ໃນອາທິດຜ່ານມາ ສະຫາຍ ອາລຸນໄຊ ສູນນະລາດ, ກຳມະການສຳຮອງສູນກາງພັກ, ສະມາຊິກສະພາແຫ່ງຊາດຊຸດທີ VIII, ເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ ໄດ້ຢ້ຽມຢາມ ແລະ ເຮັດວຽກ ຢູ່ສະຖານທູດລາວ ທີ່ມົດສະກູ, ໃນໂອກາດດັ່ງກ່າວ ນອກຈາກພົບປະ ແລະ ເຮັດວຽກກັບ ຄະນະນຳ ສະຖານທູດແລ້ວ ສະຫາຍໄດ້ພົບປະໂອ້ລົມກັບນັກສຶກສາລາວ ທີ່ຮຽນຢູ່ນະຄອນຫຼວງມົດສະກູ.
ໃນເວລາໂອ້ລົມ ສະຫາຍ ໄດ້ຍົກໃຫ້ເຫັນເຖິງຄວາມໝາຍຄວາມສຳຄັນ ແລະ ໜ້າທີ່ຂອງນັກສຶກສາ, ໂດຍສະເພາະ ນັກສຶກສາລາວທີ່ມາຮຽນຢູ່ຕ່າງປະເທດແມ່ນເປັນຕົວແທນໃຫ້ 03 ສາມຢ່າງຄື : ເປັນຕົວແທນໃຫ້ແກ່ຄອບຄົວເຖິງແມ່ນວ່າຈະມາຈາກຄອບຄົວທີ່ຮັ່ງມີ ຫລື ທຸກຍາກ ຈາກຊົນຊັ້ນໃດກໍລ້ວນແຕ່ແມ່ນເປັນຕົວແທນໃຫ້ແກ່ປະເທດຊາດ ແລະ ເປັນຕົວແທນໃຫ້ແກ່ຊາວໜຸ່ມປະຊາຊົນປະຕິວັດລາວ ຊື່ງຊາວໜຸ່ມປຽບເໝືອນກະດູກສັນຫລັງຂອງຊາດ, ປຽບເໝືອນແຂນຂວາຂອງພັກ ແລະ ເປັນຜູ້ສືບທອດພາລະກິດການປະຕິວັດຂອງພັກເຮົາ. ຊາວໜຸ່ມມີບົດບາດໃນການປົກປັກຮັກສາ ແລະ ສ້າງສາປະເທດຊາດ. ສະນັ້ນ ໃນຖານະທີ່ຊາວໜຸ່ມເປັນແຂນຂວາຂອງພັກ, ເປັນກະດູກສັນຫລັງຂອງຊາດ, ຊາວໜຸ່ມຕ້ອງຮູ້ຈຸດໝາຍວ່າ ປະເທດກໍຄືພັກ ປະຊາຊົນ ປະຕິວັດລາວ ຈະນຳພາປະເທດໄປສູ່ເສັ້ນທາງສັງຄົມນິຍົມ ຊື່ງເປັນສັງຄົມທີ່ດີ, ມີການພັດທະນາຄົນ, ພັດທະນາສັງຄົມ ເລັ່ງໃສ່ຊົນນະບົດເປັນເຂດຈຸດສຸມໃນການພັດທະນາ, ໂດຍການພັດທະນາແບບຢືນຍົງ ຫລິກລ້ຽງການຫລິ້ນກິນຟູມເຟືອຍຂອງຊາວໜຸ່ມ. ສີ່ງທີ່ກ່າວມາທັງໝົດ ກ່ອນອຶ່ນໝົດຊາວໜຸ່ມເຮົາຕ້ອງມີຄວາມສາມັກຄີ, ມີຄວາມຮັກແພງຊື່ງກັນ ແລະ ກັນ, ມີການຝຶກຝົນຫຼໍ່ຫຼອມຕົນເອງ, ດຸໝັ່ນໃນການຄົ້ນຄວ້າຮໍ່າຮຽນ ບໍ່ວ່າຈະຢູ່ພາຍໃນໂຮງຮຽນ ຫລື ພາຍນອກ, ຮໍ່າຮຽນແບບແຜນດຳລົງຊີວິດ, ການສ້າງກິດຈະກຳນອກຫລັກສູດ ແລະ ການປະດິດສ້າງອື່ນໆທີ່ມີປະໂຫຍດໃຫ້ແກ່ສັງຄົມ ແລະ ປະເທດຊາດຂອງຕົນ.
ຕອນທ້າຍ ສະຫາຍໄດ້ຮຽກຮ້ອງໃຫ້ຊາວໜຸ່ມນັກສຶກສາ ເອົາໃຈໃສ່ຕັ້ງໜ້າຝຶກຝົນຫຼໍ່ຫຼອມຕົນເອງໃຫ້ມີຄວາມຮູ້ຄວາມສາມາດ ສົມກັບຄຳຂວັນທີ່ວ່າ ‘’ ບ່ອນໃດຍາກຊາວໜຸ່ມບຸກ, ບ່ອນໃດທຸກຊາວໜຸ່ມຜ່ານຜ່າ, ບ່ອນໃດຊາດຕ້ອງການຊາວໜຸ່ມຂານອາສາ.
ໃນໂອກາດນີ້, ສະຫາຍ ສີວຽງເພັດ ເພັດວໍຣະສັກ, ເອກອັກຄະລັດຖະທູດ ລາວ ປະຈຳ ສະຫະພັນ ຣັດເຊຍ ໄດ້ສະແດງຄວາມຂອບໃຈ ສະຫາຍ ອາລຸນໄຊ ສູນນະລາດທີ່ໄດ້ມີໂອກາດພົບປະໂອ້ລົມກັບນັກສຶກສາຂອງພວກເຮົາໃນຄັ້ງນີ້ ເຖິງແມ່ນເວລາຈະສັ້ນ ແຕ່ກໍເຕັມໄປດ້ວຍຄວາມໝາຍສຳຄັນ ແລະ ເລິກເຊີ່ງ ໂດຍສະເພາະ ຊາວໜຸ່ມນັກສຶກສາລາວພວກເຮົາທີ່ກຳລັງຮຽນຢູ່ໃນສະຖາບັນການສຶກສາຊັ້ນສູງຂອງຣັດເຊຍ. ເຂົ້າຮ່ວມຮັບຟັງການໂອ້ລົມໃນຄັ້ງນີ້ ມີຊາວໜຸ່ມສະຖານທູດ ແລະ ຊາວໜຸ່ມນັກສຶກສາເຂົ້າຮ່ວມທັງໝົດ 49 ຄົນ.