ເພື່ອເປັນການປະກອບສ່ວນຂໍ່ານັບຮັບຕ້ອນ ແລະ ຊົມເຊີຍ ວັນການທູດລາວ ຄົບຮອບ 78 ປີ ໃນວັນທີ 12 ຕຸລາ 2023 ທີ່ຈະມາເຖິງນີ້. ໃນວັນທີ 9 ຕຸລາ 2023, ທີ່ ສຳນັກງານສະຖານເອກອັກຄະລັດຖະທູດລາວ ທີ່ ມະນີລາ, ທ່ານ ໂຈເຊບ ກູ ຊີ (Joseph Cue Sy), ກົງສູນກິດຕິມະສັກແຫ່ງ ສປປ ລາວ ປະຈໍາ ແຂວງດາວາວ, ປະເທດ ຟິລິບປິນ ໄດ້ນໍາເອົາເຄື່ອງຄອມພິວເຕີໂນດບຸກ ຈຳນວນ 04 ເຄື່ອງ, ຄອມພິວເຕີຕັ້ງໂຕະ ແລະ ພຣິນເຕີ 01 ຊຸດ ຫຍີ່ຫໍ້ Lenovo, ແທບເລັດ ( ຫຍີ່ຫໍ້ iPad Pro ) 01 ເຄື່ອງ ມາມອບໃຫ້ແກ່ສະຖານເອກອັກຄະລັດຖະທູດລາວ ທີ່ ມະນີລາ, ຮັບໂດຍ ທ່ານ ສອນໄຊ ວັນນະໄຊ, ເອກອັກຄະລັດຖະທູດແຫ່ງ ສປປ ລາວ ປະຈຳ ຟິລິບປິນ ແລະ ເປັນສັກຂີພິຍານຂອງພະນັກງານສະຖານທູດ, ເພື່ອເປັນການປະກອບສ່ວນໃຫ້ວຽກງານຂອງສະຖານທູດ ມີຄວາມສະດວກຍິງຂຶ້ນ ແລະ ສາມາດຕອບສະໜອງໄດ້ຕາມຄວາມຮຽກຮ້ອງຕ້ອງການ ໃນການເປັນເສນາທິການໃຫ້ກັບກະຊວງໃຫ້ທັນເວລາ. ເຄື່ອງທີ່ນຳມາມອບໃນຄັ້ງນີ້, ລວມມູນຄ່າ 410.000 ເປໂຊ ( ສີ່ແສນສິບພັນເປໂຊ ) ສະກຸນເງິນ ຟິລິບປິນ ຫລື ປະມານ 161.000.000 ກີບ ( ໜຶ່ງຮ້ອຍຫົກສິບເອັດລ້ານກີບ ).
ໃນໂອກາດດັ່ງກ່າວນີ້, ທ່ານ ສອນໄຊ ວັນນະໄຊ, ເອກອັກຄະລັດຖະທູດແຫ່ງ ສປປ ລາວ ປະຈຳ ຟິລິບປິນ ໄດ້ສະແດງຄວາມຂອບໃຈ ຕໍ່ການປະກອບສ່ວນຢ່າງຫ້າວຫັນຂອງ ທ່ານ ໂຈເຊບ ກູ ຊີ, ກົງສູນກິດຕິມະສັກລາວ ທີ່ໄດ້ນຳເອົາເຄື່ອງຄອມພິວເຕີມາມອບໃຫ້ແກ່ສະຖານເອກອັກຄະລັດຖະທູດໃນຄັ້ງນີ້, ເຊິ່ງເຄື່ອງອຸປະກອນດັ່ງກ່າວຈະຊ່ວຍເຮັດໃຫ້ວຽກງານຂອງສະຖານທູດ ມີຄວາມສະດວກວ່ອງໄວຍິ່ງຂຶ້ນ. ພ້ອມດຽວກັນນີ້, ກໍໄດ້ສະ ແດງຄວາມຍ້ອງຍໍຊົມເຊີຍ ຕໍ່ການປະກອບສ່ວນຢ່າງຫ້າວຫັນຂອງ ທ່ານ ໂຈເຊບ ກູ ຊີ, ກົງສູນກິດຕິມະສັກລາວ ໃນໄລຍະຜ່ານມາເປັນຕົ້ນ ການຈັດກິດຈະກຳກິລາກອຟ, ການໂຄສະນາໃຫ້ພາກປະຊາຊົນ ແລະ ທຸລະກິດ ຟິລິບປິນ ໄດ້ຮູ້ຈັກ ສປປ ລາວ ໃຫ້ນັບມື້ຫຼາຍຂຶ້ນ ເພື່ອຊຸກຍູ້ສົ່ງເສີມໃຫ້ພາກທຸລະກິດ ຟິລິບປິນ ໃຫ້ມີການແລກປ່ຽນພົບປະ ແລະ ລົງທຶນຢູ່ ສປປ ລາວ ໃນຂະແໜງການຕ່າງໆ ແລະ ມາທ່ອງທ່ຽວຢູ່ລາວໃຫ້ນັບມື້ນັບຫຼາຍຂຶ້ນ ໂດຍສະເພາະໃນປີທ່ອງທ່ຽວລາວ 2024.