ເພື່ອເປັນການສະເຫຼີມສະຫຼອງວັນສ້າງຕັ້ງ ພັກປະຊາຊົນ ປະຕິວັດລາວ ຄົບຮອບ 63 ປີ ແລະ ເປັນການຫວນຄືນມູນເຊື້ອວັນສຳຄັນຂອງພັກ ໃຫ້ພະນັກງານ - ສະມາຊິກພັກ ໄດ້ຮັບຮູ້ເຂົ້າໃຈຕື່ມນັ້ນ, ໃນວັນທີ 23 ມີນາ 2018, ໜ່ວຍພັກສະຖານກົງສູນໃຫຍ່ ແຫ່ງ ສປປ ລາວ ທີ່ ນະຄອນກວາງໂຈ, ສປ ຈີນ, ໄດ້ຈັດພິທີປາຖະກະຖາ ເລົ່າມູນເຊື້ອວັນສ້າງຕັ້ງພັກ ປະຊາຊົນ ປະຕິວັດລາວ ຄົບຮອບ 63 ປີ. ເປັນກຽດບັນຍາຍໂດຍ ສະຫາຍ ບຸນປັນ ກົງຍິນໄຊຍະແສງ, ເລຂາໜ່ວຍພັກ, ມີພະນັງານ - ສະມາຊິກສະຖານກົງສູນ, ການບິນລາວ ແລະ ສະມາຊິກພັກນັກສຶກສາ ເຂົ້າຮ່ວມຢ່າງພ້ອມພຽງ.
ໃນພິທີ ສະຫາຍ ເລຂາໜ່ວຍ ໄດ້ຍົກໃຫ້ເຫັນປະຫວັດຄວາມເປັນມາ, ຂະບວນວິວັດແຫ່ງການເຕີບໃຫຍ່ຂະຫຍາຍຕົວ ແລະ ມູນເຊື້ອອັນສະຫງ່າງາມໃນການຊີ້ນຳໆພາຂອງພັກແຕ່ລະໄລຍະ ນັບແຕ່ມື້ສ້າງຕັ້ງ ຈົນເຖິງປະຈຸບັນ, ໂດຍຜ່ານຂະບວນການຕໍ່ສູ້ອັນລະອິດລະອ້ຽວຍືດເຍື້ອຍາວນານ ນຳພາປະຊາຊົນລາວບັນດາເຜົ່າ ຕໍ່ສູ້ກູ້ຊາດຕ້ານຈັກກະພັດລ່າເມືອງຂື້ນ ທັງເກົ່າ ແລະ ໃໝ່ ຈົນສາມາດປົດປ່ອຍປະເທດຊາດຢ່າງສົມບູນ ແລະ ໄດ້ປະກາດສ້າງຕັ້ງ ສາທາລະນະລັດ ປະຊາທິປະໄຕ ປະຊາຊົນລາວຂື້ນຢ່າງເປັນທາງການ ໃນວັນທີ 2 ທັນວາ 1975 ແລະ ສືບຕໍ່ຊີ້ນຳ, ນໍາພາ ປະຊາຊົນລາວບັນດາເຜົ່າ ປະຕິບັດພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ຈະເລີນຮຸ່ງເຮືອງຕາມຈຸດໝາຍຂອງພັກ.