ວັນ​ທີ 19 ມີນາ 2021, ທີ່ ​ຫໍພິພິຕະພັນຕຳຫຼວດນະຄອນຫຼວງ​ຮ່າ​ໂນ້ຍ, ກະຊວງ​ຕຳຫຼວດ​ຫວຽດນາມ ​ໄດ້​ຈັດ​ງານ​ວາງສະ​ແດງ​ຮູບ​ພາບ ​ເນື່ອງ​ໃນ​ໂອກາດສະເຫຼີມສະຫຼອງ 60 ປີ ແຫ່ງວັນຊ່ຽວຊານປ້ອງກັນຄວາມສະຫງົບຫວຽດນາມ ປະຈໍາ ລາວ (ວັນທີ 22/03/1961-22/032021) ແລະ 60 ປີ ແຫ່ງວັນສ້າງຕັ້ງກໍາລັງປ້ອງກັນຄວາມສະຫງົບປະຊາຊົນລາວ (ວັນທີ 05/04/1961-05/04/2021), ​ເຂົ້າ​ຮ່ວມງານ​ວາງສະ​ແດງ​ມີ ສະຫາຍ ​ເລ ​ເຕີ່ນ ​ເຕີ້ຍ, ກໍາມະການສູນກາງພັກກອມມູນິດຫວຽດນາມ, ຮອງລັດຖະມົນຕີ​ກະຊວງ​ຕຳ​ຫຼວດຫວຽດນາມ ​ແລະ ສະຫາຍ ​ແສງ​ເພັດ ຮຸ່ງ​ບຸນ​ຍວງ, ເອກອັກຄະລັດຖະທູດວິສາມັນ​ ຜູ້​ມີ​ອຳນາດ​ເຕັມແຫ່ງ ສປປ ລາວ ປະຈຳ ສສ ຫວຽດນາມ​, ສະຫາຍ ບຸຍ ເຈື່ອງ ຢາງ, ຮອງຫົວໜ້າຄະນະໂຄສະນາສຶກສາ ສູນກາງພັກກອມມູນິດຫວຽດນາມ, ສະຫາຍ​ ຕາ ກວາງ ດົງ, ຮອງ​ລັດຖະມົນຕີກະຊວງວັດທະນະທຳ, ກິລາ ​ແລະ ທ່ອງທ່ຽວ ພ້ອມ​ດ້ວຍແຂກຖືກເຊີນຈາກບັນດາກະຊວງ, ອົງການຈັດຕັ້ງທຽບເທົ່າກະຊວງ, ກົມກອງ ​ແລະ ພະນັກງານ, ນັກ​ສຶກສາ​ລາວ ທີ່​ກຳລັງ​ສຶກສາ​ຢູ່​ໂຮງຮຽນ​ຕຳຫຼວດ​ ເຂົ້າ​ຮ່ວມ​ຢ່າງ​ພ້ອມພຽງ.

​       ກ່າວ​ເປີດ​ພິທີໂດຍ ສະຫາຍ ​ເລ ​ເຕີ່ນ ​ເຕີ້ຍ, ກໍາມະການສູນກາງພັກກອມມູນິດຫວຽດນາມ, ຮອງລັດຖະມົນຕີ​ກະຊວງ​ຕຳ​ຫຼວດຫວຽດນາມ ຊຶ່ງສະຫາຍໄດ້ຍົກໃຫ້ເຫັນເຖິງເນື້ອໃນ ແລະ ຄວາມໝາຍຄວາມສໍາຄັນຂອງການຈັດງານວາງສະແດງຮູບພາບໃນຄັ້ງນີ້ ລວມທັງຄວາມໝາຍຄວາມສໍາຄັນຂອງສອງວັນປະຫວັດສາດຂອງສອງຊາດ ກໍຄືຂອງສອງກໍາລັງ ຫວຽດນາມ-ລາວ ລາວ-ຫວຽດນາມ ທີ່ມີມູນເຊື້ອການພົວພັນມິດຕະພາບອັນ​ຍິ່ງ​ໃຫຍ່​, ຄວາມ​ສາມັກຄີ​ພິ​ເສດ ແລະ ການຮ່ວມມືຮອບດ້ານມາແຕ່ດົນນານ ແລະ ນັບມື້ໄດ້ຮັບການເພີ່ມພູນຄູນສ້າງໃຫ້ຂຽວສົດງົດງາມຂຶ້ນເລື້ອຍໆ.

