ໃນວັນທີ19ພຶດສະພາ2021 ທີ່ ສະຖານເອກອັກຄະລັດຖະທູດ ແຫ່ງ ສປປ ລາວ ປະຈຳ ສສ ຫວຽດນາມ, ມີຄະນະດັ່ງຕໍ່ໄປນີ້: ສະຫາຍ ເຈີ່ນ ວັນ ຕຸຍ ປະທານສະມາຄົມມິດຕະພາບ ຫວຽດນາມ-ລາວ ຂັ້ນສູນກາງ ພ້ອມດ້ວຍຄະນະໄດ້ນຳເອົາ ຜ້າອັດປາກການແພດຈຳນວນ 225.000 ອັນ ແລະ ເງິນສົດ ຈຳນວນ 605.550.000 ລ້ານດົ່ງ; ສະຫາຍ ເລ ກວາງ ຫວນ ຮອງຄະນະປະສານງານທົ່ວປະເທດອະດີດທະຫານອາສາສະໝັກ ແລະ ຊ່ຽວຊານການທະຫານຫວຽດນາມຊ່ວຍການປະຕິວັດລາວໄດ້ນຳເອົາຜ້າອັດປາກການແພດ ຈຳນວນ 750.000 ອັນ, ກ່ອນໜ້ານີ້ ວັນທີ 17/05/2021 ບໍລິສັດການຢາ AIKYA ຂອງຫວຽດນາມ ກໍໄດ້ນຳເອົາຜ້າອັດປາກການແພດ ຈຳນວນ 100.000 ອັນ ມາມອບໃຫ້ ສະຫາຍ ແສງເພັດ ຮຸ່ງບຸນຍວງ, ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈຳ ສສ ຫວຽດນາມ ເພື່ອສົ່ງຕໍ່ໃຫ້ ສປປ ລາວ ໂດຍການເຂົ້າຮ່ວມເປັນສັກຂີພິຍານຂອງຄະນະນຳສະຖານທູດລາວ ທີ່ຮ່າໂນ້ຍ ພ້ອມດ້ວຍພະນັກງານຂອງທັງສອງຝ່າຍ ລາວ-ຫວຽດນາມ.
ໃນໂອກາດນີ້, ແຕ່ລະຄະນະທີ່ນຳເອົາເຄື່ອງມາຊ່ວຍເຫຼືອ ກໍໄດ້ກ່າວສະແດງຄວາມເປັນຫ່ວງເປັນໄຍຕໍ່ການລະບາດ ພະຍາດໂຄວິດ-19 ຮອບໃໝ່ຢູ່ ສປປ ລາວ ຊຶ່ງຜ້າອັດປາກ ແລະ ເງິນສົດ ທີ່ນຳມາມອບໃນຄັ້ງນີ້ເປັນການປະກອບສ່ວນດ້ວຍຄວາມຈິງໃຈຈາກ ສະຫາຍຫວຽດນາມອ້າຍນ້ອງ ເພື່ອປະກອບສ່ວນຊ່ວຍເຫຼືອລັດຖະບານລາວ ກໍຄື ປະຊາຊົນລາວ ທັງຢູ່ໃນສູນກາງ ແລະ ທ້ອງຖິ່ນທີ່ກຳລັງປະສົບຄວາມຍຸ້ງຍາກຢູ່ໃນຄະນະນີ້ ເພື່ອເປັນການປ້ອງກັນ, ຄວບຄຸມ ແລະ ສະກັດກັ້ນການແຜ່ລະບາດຂອງເຊື້ອພະຍາດໂຄວິດ19 ທີ່ກຳລັງລະບາດຢູ່ລາວ ໃນປະຈຸບັນ. ຫວັງຢ່າງຍິ່ງວ່າລັດຖະບານ ແລະ ປະຊາຊົນລາວຈະພ້ອມກັນ ຄວບຄຸມ ແລະ ສະກັດກັ້ນການແຜ່ລະບາດພະຍາດດັ່ງກ່າວໄດ້ໂດຍໄວ ເພື່ອເຮັດໃຫ້ປະຊາຊົນລາວ ໄດ້ກັບມາໃຊ້ຊີວິດແບບປົກກະຕິ.
ສະຫາຍ ແສງເພັດ ຮຸ່ງບຸນຍວງ ກໍໄດ້ສະແດງຄວາມຮູ້ບຸນຄຸນ ແລະ ຂອບອົກຂອບໃຈຢ່າງຈິງໃຈມາຍັງ ບັນດາຄະນະທີ່ໄດ້ນຳເອົາເຄື່ອງຊ່ວຍເຫຼືອ ພ້ອມທັງເງິນສົດ ມາຊ່ວຍເຫຼືອໃນຄັ້ງນີ້ ຊຶ່ງເປັນການສະແດງເຖິງນ້ຳຈິດນ້ຳໃຈຂອງບັນດາກົມກອງ ເຊັ່ນ ສະມາຄົມມິດຕະພາບ ຫວຽດນາມ-ລາວ, ຄະນະປະສານງານທົ່ວປະເທດທະຫານອາສາສະໝັກ ແລະ ຊ່ຽວຊານການທະຫານຫວຽດນາມຊ່ວຍການປະຕິວັດລາວ ແລະ ບໍລິສັດການຢາ AIKYA ຂອງຫວຽດນາມ ເຖິງວ່າ ຢູ່ຫວຽດນາມ ກໍມີການລະບາດຂອງເຊື້ອພະຍາດໂຄວິດ 19 ຮອບໃໝ່ ກໍຕາມແຕ່ກໍໄດ້ບິແບ່ງຄວາມຫຍຸ້ງຍາກຂອງປະຊາຊົນລາວ ທີ່ກຳລັງປະເຊີນຢູ່ໃນປັດຈຸບັນ, ເປັນການປະກອບສ່ວນເຂົ້າໃນການເພີ່ມພູນຄູນສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ, ສອງກອງທັບ ແລະ ປະຊາຊົນສອງຊາດ ລາວ-ຫວຽດນາມ ພ້ອມທັງຢືນຢັນວ່າຈະປະສານໄປຍັງພາກສ່ວນທີ່ກ່ຽວຂ້ອງຂອງລາວ ເພື່ອມາຮັບເອົາເຄື່ອງຈຳນວນດັ່ງກ່າວສົ່ງຕໍ່ໃຫ້ເຖິງປະຊາຊົນລາວ ໄດ້ນຳໃຊ້ຢ່າງມີປະສິດທິຜົນໃນການຕ້ານ ແລະ ສະກັດກັ້ນການແຜ່ລະບາດຂອງພະຍາດໂຄວິດ 19 ໂດຍໄວ.