ໃນຕອນເຊົ້າຂອງ ວັນທີ 05 ກໍລະກົດ 2018ທີ່ສະຖານທູດລາວ ປະຈຳ ພຽງຢາງ, ສປປ. ເກົາຫລີ ໄດ້ຈັດພິທີມອບໃບຢັ້ງຢືນໜ່ວຍພັກແຂງເຂັ້ມແຂງ - ຮູ້ນຳພາຮອບດ້ານ ໂດຍໃຫ້ກຽດເປັນປະທານມອບ ຂອງສະຫາຍ ຕິ່ງ ສຸກສັນ, ຄະນະປະຈຳພັກກະຊວງ, ຫົວໜ້າກົມຈັດຕັ້ງ ແລະ ພະນັກງານ, ກະຊວງການຕ່າງປະເທດ. ມີບັນດາສະຫາຍຄະນະໜ່ວຍພັກ, ຄະນະນຳ, ສະມາຊິກພັກ, ພະນັກງານສະຖານທູດ ເຂົ້າຮ່ວມຢ່າງພ້ອມພຽງ.

ໃນພິທີດັ່ງກ່າວ ສະຫາຍ ພອນຄຳ ອິນທະບົວລີ, ເລຂາໜ່ວຍພັກ, ເອກອັກຄະລັດຖະທູດ ແຫ່ງ ສປປ ລາວ ປະຈຳ ພຽງຢາງ ໄດ້ຜ່ານບົດສະຫຼຸບລາຍງານການເມືອງຂອງໜ່ວຍພັກ ປະຈຳປີ 2017 ແລະ ທິດທາງແຜນການ ສົກປີ 2018, ເຊິ່ງຕະຫຼອດໄລຍະ 01 ປີຜ່ານມາ ໜ່ວຍພັກສະຖານທູດ ໄດ້ຈັດຕັ້ງຜັນຂະຫຍາຍເນື້ອໃນຈິດໃຈ ບັນດາມະຕິ, ຄຳສັ່ງ, ກົດລະບຽບ ແລະ ແຈ້ງການແນະນຳຕ່າງໆ ໃນການກໍ່ສ້າງໜ່ວຍພັກເຂັ້ມແຂງ - ຮູ້ນຳພາຮອບດ້ານ ແລະ ເຮັດໃຫ້ມີຜົນສຳເລັດໃນຫຼາຍດ້ານ ເຊິ່ງສະເເດງໃຫ້ເຫັນບັນດາສະຫາຍຄະນະໜ່ວຍພັກ, ສະມາຊິກພັກ, ພະນັກງານສະຖານທູດ ມີຄວາມໜັກ   ແໜ້ນ ແລະ ຮັກສາໄດ້ດ້ານຄຸນທາດການເມືອງ, ຄຸນສົມບັດສິນທຳປະຕິວັດ, ເຊື່ອໝັ້ນຕໍ່ແນວທາງນະໂບບາຍຂອງພັກ-ລັດ ແລະ ເປັນຫຼັກແຫຼ່ງໃນຂະບວນການວຽກງານຕົວຈິງ, ເຊິ່ງສາມາດຮັກສານາມມະຍົດເປັນໜ່ວຍພັກແຂງເອົາໄວ້ໄດ້.

ພ້ອມດຽວກັນນີ້, ໃນພິທີຍັງໄດ້ເຜີຍແຜ່ເຊື່ອມຊຶມເນື້ອໃນນິຕິກຳ ຈຳນວນ04 ສະບັບຄື: ຄຳສັ່ງ ວ່າດ້ວຍການເພີ່ມທະວີການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ສະບັບເລກທີ 01/ກມສພ ລົງວັນທີ 3/1/2018; ມະຕິ ວ່າດ້ວຍມາດຕະຖານຂອງພະນັກງານນຳພາ-ຄຸ້ມຄອງ ສະບັບເລກທີ 030/ກມສພ ລົງວັນທີ 3/1/2018; ມະຕິ ວ່າດ້ວຍການຄຸ້ມຄອງພະນັກງານ ສະບັບເລກທີ 031/ກມສພ ລົງວັນທີ 3/1/2018 ແລະ ມະຕິ ວ່າດ້ວຍວຽກງານສ້າງແຜນກຳນົດພະນັກງານນຳພາ - ຄຸ້ມຄອງ ສະບັບເລກທີ 032/ກມສພ ລົງວັນທີ 3/1/2018.

