ໃນຕອນບ່າຍ ຂອງ ວັນທີ 20 ຕຸລາ 2023, ສະຖານເອກອັກຄະລັດຖະທູດ ແຫ່ງ ສປປ ລາວ ທີ່ ແບກແລງ ໄດ້ຮ່ວມກັບ ກົມອາຊີ, ກະຊວງການຕ່າງປະເທດ ເຢຍລະມັນ ຈັດການແຂ່ງຂັນກິລາຕີດອກປີກໄກ່ມິດຕະພາບຂື້ນ ຢູ່ ສະໂມສອນ Sportforum Kleinmachnow, ທີ່ ນະຄອນຫລວງ ແບກແລງ, ສ.ເຢຍລະມັນ, ຊຶ່ງເປັນໜຶ່ງໃນກິດຈະກຳ ສະເຫລີມສະຫລອງວັນສ້າງຕັ້ງສາຍພົວພັນການທູດ ຄົບຮອບ 65 ປີ ແລະ 60 ປີ ການຮ່ວມມື ລະຫວ່າງ ສປປ ລາວ ແລະ ສ.ເຢຍລະມັນ ໂດຍມີຜູ້ເຂົ້າຮ່ວມຈາກຝ່າຍລາວ ນໍາໂດຍ ທ່ານ ໄມບົວ ໄຊຍະວົງ, ເອກອັກຄະລັດຖະທູດ ແຫ່ງ ສປປ ລາວ, ພະນັກງານສະຖານທູດ ພ້ອມດ້ວຍສະມາຊິກຄອບຄົວ, ນັກສຶກສາລາວ ແລະ ຄະນະສະມາຄົມຄົນເຊື້ອຊາດລາວ ທີ່ ແບກແລງ ຈຳນວນໜຶ່ງ ໄດ້ເຂົ້າຮ່ວມຫລິ້ນ, ຊົມ ແລະ ເຊຍ. ຝ່າຍເຢຍລະມັນ ນໍາໂດຍ ທ່ານ ດຣ. Jan Freigang, ຫົວໜ້າພະແນກ ອາຊີຕາເວັນອອກສຽງໃຕ້ ແລະ ອາຊຽນ ພ້ອມດ້ວຍພະນັກງານ ກະຊວງການຕ່າງປະເທດ ເຂົ້າຮ່ວມ.

 ກ່ອນເປີດການແຂ່ງຂັນ, ທ່ານ ທູດ ໄມບົວ ໄຊຍະວົງ ແລະ ທ່ານ ດຣ. Jan Freigang ໄດ້ມີຄຳເຫັນຕໍ່ການຈັດກິລາຕີດອກປີກໄກ່ມິດຕະພາບດັ່ງກ່າວ ໂດຍ ທ່ານ ເອກອັກຄະລັດຖະທູດ ໄດ້ຕີລາ ຄາສູງຕໍ່ສາຍພົວພັນມິດຕະພາບ ແລະ ການຮ່ວມມືທີ່ດີມີມູນເຊື້ອມາແຕ່ດົນນານ, ການແລກ ປ່ຽນຢ້ຽມຢາມ, ການພົບປະສອງຝ່າຍຂອງການນໍາຂັ້ນສູງ ແລະ ສອງສະມາຄົມມິດຕະພາບ ລາວ-ເຢຍລະມັນ-ລາວ, ພ້ອມກັນບັ້ນ ກໍໄດ້ຕາງໜ້າໃຫ້ລັດຖະບານລາວ ສະແດງຄວາມຂອບໃຈ ຕໍ່ ລັດ ຖະບານ ແລະ ປະຊາຊົນ ເຢຍລະມັນ ທີ່ໄດ້ໃຫ້ການຊ່ວຍເຫຼືອອັນລໍ້າຄ່າແກ່ ສປປ ລາວ ໃນຫລາຍຂົງເຂດຂະແໜງການ ເຊັ່ນ: ການພັດ​ທະ​ນາ​ຊົນ​ນະ​ບົດ, ກໍ່ສ້າງໂຄງ​ລ່າງ​ພື້ນ​ຖານ, ອາຊີວະສຶກສາ, ອະນຸລັກສິ່ງແວດລ້ອມ, ພັດທະນາເສດຖະກິດແບບຍືນຍົງ, ສົ່ງເສີມ​ພາກທຸລະກິດ-ເອກະຊົນ ແລະ ອື່ນໆ, ຊຶ່ງການຊ່ວຍເຫລືອດັ່ງກ່າວ ນັບແຕ່ປີ 1996 ມາເຖິງປັດຈຸບັນ ລວມມູນຄ່າ​ຫຼາຍກວ່າ 571 ລ້ານເອີໂຣ  ແລະ ຍັງໄດ້ສະແດງຄວາມຫວັງວ່າ ການພົວພັນຮ່ວມມື ລະຫວ່າງ ສອງປະເທດ ຈະສືບ ຕໍ່ຮັດແໜ້ນ ແລະ ເສີມຂະຫຍາຍ ໂດຍສະເພາະ ໃນຂະແໜງເສດຖະກິດ-ການຄ້າ, ການລົງທຶນ ແລະ ການທ່ອງທ່ຽວ ໃນຊຸມປີຕໍ່ໜ້າ.

