ວັນທີ 10 ສິງຫາ 2017, ສະຖານທູດລາວ ທີ່ໂຕກຽວ ນໍາໂດຍທ່ານທູດ ວິໂຣດ ສຸນດາຣາ ພ້ອມດ້ວຍພັນລະຍາ ແລະ ພະນັກງານ ໄດ້ຮ່ວມກັບສະຖານທູດຫວຽດນາມ ທີ່ໂຕກຽວ ນໍາໂດຍ ທ່ານທູດ Nguyen Quoc Cuong ພ້ອມດ້ວຍພັນລະຍາ ແລະ ພະນັກງານ ຈັດກິດຈະກໍາ ແລະ ພິທີສະເຫລີມສະຫລອງ 02 ວັນປະຫວັດສາດ ລາວ-ຫວຽດນາມ ຄື ວັນເຊັນສົນທິສັນຍາມິດຕະພາບ ແລະ ການຮ່ວມມື ຄົບຮອບ 40 ປີ (18 ກໍລະກົດ 1977 – 18 ກໍລະກົດ 2017) ແລະ ວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 55 ປີ (05 ກັນຍາ 1962 – 05 ກັນຍາ 2017) ທີ່ສໍານັກງານສະຖານທູດຫວຽດນາມ ທີ່ໂຕກຽວ.
ກິດຈະກໍາສະເຫລີມສະຫລອງດັ່ງກ່າວ ເລີ້ມຕົ້ນດ້ວຍການແຂ່ງຂັນກິລາສາມັກຄີ ຕີປິງປ໋ອງ ລະຫວ່າງສອງທີມນັກກິລາສະຖານທູດ ແລະ ຫລັງຈາກນັ້ນ ພະນັກງານສະຖານທູດທຸກຄົນ ໄດ້ເຂົ້າຮ່ວມພິທີສະເຫລີມສະຫລອງທາງການ. ໃນພິທີ, ທ່ານທູດລາວ ແລະ ຫວຽດນາມ ໄດ້ມອບດອກໄມ້ອວຍພອນເຊິ່ງກັນ ແລະ ກັນ ພ້ອມທັງຜັດປ່ຽນກັນຂຶ້ນກ່າວຄໍາເຫັນໃນໂອກາດສໍາຄັນດັ່ງກ່າວ. ທ່ານທູດຫວຽດນາມ ໄດ້ກ່າວເນັ້ນໜັກເຖິງມູນເຊື້ອການພົວພັນຮ່ວມມືສາມັກຄີແບບພິເສດຮອບດ້ານລະຫວ່າງ ລາວ ແລະ ຫວຽດນາມ ທີ່ຜູ້ນໍາຂອງສອງພັກ ແລະ ສອງລັດ ໄດ້ກໍ່ສ້າງ, ບໍາລຸງຮັກສາມາຈົນຮອດປະຈຸບັນ. ສາຍພົວພັນດັ່ງກ່າວໄດ້ຜ່ານການທົດສອບຢ່າງລະອິດລະອ້ຽວແຕ່ສະໄໝສົງຄາມຕໍ່ຕ້ານພວກຈັກກະພັດລ່າເມືອງຂຶ້ນທັງເກົ່າ ແລະ ໃໝ່ ທີ່ປະຊາຊົນສອງຊາດໄດ້ຍອມເສຍສະຫລະເພື່ອກັນ ແລະ ກັນ, ຮັກແພງ ແລະ ເຊື່ອໝັ້ນເຊິ່ງກັນ ແລະ ກັນ ຈົນສາມາດຍາດໄດ້ໄຊຊະນະ ແລະ ກາຍເປັນການພົວພັນທີ່ຫາຍາກໃນໂລກ, ດັ່ງທີ່ທ່ານເລຂາທິການໃຫຍ່ຂອງພັກຄອມມູນິດຫວຽດນາມ Nguyen Phu Trong ໄດ້ເຄີຍກ່າວໄວ້ວ່າ ສໍາລັບປະຊາຊົນຫວຽດນາມ ຍາມໃດກໍ່ຈົດຈໍາສະເໝີ ຍ້ອນມີການຊ່ວຍເຫລືອຂອງສະຫາຍລາວ ຈຶ່ງເຮັດໃຫ້ຫວຽດນາມສາມາດປົດປ່ອຍປະເທດຊາດ ແລະ ມີຜືນແຜ່ນດິນອັນຄົບຖ້ວນມາເຖິງປະຈຸບັນນີ້.
