ໃນວັນທີ 18 ກັນຍາ 2021, ທ່ານ ຄໍາພັນ ອັ່ນລາວັນ, ເອກອັກຄະລັດຖະທູດວິສາມັນ ຜູ້ມີອໍານາດເຕັມ ແຫ່ງ ສປປ ລາວ ປະຈໍາ ປະເທດສະຫະລັດ ອາເມລິກາ ແລະ ການາດາ, ພ້ອມດ້ວຍ ທ່ານ ອານຸພາບ ວົງໜໍ່ແກ້ວ, ເອກອັກຄະລັດຖະທູດ, ຜູ້ຕາງໜ້າຖາວອນ ແຫ່ງ ສປປ ລາວ ປະຈໍາ ອົງການສະຫະປະຊາຊາດ ທີ່ ນິວຢອກ ແລະ ຄະນະ ໄດ້ເຄື່ອນໄຫວຈັດກິດຈະກໍາແຂ່ງຂັນກິລາ ພົບປະມິດຕະພາບຮ່ວມສອງສໍານັກງານ ແລະ ພີ່ນ້ອງເຊື້ອຊາດລາວ ຢູ່ ລັດເດີລາແວ, ໂດຍໄດ້ຮັບການຕ້ອນຮັບຢ່າງອົບອຸ່ນ ແລະ ອໍານວຍຄວາມສະດວກຈາກ ທ່ານ ສົມກຽດ ພຸດທະວົງສາ, ປະທານສະມາຄົມລາວ ລັດເດລາແວ, ທ່ານ ຄໍາຫຼ້າ ຄຸດສະຫວັນ, ເລຂາທິການສະມາຄົມ ແລະ ຜູ້ຕາງໜ້າເຜົ່າກືມມຸ ປະຈໍາ ລັດເດລາແວ ແລະ ຄະນະ ລວມທັງພີ່ນ້ອງເຊື້ອຊາດລາວ ທີ່ ລັດເດລາແວ ແລະ ລັດໃກ້ຄຽງ ຊຶ່ງມີຜູ້ເຂົ້າຮ່ວມ ປະມານ 60 ທ່ານ.

ໃນໂອກາດນີ້ ໄດ້ຈັດການແຂ່ງຂັນກິລາມິດຕະພາບ ປະເພດບານເຕະ, ບານສົ່ງ, ເປຕັງ ແລະ ກະຕໍ້ ລະຫວ່າງ ສາມພາກສ່ວນ ດ້ວຍບັນຍາກາດທີ່ຟົດຟື້ນ ແລະ ມ່ວນຊືນ ເຊິ່ງໄດ້ປະກອບສ່ວນອັນສໍາຄັນ ເຂົ້າໃນການຮັດແໜ້ນຄວາມສາມັກຄີ, ຮັກແພງ ລະຫວ່າງ ສອງສໍານັກງານ ກໍຄື ກັບພີ່ນ້ອງເຊື້ອຊາດລາວ ທີ່ ລັດເດລາແວ ໃຫ້ແໜ້ນແຟ້ນຍິ່ງຂຶ້ນ.

ໃນໂອກາດນີ້, ທັງສອງສໍານັກງານ ຍັງໄດ້ພົບປະໂອ້ລົມກັບປະທານສະມາຄົມຕ່າງໆ ພ້ອມດ້ວຍພີ່ນ້ອງເຊື້ອຊາດລາວທີ່ເຂົ້າຮ່ວມງານ ໂດຍໄດ້ແຈ້ງໃຫ້ຊາບ ກ່ຽວກັບ ສະພາບການພົ້ນເດັ່ນ ດ້ານການພັດທະນາເສດຖະກິດ-ສັງຄົມ ຢູ່ ສປປ ລາວ ລວມທັງສະພາບການລະບາດຂອງພະຍາດໂຄວິດ-19 ຢູ່ ສປປ ລາວ, ຜົນກະທົບຕ່າງໆ ແລະ ການແກ້ໄຂບັນຫາຕ່າງໆ ເປັນຕົ້ນແມ່ນການອອກມາດຕະການຈໍາກັດການເຂົ້າ-ອອກ ສປປ ລາວ ໃນແຕ່ລະໄລຍະ ຍົກເວັ້ນຜູ້ທີ່ມີຄວາມຈໍາເປັນແທ້ ເພື່ອປ້ອງກັນ, ຄວບຄຸມ ແລະ ສະກັດກັ້ນການລະບາດຂອງພະຍາດໂຄວິດ-19. ພ້ອມນີ້, ຍັງໄດ້ແຈ້ງ ແລະ ອະທິບາຍ ການສືບຕໍ່ໃຫ້ການບໍລິການ ກໍຄື ການປົກປ້ອງສິດຜົນປະໂຫຍດຂອງຄົນລາວຢູ່ຕ່າງປະເທດຂອງສະຖານທູດ ເຊິ່ງຄົນລາວ ແລະ ພີ່ນ້ອງເຊື້ອຊາດລາວໃຫ້ຄວາມສົນໃຈ ແລະ ຕິດຕໍ່ສອບຖາມສະຖານທູດຕະຫຼອດເວລາ ໂດຍສະເພາະການເດີນທາງຢ້ຽມຢາມລາວ ກໍຄື ການສະເໜີຂໍກັບລາວຢ່າງຖາວອນຂອງຫຼາຍໆທ່ານ. ຜ່ານການພົບປະແຂ່ງຂັນກິລາມິດຕະພາບໃນຄັງນີ້ ເຫັນວ່າ ບັນດາຜູ້ເຂົ້າຮ່ວມທັງໝົດ ໃຫ້ຄວາມສົນໃຈສູງ ແລະ ມີຄວາມປະທັບໃຈ ໃນການເຂົ້າຮ່ວມງານກິລາ, ພ້ອມທັງສະເໜີໃຫ້ມີການຈັດອີກຄັ້ງຕໍ່ໆໄປ ເພື່ອເປັນການຮັດແໜ້ນຄວາມສາມັກຄີຮັກແພງ ແລະ ສ້າງຄວາມໃກ້ຊິດເຊິ່ງກັນ ແລະ ກັນຕໍ່ໄປ.