ສ່ວນ ດຣ. Jan Freigang ໄດ້ສະແດງຄວາມຊົມເຊີຍ ຕໍ່ ການຈັດກິດຈະກຳກິລາມິດຕະພາບສະເຫລີມສະຫລອງວັນສ້າງຕັ້ງສາຍພົວພັນການທູດ ລາວ-ເຢຍລະມັນ ຄັ້ງນີ້, ຊຶ່ງເປັນນິມິດໝາຍສໍາຄັນໃຫ້ແກ່ການຮ່ວມມືສອງຝ່າຍຕະຫລອດໄລຍະ 65 ປີຜ່ານມາ. ການພົວພັນຮ່ວມມື ລະຫວ່າງ ສອງປະເທດ ເຢຍລະມັນ-ລາວ ແມ່ນຢູ່ໃນລະດັບດີ ເປັນຕົ້ນ ທາງດ້ານການເມືອງ, ການທູດ, ການພັດທະນາເສດຖະກິດ-ສັງຄົມ ທັງໃນກອບສອງຝ່າຍ ແລະ ຫລາຍຝ່າຍ.​ ການຈັດກິລາມິດຕະພາບຮ່ວມກັນໃນຄັ້ງນີ້ ແມ່ນເປັນແນວຄວາມຄິດທີ່ດີ ເພື່ອສ້າງຄວາມໃກ້ຊິດ ແລະ ຄວາມເຂົ້າອົກເຂົ້າ ໃຈ ລະຫວ່າງ ພະນັກງານສະຖານທູດລາວ ແລະ ພະນັກງານຂອງກະຊວງການຕ່າງປະເທດ ເຢຍລະມັນ ໃຫ້ແໜ້ນແຟ້ນຂື້ນຕື່ມ. ພ້ອມດຽວກັນ ດຣ. Jan Freigang ຍັງໄດ້ຢືນຢັນຈະສືບຕໍ່ຊຸກຍູ້ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີ ກັບ ສປປ ລາວ ໃຫ້ມີໝາກຜົນຫລາຍຂື້ນກວ່າເກົ່າ ບໍ່ວ່າຈະໃນກອບການຮ່ວມມືສອງຝ່າຍ ແລະ ຫລາຍຝ່າຍ ໂດຍສະເພາະ ໃນຂອບ ອາຊຽນ, ຊຶງ ເຢຍລະມັນ ເປັນຄູ່ເຈລະຈາທີ່ສຳຄັນຂອງອາຊຽນ ແລະ ມີຄວາມຍິນດີຈະໃຫ້ການສະໜັບສະໜູນ ແລະ ຮ່ວມມື ກັບ ສປປ ລາວ ໃນການເຮັດໜ້າທີ່ເປັນປະທານໝູນວຽນ ອາຊຽນ ໃນປີ 2024 ທີ່ຈະມາເຖິງນີ້ ໃຫ້ປະສົບຜົນສຳເລັດຢ່າງຈົບງາມ.

ພາຍຫລັງ ສຳເລັດການແຂ່ງຂັນ, ທ່ານ ທູດ ໄມບົວ ໄຊຍະວົງ ແລະ ທ່ານ ດຣ. Jan Freigang ໄດ້ມອບຂັນລາງວັນໃຫ້ແກ່ທີມກິລາ ທີ່ຊະນະເລີດການແຂ່ງຂັນ ໄດ້ທີ 1 ແລະ ທີ 2 ແລະ ຫຼັງຈາກນັ້ນ ທັງສອງຝ່າຍ ໄດ້ເຂົ້າຮ່ວມພາເຂົ້າສາມັກຄີ ເພື່ອຊົມເຊີຍຜົນສຳເລັດ ແລະ ວັນທີ່ມີຄວາມໝາຍສຳຄັນ ຂອງສອງປະເທດຄັ້ງນີ້ ດ້ວຍບັນຍາກາດ ແຫ່ງ ມິດຕະພາບ ແລະ ຄວາມເຂົ້າອົກເຂົ້າໃຈ ເຊິ່ງກັນແລະກັນ.