ໃນ​ຕອນ​ເຊົ້າ​ຂອງ​ວັນ​ທີ 12 ພະຈິກ 2017, ທີ່ ສະ​ຖາ​ນທູດລາວໃນນະຄອນຫຼວງມົດສະກູ, ພາຍຫລັງສິ້ນສຸດພິທີສະຫລຸບຜົນງານ ແລະ ເລືອກຕັ້ງຄະນະສະມາຄົມນັກສຶກສາລາວຊຸດໃໝ່ ປະຈຳ ນະຄອນຫຼວງມົດສະກູ, ທູດເຮົາໄດ້ພົບປະໂອ້ລົມບັນດານັກສຶກສາລາວທີ່ກຳລັງສຶກສາຮ່ຳຮຽນຢູ່ນະຄອນຫຼວງມົດສະກູ ເຊີ່ງມີນັກສຶກສາເຂົ້າຮ່ວມທັງໝົດ 47 ຄົນ.

ໃນການພົບປະໂອ້ລົມ ກ່ອນ​ອື່ນທູດໄດ້ສະແດງຄວາມ​ຍ້ອງຍໍ​ຊົມ​ເຊີຍ​ຕໍ່​ຜົນງານທີ່​ທາງຄະນະສະ​ມາຄົມນັກ ສຶກສາລາວຍາດ​ມາ​ໄດ້​ໃນ​​ໄລຍະ​ໜື່ງປີຜ່ານ​ມາ. ພ້ອມ​ນີ້, ທູດໄດ້ເນັ້ນໜັກໃຫ້ນັກສຶກສາທຸກຄົນຈົ່ງເອົາໃຈໃສ່ປະຕິບັດລະບຽບ ແລະ ກົດໝາຍຂອງປະເທດເຈົ້າພາບຢ່າງເຂັ້ມງວດ, ໂດຍສະເພາະລະບຽບຂອງໂຣງຮຽນວາງອອກ. ທູດຍັງ​ໄດ້​ຮຽກຮ້ອງ​ໃຫ້​ຜູ້​ທີ່​ໄດ້​ຮັບການ​ເລືອກຕັ້ງເປັນຄະນະສະມາຄົມນັກສຶກສາຊຸດໃໝ່​ຈົ່ງ​ເອົາ​ໃຈ​ໃສ່​ຍົກ​ສູງ​ຄວາມ​ຮັບຜິດຊອບຕໍ່ໜ້າທີ່​ວຽກງານ​ຂອງ​ຕົນ​ ກໍ່ຄືການນຳພາໝູ່ເພື່ອນນັກສຶກສາໃຫ້​ມີ​ຄວາມໜັກ​ແໜ້ນທາງ​ດ້ານ​ແນວ​ຄິດການເມືອງທີ່ຕິດພັນກັບການຮຽນຂອງນັກສຶກສາຢູ່ຣັດເຊຍ, ພ້ອມກັນເອົາໃຈໃສ່ສຶກສາຮໍ່າຮຽນ, ຫລິກລ້ຽງບັນຫາຢາເສບຕິດ ແລະ ໄພສັງຄົມ, ເພີ່ມທະວີຄວາມຮັກແພງສາມັກຄີຊ່ວຍເຫຼືອເຊິ່ງກັນ ແລະ ກັນ ແນ່ໃສຮຽນໃຫ້ເກັ່ງເສັງໃຫ້ໄດ້ຕາມຄວາມມຸ້ງຫວັງຂອງນັກສຶກສາທຸກຄົນ ກໍ່ຄືຄວາມມຸ້ງຫວັງຂອງພໍ່ແມ່ ເພື່ອນຳເອົາວິຊາຄວາມ​ຮູ້​ໃນດ້ານຕ່າງໆ ນຳໄປໃຊ້ໃນການພັດທະນາປະເທດຊາດຂອງຕົນ ໃນອານາຄົດ.​