ໃນລະຫວ່າງ ວັນທີ 14-18 ມິຖຸນາ 2022 ຜ່ານມາ, ທ່ານ ນາງ ວິລາວັນ ເຍ່ຍປໍເຮີ່, ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈຳ ສະຫະພັນ ຣັດເຊຍ ພ້ອມດ້ວຍຄະນະ ໄດ້ເດີນທາງໄປຮ່ວມກອງປະຊຸມເສດຖະກິດສາກົນ ທີ່ນະຄອນ ເຊັນປີເຕີສະເບີກ, ສ. ຣັດເຊຍ ຄັ້ງທີ 25, ຊຶ່ງກອງປະຊຸມດັ່ງກ່າວນີ້ ແມ່ນຈັດຂື້ນທຸກໆປີ ແລະ ກໍ່ໄດ້ມີບັນດາທູດປະເທດອາຊຽນ,ອາຊີ, ອາຟຣິກາ ແລະ ອາເມລິກາລາຕິນ, ລວມທັງຜູ້ຕາງຫນ້າຈາກອົງການຈັດຕັ້ງສາກົນ ທີ່ມີສຳນັກງານຕັ້ງຢູ່ໃນ ສະຫະພັນຣັດເຊຍ ກໍ່ໃຫ້ກຽດເຂົ້າຮ່ວມ ເປັນຈຳນວນ 135 ປະເທດ.
ເນື້ອໃນກອງປະຊຸມຄັ້ງນີ້ ພາຍໃຕ້ຫົວຂໍ້ວ່າ “ໂອກາດໃໝ່ໃນໂລກໃໝ່” ແລະ ກວມເອົາ 5 ບັນຫາຕົ້ນຕໍຄື: ການສົ່ງເສີມທຸລະກິດຂະໜາດກາງ ແລະ ຂະໜາດນ້ອຍ (SME Forum), ການສົ່ງເສີມສ້າງທຸລະກິດໃໝ່ (Creative Busines Forum), ຄວາມປອດໄພຈາກຢາເສບຕິດ (Drung Security Forum), ບັນຫາໄວລຸ້ນ (Junior Dialogue Forum) ແລະ ສັບປະດາແຫ່ງການກິລາ(Sport Week), ຊຶ່ງມີຫລາຍກວ່າ 50 ຫົວຂໍ້ຍ່ອຍ ທີ່ທາງຄະນະຈັດຕັ້ງກອງປະຊຸມໄດ້ນໍາມາປຶກສາຫາລື ຢູ່ໃນກອງປະຊຸມຄູ່ຂະໜານ, ໃນນັ້ນ ທ່ານ ທູດເຮົາ ພ້ອມດ້ວຍຄະນະ ກໍ່ໄດ້ເລືອກເຟັ້ນເອົາຫົວຂໍ້ທີ່ສຳຄັນ ແລະ ກ່ຽວພັນກັບຫນ້າວຽກ ຂອງສະຖານທູດເຮົາ ເປັນຕົ້ນແມ່ນ ກອງປະຊຸມພິເສດລະຫວ່າງ ອາຊຽນ-ສະຫະພາບເສດຖະກິດເອີຣົບ-ອາຊີ (ASEAN-EAEU), ຊຶ່ງໄດ້ມີການລົງເລິກດ້ານການຮ່ວມມືດ້ານເສດຖະກິດ-ການຄ້າ, ການລົງທຶນເພື່ອການພັດທະນາ ແລະ ຫົວຂໍ້ອື່ນໆ. ໃນມື້ສຸດທ້າຍຂອງກອງປະຊຸມ ທ່ານ ທູດ ກໍ່ໄດ້ເຂົ້າຮ່ວມກອງປະຊຸມປະຖົມມະລຶກ ໂດຍການເປັນປະທານ ຂອງພະນະທ່ານ ວະລາດີເມຍ ປູຕິນ, ປະທານາທິບໍດີ ແຫ່ງ ສະຫະພັນຣັດເຊຍ, ຊຶ່ງມີ ພະນະທ່ານ Kassym-Jomart Tokaev, ປະທານາທິບໍດີ ແຫ່ງ ສາທາລະນະລັດ ກາຊັກສະຖານ ເຂົ້າຮ່ວມນຳ.
ໃນໂອກາດເດີນທາງໄປເຂົ້າຮ່ວມກອງປະຊຸມໃນຄັ້ງນີ້, ທ່ານ ເອກອັກຄະລັດຖະທູດ ແຫ່ງ ສປປ ລາວ ປະຈໍາ ສ. ຣັດເຊຍ ພ້ອມດ້ວຍຄະນະ ກໍ່ຍັງໄດ້ພົບປະສອງຝ່າຍກັບ ຄະນະກຳມາທິການຕ່າງປະເທດ ນະຄອນເຊັນປີເຕີສະເບີກ ເພື່ອສືບຕໍ່ປຶກສາຫາລືກັນ ແລະ ເສີມຂະຫຍາຍການພົວພັນຮ່ວມມື ໃຫ້ປະກົດຜົນເປັນຈິງ, ພົບປະກັບຜູ້ອຳນວຍການມະຫາວິທະຍາໄລສ້າງຄູແຫ່ງລັດ ແຫ່ງ ສ. ຣັດເຊຍ ທີ່ມີຊື່ວ່າ: A. I. Herzen ເພື່ອປຶກສາຫາລື ກ່ຽວກັບ ແຜນການຮ່ວມມືກັນ ໃນອະນາຄົດ ແລະ ນອກຈາກນັ້ນ, ທ່ານທູດເຮົາ ຍັງໄດ້ພົບປະກັບບັນດາບໍລິສັດຈຳນວນຫນຶ່ງ ເພື່ອເສີມຂະຫຍາຍການພົວພັນດ້ານເສດຖະກິດ-ການຄ້າ ລະຫວ່າງ ສປປ ລາວ ແລະ ສ. ຣັດເຊຍ.