ຫລັງຈາກນັ້ນ, ທ່ານທູດ ວິໂຣດ ສຸນດາຣາ ໄດ້ຂຶ້ນກ່າວຄໍາເຫັນສະແດງຄວາມເຫັນດີເປັນເອກະພາບກັບທ່ານທູດຫວຽດນາມ ທີ່ໄດ້ກ່າວເຖິງປະຫວັດສາດການພົວພັນອັນເປັນມູນເຊື້ອມາແຕ່ດົນນານ, ຊຶ່ງສາຍພົວພັນຮ່ວມມືສອງປະເທດ ລາວ-ຫວຽດນາມ ໄດ້ຮັບການພັດທະນາ ແລະ ເສີມຂະຫຍາຍເຂົ້າສູ່ລວງເລິກ ແລະ ລວງກວ້າງ ໂດຍສອງປະເທດໄດ້ມີການພົວພັນກັນໃນທຸກລະດັບ, ທຸກຂົງເຂດວຽກງານຂະແໜງການ ນັບແຕ່ສູນກາງລົງຮອດທ້ອງຖິ່ນ. ການຈັດພິທີສະເຫລີມສະຫລອງ 02 ວັນປະຫວັດສາດ ລະຫວ່າງສອງປະເທດເວົ້າລວມ, ເວົ້າສະເພາະລະຫວ່າງສອງສະຖານທູດລາວ ແລະ ຫວຽດນາມ ຄັ້ງນີ້ ແມ່ນເພື່ອເປັນການສຶກສາອົບຮົມໃຫ້ແກ່ພະນັກງານນັກການທູດ ກໍ່ຄືຄົນລຸ້ນຫລັງ ໄດ້ຮັບຮູ້ ແລະ ເຂົ້າໃຈ ກ່ຽວກັບ ມູນເຊື້ອແຫ່ງສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງ ລາວ ແລະ ຫວຽດນາມ ເພື່ອໃຫ້ເຂົາເຈົ້າເປັນເຈົ້າການໃນການຖະນຸບໍາລຸງ, ເພີ້ມພູນຄູນສ້າງ ແລະ ສືບຕໍ່ເສີມຂະຫຍາຍມູນເຊື້ອອັນດີງາມດັ່ງກ່າວໃຫ້ຈະເລີນງອກງາມໃນສະພາບການ ແລະ ເງື່ອນໄຂໃໝ່ຂອງສອງປະເທດ ແລະ ສາກົນ. ສາຍພົວພັນຮ່ວມມື ລະຫວ່າງ ລາວ ແລະ ຫວຽດນາມ ຖືວ່າເປັນການພົວພັນທີ່ຫາຍາກທີ່ສຸດໃນໂລກ, ເຊິ່ງສາຍພົວພັນພິເສດດັ່ງກ່າວບໍ່ມີການປ່ຽນແປງເຖິງແມ່ນວ່າສະພາບການຂອງໂລກຈະຜັນປ່ຽນໄປແນວໃດກໍ່ຕາມ.
ພາຍຫລັງສຳເລັດພິທີທາງການ, ສອງທ່ານທູດ ລາວ-ຫວຽດນາມ ພ້ອມດ້ວຍພັນລະຍາ ແລະ ພະນັກງານຂອງສອງສະຖານທູດ ກໍໄດ້ຮ່ວມພາເຂົ້າສາມັກຄີ ໂດຍແຕ່ລະສະຖານທູດໄດ້ປຸງແຕ່ງອາຫານທີ່ເປັນເອກກະລັກຂອງຕົນໄປຮ່ວມສົມທົບກັນ. ຫລັງຈາກນັ້ນ, ແມ່ນລາຍການມ່ວນຊື່ນ ໂດຍມີການປະກອບສ່ວນສຽງເພງຈາກທ່ານທູດທັງສອງ ພ້ອມດ້ວຍພັນລະຍາ ແລະ ພະນັກງານສະຖານທູດ ລາວ ແລະ ຫວຽດນາມ, ແລະ ໄດ້ຮ່ວມກັນຟ້ອນລໍາວົງສາມັກຄີຢ່າງຟົດຟື້ນ ແລະ ເບີກບານມ່ວນຊື່ນ.
ການຈັດກິດຈະກໍາ ແລະ ພິທີສະເຫລີມສະຫລອງລະຫວ່າງສອງສະຖານທູດ ລາວ ແລະ ຫວຽດນາມດັ່ງກ່າວ ໄດ້ດຳເນີນໄປດ້ວຍບັນຍາກາດແຫ່ງໄມຕີຈິດມິດຕະພາບ, ຄວາມເຂົ້າອົກເຂົ້າໃຈແບບອ້າຍນ້ອງເພື່ອນມິດສະຫາຍ ລະຫວ່າງພະນັກງານຂອງສອງສະຖານທູດ ທີ່ເຕັມໄປດ້ວຍຄວາມເບີກບານມ່ວນຊື່ນ ແລະ ມີເນື້ອໃນຄວາມໝາຍເລິກເຊິ່ງ.