ໃນຕອນເຊົ້າ ຂອງວັນທີ 26 ມີນາ 2022,  ຢູ່ທີ່ຫ້ອງປະຊຸມ ສະຖານເອກອັກຄະລັດຖະທູດ ແຫ່ງ ສປປ ລາວ ປະຈຳ ສ. ຣັດເຊຍ ໄດ້ຈັດພິທີປາຖະກະຖາເຜີຍແຜ່ບັນດາເອກະສານສຳຄັນຂອງພັກ-ລັດ ເນື່ອງໃນໂອກາດສະເຫຼີມສະຫຼອງ ວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 67 ປີ (22/03/1955-22/03/2022 ) ແລະ ລະນຶກເຖິງ ວັນຄຽດແຄ້ນ ຂອງປະຊາຊົນລາວ-ວັນນັກຮົບເສຍອົງຄະ ແລະ ວັນເສຍສະຫຼະຊີວິດ ເພື່ອປະເທດຊາດ ຄົບຮອບ 76 ປີ ( 21/03/1946-21/03/2022 ). ເປັນກຽດເປັນປະທານ ແລະ ປາຖະກະຖາໂດຍ ສະ​ຫາຍ ນາງ ວິລາວັນ ເຍ່ຍປໍເຮີ, ​ເລຂາ​ຫນ່ວຍ​ພັກ, ເອກອັກຄະລັດຖະທູດ ແຫ່ງ ສປປ ລາວ ປະຈໍາ ສ. ຣັດເຊຍ. ເຂົ້າຮ່ວມພິທີໃນຄັ້ງນີ້ມີ: ຄະນະຫນ່ວຍພັກ, ສະມາຊິກພັກ, ພະນັກງານຂອງສະຖານທູດ ແລະ ຕາງໜ້ານັກສຶກສາລາວ ຢູ່ທີ່ ນະຄອນຫຼວງມົດສະກູ, ສ. ຣັດເຊຍ ຈຳນວນໜຶ່ງ ລວມທັງໝົດຈຳນວນ 26 ສະຫາຍ ຍິງ 09 ສະຫາຍ.

ໃນການກ່າວປາຖະກະຖາ ສະ​ຫາຍ ນາງ ວິລາວັນ ເຍ່ຍປໍເຮີ, ​ເລຂາ​ຫນ່ວຍ​ພັກ, ເອກອັກຄະລັດຖະທູດ ໄດ້ຍົກໃຫ້ເຫັນເຖິງປະຫວັດສາດແຫ່ງການກໍາເນີດ ແລະ ການເຕີບໃຫຍ່ຂະຫຍາຍຕົວ ຂອງພັກປະຊາຊົນປະຕິວັດລາວ ຕະຫລອດໄລຍະ 67 ປີຜ່ານມາ, ທີ່ພັກເຮົາໄດ້ນຳພາການປະຕິວັດຊາດປະຊາທິປະໄຕ, ປົກປັກຮັກສາ ແລະ ສ້າງສາພັດທະນາລະບອບໃໝ່ຢ່າງສະຫຼາດສ່ອງໃສ. ພັກເຮົາເວລາໃດກໍ່ຍຶດໝັ້ນລັດທິມາກ-ເລນິນເປັນ, ແນວຄິດປະທານ ໄກສອນ ພົມວິຫານ ພື້ນຖານ ແລະ ຍຶດຖືຫລັກໝັ້ນ ຂອງຊົນຊັ້ນກຳມະກອນຢ່າງສະເໝີຕົ້ນສະເໝີປາຍ, ສົມທົບແໝ້ນ ລະຫວ່າງ ລັດທິຮັກຊາດອັນແທ້ຈິງກັບລັດທິສາກົນອັນຜ່ອງໃສ, ມີຄວາມຈົງຮັກພັກດີຕໍ່ອຸດົມການປະຕິວັດ ແລະ ຜົນປະໂຫຍດ ຂອງປະຊາຊົນລາວບັນດາເຜົ່າ, ຖືເອົາຄວາມສາມັກຄີພາຍໃນເປັນຫລັກ, ເຕົ້າໂຮມຄວາມສາມັກຄີເປັນປຶກແຜ່ນພາຍໃນຊາດ, ເຊີດຊູຄວາມເປັນແບບຢ່າງນຳໜ້າ, ຮັກສາໄດ້ຄຸນທາດການເມືອງ ແລະ ຄຸນສົມບັດສິນທຳປະຕິວັດ, ຄວາມເຊື່ອໝັ້ນຈາກປະຊາຊົນລາວບັນດາເຜົ່າຕະຫລອດມາ. ດັ່ງນັ້ນ, ພັກເຮົາສົມແລ້ວທີ່ເປັນການຈັດຕັ້ງທາງການເມືອງທີ່ສະຫຼາດສ່ອງໃສ, ເປັນກອງນຳໜ້າທີ່ແໜ້ນແກ່ນ, ເປັນຕົວແທນທີ່ຈົງຮັກພັກດີຕໍ່ສິດຜົນປະໂຫຍດ ຂອງຊົນຊັ້ນກຳມະກອນ, ຊາວຜູ້ອອກແຮງງານທີ່ຮັກຊາດ, ເປັນແກນນຳໃນລະບົບການເມືອງແຫ່ງລະບອບປະຊາທິປະໄຕ ປະຊາຊົນ ອັນເຂັ້ມແຂງ ແລະ ສ້າງໃຫ້ປະເທດມິຄວາມສະຖຽນລະພາບທາງດ້ານການເມືອງໜັກແໜ້ນ, ສັງຄົມມີຄວາມສະຫງົບສຸກ, ເສດຖະກິດ ແລະ ວັດທະນະທຳ-ສັງຄົມໄດ້ຂະຫຍາຍຕົວຢ່າງຕໍ່ເນື່ອງ ແລະ ເຮັດໃຫ້ຊີວິດການເປັນຢູ່ຂອງປະຊາຊົນໄດ້ຮັບການພັດທະນາແກ້ໄຂເປັນກ້າວໆ.