       ພາຍຫຼັງທີ່ໄດ້ທ່ຽວຊົມບັນດາຮູບພາບການເຄື່ອນໄຫວຂອງສອງກໍາລັງຕໍາຫຼວດລາວ-ຫວຽດນາມ, ຫວຽດ ນາມ-ລາວ ທີ່ນໍາມາວາງສະແດງແລ້ວ ສະຫາຍ ແສງ​ເພັດ ຮຸ່ງ​ບຸນ​ຍວງ, ເອກອັກຄະລັດຖະທູດວິສາມັນ​ຜູ້​ມີ​ອຳນາດ​ເຕັມແຫ່ງ ສປປ ລາວ ປະຈຳ ສສ ຫວຽດນາມ ​ກໍໄດ້ສະແດງຄວາມຮູ້ສຶກຂອງຕົນ ແລະ ລົງ​ນາມ​ໃນ​ປື້​ມລະນຶກຄວາມຊົງຈໍາ​ວ່າ: “ຂ້າພະເຈົ້າ ຮູ້ສຶກພາກພູມໃຈເປັນຢ່າງຍິ່ງທີ່ໄດ້ມາຮ່ວມງານວາງສະແດງ “ໄມຕີຈິດມິດຕະພາບ​ຕຳຫຼວດ​ປະຊາຊົນ​ລາວ-​ຫວຽດນາມ” ຈັດໂດຍ ກະຊວງ​ຕຳຫຼວດ​ຫວຽດນາມ ຊຶ່ງຢູ່ໃນທ່າມກາງຜົນສຳເລັດອັນຍິ່ງໃຫຍ່ຂອງກຳລັງຕຳຫຼວດປະຊາຊົນຫວຽດນາມ-ລາວໃນພາລະກິດປະຕິວັດກໍຄືພາລະກິດປ່ຽນແປງໃໝ່ໃນການສ້າງສາ ແລະ ພັດທະນາປະເທດຫວຽດນາມ ແລະ ລາວ. ນີ້ແມ່ນກິດຈະກໍາທີ່ມີຄວາມໝາຍອັນເລິກເຊິ່ງ, ປະກອບສ່ວນເຂົ້າໃນການເພີ່ມທະວີຄວາມສາມັກຄີ, ການຮ່ວມມືມິດຕະພາບ ແລະ ມີປະສິດທິຜົນຂອງສອງກຳລັງຕຳຫຼວດປະຊາຊົນສອງປະເທດ ທັງເປັນການເພີ່ມພູນຄູນສ້າງສາຍພົວພັນມິດຕະພາບທີ່ເປັນມູນເຊື້ອອັນສະໜິດແໜ້ນຂອງສອງພັກ, ສອງລັດ, ສອງກໍາລັງ ແລະ ປະຊາຊົນສອງຊາດລາວ - ຫວຽດນາມ.  ຕາງໜ້າງໃຫ້ສະຖານທູດ ສປປ ລາວ ປະຈຳ ສສ ຫວຽດນາມ ແລະ ປະຊາຊົນລາວທີ່ກຳລັງດຳລົງຊີວິດ, ກຳລັງສຶກສາຮ່ຳຮຽນ ແລະ ເຮັດວຽກຢູ່ ສສ ຫວຽດນາມ, ຂ້າພະເຈົ້າຂໍສະແດງຄວາມຂອບໃຈ ມາຍັງບັນດາສະຫາຍຕຳຫຼວດປະຊາຊົນຫວຽດນາມທີ່ໄດ້ຈັດກິດຈະກຳສະເຫຼີມສະຫຼອງ 60 ປີ ແຫ່ງວັນຊ່ຽວຊານຕຳຫຼວດຫວຽດນາມຢູ່ລາວ (22/03/1961-22/032021) ແລະ 60 ປີ ແຫ່ງວັນສ້າງຕັ້ງກຳລັງປ້ອງກັນຄວາມສະຫງົບລາວ (05/04/1961-05/04/2021) ອວຍພອນໃຫ້ສາຍພົວພັນມິດຕະພາບອັນພິເສດລາວ-ຫວຽດນາມ ໃຫ້ນັບມື້ຈົ່ງຂຽວສົດງົດງາມ ແລະ ໝັ້ນຄົງທະນົງແກ່ນຕະຫຼອດກາລະນານ.

--------------------------------------------------------------