ໃນວັນທີ 28 ກັນຍາ 2021 ທີ່ ສະຖານເອກອັກຄະລັດຖະທູດ ແຫ່ງ ສປປ ລາວ ປະຈຳ ຮົງກາຣີ ທີ່ມີສຳນັກງານຕັ້ງຢູ່ປະເທດ ໂອຕຣິດ ໂດຍປະຕິບັດຕາມການຊີ້ນຳຂອງຄະນະນຳກະຊວງການຕ່າງປະເທດ, ທ່ານ ສີທົງ ຈິດໂຍທິນ, ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈຳ ຮົງກາຣີ ໄດ້ຕາງໜ້າໃຫ້ລັດຖະບານ ແຫ່ງ ສປປ ລາວ ປະດັບຫຼຽນໄຊພັດທະນາຊັ້ນ III ໃຫ້ແກ່ ທ່ານ ດຣ ລາສະໂລ ວາຣາດີ, ກົງສຸນກິດຕິມະສັກ ແຫ່ງ ສປປ ລາວ ທີ່ ນະຄອນຫຼວງບູດາແປັດ, ຮົງກາຣີ ທີ່ມີຜົນງານດີເດັ່ນ ໃນການເຄື່ອນ ໄຫວປະຕິບັດໜ້າທີ່ຂອງຕົນໃນໄລຍະຜ່ານມາ, ຊຶ່ງຜົນງານດັ່ງກ່າວເປັນການປະກອບ ສ່ວນອັນສຳຄັນເຂົ້າໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືລະຫວ່າງສອງປະເທດ ລາວ ແລະ ຮົງກາຣີ ໃຫ້ມີບາດກ້າວອັນໃໝ່. ພິທີດັ່ງກ່າວໄດ້ຈັດຂຶ້ນຢ່າງສົມກຽດ ໂດຍມີຕາງໜ້າຈາກກະຊວງການຕ່າງປະເທດ ແລະ ການຄ້າຂອງຮົງກາຣີ ຄື: ທ່ານ Dr.Peter JAKAB, ຫົວໜ້າກົມອາຊີ ແລະ ປາຊີຟິກ ແລະ ທ່ານ Zoltan KULIK, ຜູ້ບໍລິຫານງານຂອງບໍລິສັດວີຕາຟອດ ພ້ອມດ້ວຍແຂກທີ່ຖືກເຊີນໄດ້ຈຳນວນໜຶ່ງເຂົ້າຮ່ວມ, ຊຶ່ງໃນພີທີກໍ່ໄດ້ມີການປະກາດລັດຖະດຳລັດຂອງປະທານປະເທດ ວ່າດ້ວຍການປະດັບຫຼຽນໄຊພັດທະນາຊັ້ນIII, ໃບມອບສິດຂອງນາຍົກລັດຖະມົນຕີ ແລະ ລັດຖະມົນຕີກະຊວງການຕ່າງປະເທດ ແລະ ຕິດຕາມດ້ວຍການນຳ ສະເໜີຜົນງານການເຄື່ອນໄຫວໂດຍຫຍໍ້ຂອງທ່ານ ດຣ ລາສະໂລ ວາຣາດີ ໃນໄລຍະຜ່ານມາ. ການປະດັບຫຼຽນໄຊພັດທະນາ ຊັ້ນIII ຄັ້ງນີ້ ເປັນການສະແດງຄວາມຂອບໃຈ ແລະ ຈາລຶກຄຸນງາມຄວາມດີຂອງລັດຖະບານ ແຫ່ງ ສປປ ລາວ ຕໍ່ທ່ານ ລາສະໂລ ວາຣາດີ ກໍ່ຄືຕໍ່ລັດຖະບານ ແລະ ປະຊາຊົນຮົງກາຣີ ທີ່ມີຕໍ່ລັດຖະບານ ແລະ ປະຊາຊົນລາວ ຕະຫຼອດໄລຍະຜ່ານມາ.