ໃນວັນທີ 18 ພຶດສະພາ 2021, ທີ່ ວັງແກຼມແລັງ, ນະຄອນຫລວງມົດສະກູ, ທ່ານ ນາງ ວິລາວັນ ເຍ່ຍປໍເຮີ ໄດ້ຍື່ນສານຕາຕັ້ງຕໍ່ ພະນະທ່ານ ວະລາດີເມຍ ປູຕິນ, ປະທານາທິບໍດີ ແຫ່ງ ສະຫະພັນ ຣັດເຊຍ, ເພື່ອດໍາລົງ ຕໍາແໜ່ງເປັນ ເອກອັກຄະລັດຖະທູດ ວິສາມັນຜູ້ມີອໍານາດເຕັມ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ຄົນໃຫມ່ ປະຈໍາ ສະຫະພັນ ຣັດເຊຍ.
ໃນພິທີດັ່ງກ່າວ ປະທານາທິບໍດີ ໄດ້ແຈ້ງວ່າບາງຂັ້ນຕອນຂອງການຍື່ນສານ ຈະບໍ່ເປັນໄປຕາມລະບຽບການຂອງພິທີການ ໝາຍວ່າ ແຕ່ລະທູດຈະບໍ່ໄດ້ຍື່ນໂດຍກົງຕໍ່ ປະທານາທິບໍດີ ຄືຜ່ານມາ ແລະ ຢືນຢູ່ຫ່າງຈາກປະທານາທິບໍດີ. ແຕ່ພິທີດັ່ງກ່າວນັບວ່າມີຄວາມໝາຍ ແລະ ຄວາມສຳຄັນເປັນພິເສດ. ເບື້ອງຕົ້ນ ປະທານາທິດບໍດີ ປູຕິນ ໄດ້ຮຽກຮ້ອງໃຫ້ 05 ປະເທດ ມະຫາອໍານາດ ແລະ ປະເທດອື່ນໆ ຮ່ວມມືກັນຕ້ານພະຍາດໂຄວິດ-19 ໃນທົ່ວໂລກ. ຣັດເຊຍ ຍັງໄດ້ຊ່ວຍເຫຼືອ 60 ກວ່າປະເທດໃນທົ່ວໂລກ ທາງດ້ານວັກຊິນຕ້ານໂຄວິດ-19, ທ່ານຍັງໄດ້ກ່າວເຖິງສະພາບການສາກົນທີ່ຍັງມີຄວາມສັບສົນ, ທັງໄພຂົ່ມຂູ່ຕໍ່ຄວາມປອດໄພຂອງປະຊາຄົມໂລກ. ນອກຈາກນັ້ນ, ປະທານາທິບໍດີ ປູຕີນ ຍັງໄດ້ກ່າວເຖິງນະໂຍບາຍຕ່າງໆປະເທດຂອງຣັດເຊຍ ຄື: ຣັດເຊຍ ເປີດກ້ວາງການພົວພັນກັບຕ່າງປະເທດ ບົນຫຼັກການຕ່າງຝ່າຍຕ່າງມີຜົນປະໂຫຍດ, ສັນຕິພາບ ແລະ ບໍ່ແຊກແຊງກິດຈະການພາຍໃນຂອງກັນ ແລະ ກັນ.
ປະທານາທິບໍດີ ປູຕີນ ໄດ້ຕີລາຄາການພົວພັນຮ່ວມມື ລະຫວ່າງ ຣັດເຊຍ ກັບ 23 ປະເທດ ທີ່ມາຍື່ນສານຄື: ບອສເນຍ ແລະ ເຮີເຊໂກວານາ, ຈໍແດນ, ໂມຊຳບິກ, ອິນໂດເນເຊຍ, ນາມີເບຍ, ສາທາລະນະລັດ ໂດມິນິກັນ, ສາທາລະນະລັດ ຈາດ, ໂມນດາວີ, ສວິດເຊີແລນ, ອັຟການິສະຖານ, ກິເນ-ບິດຊານ, ກາຕາ, ເຄັນຢາ, ກຽກກິດສະຖານ, ໂປໂລຍ, ໂຮນລັງ, ອາຟຼິກາໃຕ້, ໄທ, ອາກຊັງຕິນ, ລາວ, ຣູມານີ, ໂບລີເວຍ ແລະ ຈີເລ. ສະເພາະລາວເຮົາ ປະທານາທິບໍດີ ໄດ້ກ່າວເຖິງດ້ວຍເນື້ອໃນດີ, ຍາວ ແລະ ເດັ່ນ ຄື: ຣັດເຊຍ ມີຄວາມເພິ່ງພໍໃຈຕໍ່ການພົວພັນຮ່ວມມືກັບລາວ. ລາວເປັນປະເທດທີ່ຣັດເຊຍ ມີຄວາມໄວ້ເນື້ອເຊື່ອໃຈຢູ່ໃນອາຊີຕາເວັນອອກສຽງໃຕ້. ຣັດເຊຍ ຈະສືບຕໍ່ສະໜັບສະໜູນການພົວພັນຮ່ວມມືທາງດ້ານເສດຖະກິດ, ການຄ້າ ແລະ ດ້ານມະນຸດສະທໍາ; ຈະຮ່ວມມື ແລະ ຊ່ວຍເຫຼືອທາງດ້ານເຕັກນິກການທະຫານ ກໍ່ຄື ສ້າງບຸກຄະລາກອນ ລະຫວ່າງສອງກະຊວງປ້ອງກັນປະເທດ; ສືບຕໍ່ພົວພັນກັນຢ່າງໃກ້ຊິດໃນເວທີສາກົນ ກໍ່ຄື ອົງການສະຫະປະຊາຊາດ ທີ່ສອງຝ່າຍມີທັດສະນະຄ້າຍຄືກັນ.
ປະທານາທິບໍດີ ໄດ້ອວຍພອນໃຫ້ບັນດາເອກອັກຄະລັດຖະທູດ ທີ່ປະຕິບັດໜ້າທີ່ຢູ່ ຣັດເຊຍ ຈົ່ງປະສົບຜົນສຳເລັດ ແລະ ມີສຸຂະພາລະນາໄມ ພ້ອມທັງຫວັງວ່າ ບັນດາເອັກອັກຄະລັດຖະທູດ ຈະປະກອບສ່ວນເຮັດໃຫ້ສາຍພົວພັນມິດຕະພາບ ລະຫວ່າງ ຣັດເຊຍກັບປະເທດຂອງຕົນ ນັບມື້ນັບຮັດແໜ້ນຂຶ້ນເລື້ອຍໆ. ທັງເປັນໂອກາດໃຫ້ບັນດາເອກອັກຄະລັດຖະທູດ ໄດ້ທຳຄວາມຮູ້ຈັກກັບວັດທະນະທໍາອັນຫຼາກຫຼາຍ, ປະຫວັດສາດອັນຍາວນານ ແລະ ປະເພນີອັນດີງາມຂອງຣັດເຊຍ.