ກອງປະຊຸມຍັງໄດ້ຮັບຟັງການບັນລະຍາຍເອກະສານກ່ຽວກັບ ວັນຄຽດແຄ້ນ ຂອງປະຊາຊົນລາວ-ວັນນັກຮົບເສຍອົງຄະ ແລະ ວັນເສຍສະຫຼະຊີວິດ ເພື່ອປະເທດຊາດ ຊຶ່ງສະເໜີໂດຍ ສະຫາຍ ພັນເອກ ສີສະໄຫວ ສິມມະລິວົງ, ຮອງເລຂາໜ່ວຍພັກ, ເຊິ່ງໄດ້ຫວນຄືນມູນເຊື້ອປະຫວັດສາດໂດຍຍົກໃຫ້ຜູ້ເຂົ້າຮ່ວມໄດ້ເຫັນ ແລະ ເຂົ້າໃຈຢ່າງເລິກເຊິ່ງຕໍ່ສະພາບການອັນໂຫດຮ້າຍປ່າເຖື່ອນ ທີ່ພວກທະຫານລ່າເມືອງຂຶ້ນແບບເກົ່າໄດ້ກະທຳຕໍ່ປະຊາຊົນລາວ ໂດຍສະເພາະແມ່ນແມ່ຍິງ ແລະ ເດັກນ້ອຍ ອັນເຮັດໃຫ້ປະຊາຊົນໃນເມືອງທ່າແຂກໄດ້ລົ້ມຕາຍເສຍຊີວິດເຖິງ 3,000 ກວ່າຄົນ. ພ້ອມດຽວກັນນີ້, ສະຫາຍຮອງເລຂາໜ່ວຍພັກ ກໍ່ໄດ້ຍົກໃຫ້ເຫັນບົດບາດການນຳພາຂອງພັກໃນຂະບວນການຕໍ່ສູ້ຂອງປະຊາຊົນລາວບັນດາເຜົ່າເວົ້າລວາມ, ເວົ້າສະເພາະ ແມ່ນຂະບວນການຕໍ່ສູ້ຂອງທະຫານ ແລະ ປະຊາຊົນໃນບັ້ນຮົບປ້ອງກັນຕົວເມືອງທ່າແຂກ ແຂວງຄຳມ່ວນ ໃນການຕໍ່ສູ້ຕ້ານກອງທັບຂອງທະຫານພວກລ່າເມືອຂຶ້ນແບບເກົ່າ ໃນວັນທີ 21 ມີນາ 1946 ຊຶ່ງປະຊາຊົນລາວທັງຊາດໄດ້ຈົດຈຳ ແລະ ຖືເອົາວັນດັ່ງກ່າວນີ້ເປັນ “ວັນຄຽດແຄ້ນຂອງປະຊາຊົນລາວໃນທົ່ວປະເທດ.”

ການເຜີຍແຜ່ເຊື່ອມຊຶມມູນເຊື້ອຄືດັ່ງກ່າວນີ້ ຜູ້ເຂົ້າຮ່ວມໄດ້ຮຽນຮູ້ປະຫວັດສາດທີ່ສຳຄັນຂອງຊາດ ແລະ ໄດ້ຮັບຮູ້ເຂົ້າໃຈຢ່າງເລິກເຊິ່ງ ກ່ຽວກັບພາລະກຳທາງປະຫວັດສາດ, ການກຳເນີດ ແລະ ການເຕີບໃຫຍ່ຂະຫຍາຍຕົວຂອງ ພັກປະຊາຊົນ ປະຕິວັດລາວ ໃນແຕ່ລະໄລຍະ, ທັງເປັນການຍົກສູງຄວາມສາມາດນຳພາ, ລັກສະນະນຳໜ້າຂອງພັກ ແລະ ສືບຕໍ່ຮັກສາມູນເຊື້ອອັນດີງາມຂອງພັກໃຫ້ຍືນຍົງຕະຫລອດໄປ. ພິທີປາຖະກະຖາ ເຜີຍແຜ່ເຊື່ອມຊຶມບັນດາເອກະສານສຳຄັນຂອງ ພັກ-ລັດ  ໄດ້ສຳເລັດຢ່າງຈົບງາມ.