ໃນວັນທີ 2-3 ມີຖຸນາ 2023, ຄະນະທູດຈາກ 4 ປະເທດ (ທ່ານ ເອກອັກຄະລັດຖະທູດ ແຫ່ງ ສປປ ລາວ ປະຈໍາ ສະມາພັນທະລັດສະວິດສ; ທ່ານ ເອກອັກຄະລັດຖະທູດ ແຫ່ງ ສປປ ລາວ ປະຈໍາ ສະຫະລັດອາເມລິກາ; ທ່ານ ເອກອັກຄະລັດຖະທູດ ແຫ່ງ ສປປ ລາວ ປະຈໍາ ລາຊະອານາຈັກອັງກິດ; ແລະ ທ່ານ ເອກອັກຄະລັດຖະທູດ ແຫ່ງ ສປປ ລາວ ປະຈໍາ ສາທາລະນະລັດໂອຕຣິດ) ພ້ອມຄະນະ ໄດ້ສໍາເລັດການເຂົ້າຮ່ວມງານຊາປະນາກິດສົບ ທ່ານ ດຣ. ກີໂດ ໂຈເຊັບ ກາແປລລີ, ກົງສຸນກິຕິມະສັກ ແຫ່ງ ສປປ ລາວ ປະຈໍາ ສະມາພັນທະລັດສະວິດສ ທີ່ ກັງຕົງ Schwyz, ປະເທດ ສະວິດ ດ້ວຍຜົນສໍາເລັດອັນຈົບງາມ. ໃນພິທີດັ່ງກ່າວ, ຄະນະທູດ ໄດ້ວາງພວງມາລາໄຫວ້ອາໄລໃນນາມລັດຖະບານ ແລະປະຊາຊົນລາວ. ພ້ອມກັນນີ້, ທ່ານທູດ ລັດສະຫມີ ແກ້ວມະນີ ໄດ້ຕາງຫນ້າ ຂຶ້ນອ່ານສານເສົ້າສະຫລົດໃຈ ຂອງ ທ່ານ ສະເຫລີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແລະໄດ້ສົ່ງຂໍ້ຄວາມສະແດງຄວາມເສົ້າສະຫລົດໃຈຢ່າງສຸດຊຶ້ງ ຂອງ ທ່ານ ທອງລຸນ ສີສຸລິດ, ປະທານປະເທດ ແຫ່ງ ສປປ ລາວ ຕໍ່ການຈາກໄປ ຂອງ ທ່ານກົງສຸນກິດຕິມະສັກ, ເຊິ່ງຖືວ່າເປັນການສູນເສຍຄັ້ງໃຫຍ່ບໍ່ພຽງແຕ່ສໍາລັບປະເທດສະວິດສ, ແຕ່ຍັງເປັນການສູນເສຍຄັ້ງໃຫຍ່ ຂອງ ລັດຖະບານ ແລະ ປະຊາຊົນລາວ. ນອກຈາກນີ້, ກໍໄດ້ປະກາດຢ່າງເປັນທາງການ: ‘ທ່ານ ດຣ ກິໂດ ໂຈເຊັບ ກາແປນລີ ເປັນພົນລະເມືອງກິຕິມະສັກ ຂອງ ສປປ ລາວ”.
ຕະຫລອດໄລຍະ 27 ປີ (1996-2023), ທ່ານ ດຣ. ກາແປນລີ ໄດ້ປະກອບສ່ວນອັນສໍາຄັນເຂົ້າໃນການພັດທະນາເສດຖະກິດ-ສັງຄົມ ຂອງ ສປປ ລາວ ໂດຍສະເພາະການໃຫ້ການຊ່ວຍເຫລືຶອໃນຂະແໜງສຶກສາ, ກິລາ ແລະ ສາທາລະນະສຸກ (ກໍ່ສ້າງໂຮງຮຽນ ຈຳນວນ 27 ຫຼັງ ພ້ອມສະໜອງອຸປະກອນການຮຽນ-ການສອນ ແລະລະບົບນໍ້າດື່ມແກ່ໂຮງຮຽນ ລວມເປັນມູນຄ່າທັງໝົດ ຫຼາຍກວ່າ 2 ລ້ານໂດລາສະຫະລັດ). ຄຽງຄູ່ກັນນີ້, ນັບແຕ່ປີ 2006 ເປັນຕົ້ນມາ, ທ່ານ ໄດ້ຮັບການແຕ່ງຕັ້ງເປັນກົງສຸນກິຕິມະສັກ ແຫ່ງ ສປປ ລາວ ປະຈຳ ສະມາພັນທະລັດສະວິດສ, ເຊິ່ງໄດ້ປະກອບສ່ວນອັນສໍາຄັນເຂົ້າໃນການໂຄສະນາ-ເຜີຍແຜ່ວຽກງານເສດຖະກິດ-ການຄ້າ-ການລົງທຶນ, ວຽກງານກົງສຸນ ແລະວຽກງານການທ່ອງທ່ຽວ. ພິເສດ, ຄຽງຄູ່ກັບການໃຫ້ການຊ່ວຍເຫລືອທີ່ກ່າວມາຂ້າງເທິງ, ໃນປີ 2007-2008, ທ່ານ ດຣ. ກາແປນລີ ຍັງໄດ້ໃຫ້ການຊ່ວຍເຫຼືອໃນໄລຍະການສ້າງຕັ້ງສຳນັກງານຜູ້ຕາງໜ້າຖາວອນ/ສະຖານເອກອັກຄະລັດຖະທູດ ແຫ່ງ ສປປ ລາວ ປະຈໍາສະມາພັນທະລັດສະວິດສ ທີ່ ເຊີແນວ.
ອີງໃສ່ຜົນງານ ແລະຄຸນງາມຄວາມດີຂ້າງເທິງ, ທ່ານ ດຣ. ກາແປລລີ ໄດ້ຮັບຫລຽນໄຊພັດທະນາຊັ້ນ III, ຫລຽນກາມິດຕະພາບ ແລະໃບຍ້ອງຍໍຈາກລັດຖະບານ ແລະອໍານາດການປົກຄອງທ້ອງຖິ່ນຈໍານວນນຶ່ງ.
ທ່ານ ດຣ. ກິໂດ ກາແປນລີ ໂຈເຊັບ ໄດ້ເສຍຊີວິດ ໃນວັນທີ 22 ພຶດສະພາ 2023, ລວມອາຍຸ 79 ປີ.