   ໃນໂອກາດນີ້, ສະຫາຍ ຕິ່ງ ສຸກສັນ ໄດ້ສະແດງຄວາມຍ້ອງຍໍຊົມເຊີຍມາຍັງ ຄະນະໜ່ວຍພັກ, ຄະນະນຳຂອງສະຖານທູດ ທີ່ໄດ້ເອົາໃຈໃສ່ເປັນເຈົ້າການຈັດຕັ້ງປະຕິບັດ ຜັນຂະຫຍາຍເນື້ອໃນຈິດໃຈ ມະຕິກອງປະຊຸມໃຫຍ່ ຄັ້ງທີ III ຂອງອົງຄະນະພັກກະຊວງການ ຕ່າງປະເທດ, ລວມທັງການຈັດຕັ້ງປະຕິບັດບັນດາ ຄຳສັ່ງ, ແຈ້ງການແນະນຳ, ກົດລະບຽບຕ່າງໆ ທີ່ຄະນະພັກກະຊວງວາງອອກ ແລະມີຜົນສຳເລັດຫຼາຍດ້ານ. ນອກຈາກນີ້, ຍັງໄດ້ເນັ້ນໜັກໃຫ້ໜ່ວຍພັກສະຖານທູດ ສືບຕໍ່ເພີ່ມທະວີເອົາໃຈໃສ່ຈັດຕັ້ງປະຕິບັດ ຕາມທິດຊີ້ນຳຂອງກົມການເມືອງສູນກາງພັກ ວ່າດ້ວຍການນຳພາວຽກງານການເມືອງແນວຄິດ, ນຳພາປະຕິບັດພາລະບົດບາດ, ສິດໜ້າທີ່ ແລະ ຄວາມຮັບຜິດຊອບຂອງໜ່ວຍພັກ, ອົງການ ຈັດຕັ້ງມະຫາຊົນ, ນຳພາວຽກງານກໍ່ສ້າງ-ປັບປຸງການຈັດຕັ້ງ ແລະ ວຽກງານຂະຫຍາຍພັກ ເພື່ອເຮັດໃຫ້ໜ່ວຍພັກ, ສະມາຊິກພັກ ເຊື່ອມຊຶມ, ກຳແໜ້ນ ແລະ ມີຄວາມຮັບຜິດຊອບເປັນເອກະພາບຕໍ່ ແນວທາງ, ແຜນນະໂຍບາຍ, ມະຕິ, ຄຳສັ່ງ, ກົດລະບຽບຂອງພັກ, ກົດໝາຍ ແລະ ລະບຽບຂອງລັດ, ຮຽນຮູ້ພື້ນຖານທິດສະດີມາກ-ເລນິນ, ແນວຄິດປະທານ ໄກສອນ ພົມວິຫານ, ນຳພາສຶກສາອົບຮົມພະນັກງານ ທີ່ຢູ່ໃນຄວາມຮັບຜິດຊອບຂອງໜ່ວຍພັກຕົນ ໃຫ້ກຳແໜ້ນແນວທາງ, ແຜນນະໂຍບາຍ, ມະຕິ, ຄຳສັ່ງ, ລະບຽບຂອງພັກ, ກົດໝາຍ, ລະບຽບການຕ່າງໆຂອງລັດ ແລະ ນຳພາຈັດຕັ້ງປະຕິບັດໃຫ້ຖືກຕ້ອງສອດຄ່ອງ ແລະ ມີຜົນສຳເລັດ, ສືບຕໍ່ເສີ່ມຂະຫາຍສາຍພົວພັນຮ່ວມມືແບບສອງຝ່າຍ, ຫຼາຍຝ່າຍ ໃຫ້ມີບາດກ້າວທ່າຂະຫຍາຍຕົວຢ່າງ ຕັ້ງໜ້າ ຕາມແນວທາງແຜນນະໂຍບາຍຂອງພັກ-ລັດເຮົາ ກຳນົດໄວ້, ກຳແໜ້ນຕໍ່ສະພາບການໃນເວທີພາກພື້ນ ແລະ ສາກົນ ຕາມ ສະພາບການເປັນຈິງຂອງໂລກໃນປະຈຸບັນ.