ຽວຂ້ອງອື່ນໆ ເຊິ່ງຈະຈັດຂຶ້ນໃນວັນທີ 6-8 ກັນຍານີ້.
ກອງປະຊຸມຄັ້ງນີ້, ພາຍໃຕ້ການເປັນປະທານຂອງ ທ່ານ ລັດສະໝີ ແກ້ວມະນີ, ເອກອັກຄະລັດຖະທູດຜູ້ຕາງໜ້າຖາວອນ ແຫ່ງ ສປປ ລາວ ປະຈຳອາຊຽນ, ມີຜູ້ຕາງໜ້າຖາວອນຈາກ 10 ປະເທດສະ ມາຊິກ, ຮອງເລຂາທິການໃຫຍ່ອາຊຽນ ຝ່າຍການເມືອງ-ຄວາມໝັ້ນຄົງ ແລະ ພະນັກງານການທູດທີ່ກ່ຽວຂ້ອງເຂົ້າຮ່ວມ. ກອງປະຊຸມຄະນະກຳມະການຜູ້ຕາງໜ້າຖາວອນ ປະຈຳອາຊຽນ ຄັ້ງທີ 14 ແມ່ນກົນໄກໜຶ່ງຂອງອາຊຽນ ເຊິ່ງມີພາລະບົດບາດຫລັກໃນການເປັນເສນາທິການໃຫ້ແກ່ກອງປະຊຸມລະດັບເຈົ້າໜ້າທີ່ອາວຸໂສ, ກອງປະຊຸມລະດັບລັດຖະມົນຕີ ແລະ ກອງປະຊຸມລະດັບສຸດຍອດ.