ໃນໂອ​ກາດ​ດຳ​ລົງ​ຕໍາ​ແໜ່ງ​ເປັນ​ເອກ​ອັກ​ຄະ​ລັດ​ຖະ​ທູດ​ວິ​ສາ​ມັນ​ຜູ້​ມີ​ອຳ​ນາດ​ເຕັມ​ແຫ່ງ ສ​ປ​ປ ລາວ ປະ​ຈຳ ສ​ສ ຫວຽດ​ນາມ, ຕອນແລງຂອງ ວັນທີ 18 ມັງ​ກອນ 2024, ສະຫາຍ ນາງ ຄຳເພົາ ເອີນທະວັນ ພ້ອມ​ຄະ​ນະຜູ້ແທນ ສະຖານເອກອັກຄະລັດຖະທູດລາວ ໄດ້ເຂົ້າຢ້ຽມ​ຂ່ຳ​ນັບ​ ແລະ ສະ​ເໜີ​ຕົວ​ຕໍ່ ສະ​ຫາຍ  ສຈ, ປອ ຫງວຽນ ຊວັນ ຖັງ, ກຳມະການກົມການເມືອງສູນກາງພັກ, ຫົວໜ້າສະຖາບັນການເມືອງແຫ່ງຊາດໂຮ່ຈິມິນ, ປະທານສະພາທິດສະດີ ສູນກາງພັກກອມ​ມູ​ນິດ​ຫວຽດ​ນາມ ​ໂດຍ​ສະ​ຫາຍ​ໄດ້​ນຳ​ເອົາ​ຄຳຢື້ຢາມຖາມຂ່າວອັນອົບອຸ່ນ ແລະ ຄຳອວຍພອນ​ອັນ​ປະ​ເສີດຂອງ ສະຫາຍ ຄຳພັນ ເຜີຍຍະວົງ, ເລຂາທິການສູນກາງພັກ, ປະທານສະພາທິດສະດີສູນກາງພັກ ແລະ ສະຫາຍ ຮສຈ, ພູວົງ ອຸ່ນຄໍາແສນ, ກໍາມະການສູນກາງພັກປະ​ຊາ​ຊົນ​ປະ​ຕິ​ວັດ​ລາວ, ຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ ເຖິງ ສະຫາຍ ສຈ, ປອ ຫງວຽນ ຊວັນ ຖັງ ພ້ອມຄະນະ ເນື່ອງໃນໂອກາດ ປີໃໝ່ສາກົນ ທີ່​ຜ່ານ​ພົ້ນ​ໄປ ແລະ ບຸນປີໃໝ່ປະຈຳຊາດຫວຽດນາມຈະໝູນ​ວຽກມາເຖິງໃນ​ມໍ່ໆ​ນີ້.

ໂອກາດນິ້, ສະຫາຍ ນາງ ຄໍາ​ເພົາ ເອີນ​ທະ​ວັນ ​ໄດ້​​ສະ​ແດງ​ຄວາມ​ຂອບ​ໃຈສະ​ຫາຍ ສຈ, ປອ ຫງວຽນ ຊວັນ ຖັງ, ກຳມະການກົມການເມືອງສູນກາງພັກ, ຫົວໜ້າສະຖາບັນການເມືອງແຫ່ງຊາດໂຮ່ຈິມິນ, ປະທານສະພາ ທິດສະດີ ສູນກາງພັກກອມ​ມູ​ນິດ​ຫວຽດ​ນາມ ​​ທີ່​ໃຫ້​ການ​ຕ້ອນ​ຮັບ​ຢ່າງ​ອົບ​ອຸ່ນ, ​ສະ​ໜິດ​ສະ​ໜົມ​​.  ສະຫາຍ ສະ​ແດງ​ຄວາມປິ​ຕິຍິນ​ດີ​ຕໍ່​ຜົນ​ສຳ​ເລັດໃນການຈັດຕັ້ງປະຕິບັດມະຕິຂອງກອງປະຊຸມໃຫຍ່ ຄັ້ງທີ 13 ຂອງພັກກອມມູນິດ ຫວຽດນາມ ຕະຫຼອດໄລຍະຜ່ານມາ ເຊິ່ງນຳໂດຍ ສະຫາຍ ຫງວຽນ ຝູ ຈ້ອງ, ເລຂາທິການໃຫຍ່ ພັກກອມມູນິດ ຫວຽດນາມ ທີ່ເຕັມໄປດ້ວຍຄວາມຮູ້, ຄວາມສາມາດ ແລະ ປະສົບການຢ່າງຫຼວງຫຼາຍ ອັນໄດ້ເຮັດໃຫ້ ສສ ຫວຽດນາມ ໄດ້ຮັບການພັດທະນາຮອບດ້ານຢ່າງວ່ອງໄວ ແລະ ກ້າວກະໂດດ, ການແກ້ໄຂຄວາມຫຍຸ້ງຍາກ​ຈາກຜົນກະທົບ​ຂອງ ໂຄວິດ-19 ໄດ້ຢ່າງວ່ອງໄວ, ເຮັດໃຫ້ເສດຖະກິດສືບ​ຕໍ່​ຂະ​ຫຍາຍ​ຕົວ, ຊີວິດການເປັນຢູ່ ຂອງປະຊາຊົນນັບ​ມື້ດີຂື້ນຢ່າງຈະແຈ້ງ, ອິດທິພົນ, ບົດບາດ, ຊື່ສຽງຂອງຫວຽດນາມ ກໍພົ້ນເດັ່ນໃນເວທີພາກພື້ນ ແລະ ສາກົນ. ເຊື່ອ​ໝັ້ນ​ວ່າ: ພາຍໃຕ້ການນໍາພາອັນສະຫຼາດສ່ອງໃສຂອງພັກກອມມູນິດຫວຽດນາມ  ຫວຽດນາມຈະ ສາມາດເຮັດ​ສຳ​ເລັດໜ້າ​ທີ່​ການ​ເມືອງ ແລະ ແຜນການພັດທະນາເສດຖະກິດ-ສັງຄົມ ​ໄລ​ຍະ 5 ປີ (2021-2026) ກໍຄືວິໄສທັດ ຮອດປີ 2030 ໃນໂອກາດສະ​ເຫຼີມ​ສະຫຼອງວັນສ້າງຕັ້ງພັກກອມມູນິດຫວຽດນາມ ​ຄົບ​ຮອບ 100 ປີ ແລະ ວັນສະຖາປະນາປະເທດຊາດຫວຽດນາມ ຄົບຮອບ 100 ປີ ໃຫ້ກາຍເປັນປະເທດ ທີ່ພັດທະນາ ແລະ ມີລາຍຮັບສູງຢ່າງຈົບງາມ. ພ້ອມນີ້, ສະ​ຫາຍຍັງໄດ້ຕີລາຄາສູງຕໍ່ ການພົວພັນຮ່ວມມືລະ​ຫວ່າງສອງ​ພັກ, ສອງ​ລັດ ແລະ ປະ​ຊາ​ຊົນ​ສອງ​ຊາດ ລາວ-ຫວຽດ​ນາມ ເວົ້າລວມ, ເວົ້າສະເພາະ ແມ່ນການຮ່ວມມື ລະຫວ່າງ ສະຖາບັນການ​ເມືອງ​ແຫ່ງ​ຊາດໂຮ່​ຈີ​ມິນຂອງ​ຫວຽດ​ນາມ ກັບ ສະ​ຖານ​ບັນການເມືອງ ແລະ ການປົກຄອງແຫ່ງຊາດຂອງ​ລາວ ຊຶ່ງຍາມໃດກໍໄດ້ໃຫ້ຄວາມສຳຄັນຕໍ່ການກໍ່ສ້າງບຸກຄະລາກອນຂອງສອງພັກ, ສອງລັດຢ່າງເປັນປົກກະຕິເປັນຕົ້ນແມ່ນ ສະຖາບັນການເມືອງແຫ່ງຊາດໂຮ່ຈິມິນ ໄດ້ເປີດຊຸດບຳລຸງ ກໍ່ສ້າງວິຊາສະເພາະ ທັງໄລຍະສັ້ນ ແລະ ໄລຍະຍາວ, ບຳລຸງທິດສະດີການເມືອງໃຫ້ແກ່ບັນດາການນຳ,​ ກໍ່ສ້າງຄູສອນທິດສະດີການເມືອງ, ຫຼັກສູດຕ່າງໆໃຫ້ແກ່ສະຖາບັນ ການເມືອງ ແລະ ການປົກຄອງແຫ່ງຊາດຂອງ​ລາວ. ສອງອົງການໄດ້ມີການແລກປ່ຽນຄະນະຜູ້ແທນ ຢ້ຽມ​ຢາມ​ເຊິ່ງ​ກັນ​ແລະ​ກັນ, ແລກປ່ຽນບົດຮຽນ, ຂໍ້​ມູນຂ່າວສານ ກໍຄືສະໜອງວາລະສານ, ປື້ມເອກະສານ, ຫຼັກສູດກາ​ນ​ຮຽນ-ການ​ສອນ, ບົດຄົ້ນຄວ້າ, ວິທະຍານິພົນ ແລະ ປື້ມອື່ນໆເປັນປົກກະຕິ.

ສະຫາຍ ເອກອັກຄະລັດຖະທູດລາວ ຍັງໄດ້ຕາງໜ້າພັກ, ລັດຖະບານ ແລະ ປະຊາຊົນລາວ ສະແດງຄວາມຮູ້​ບຸນ​ຄຸນ ແລະ ຂອບໃຈຢ່າງ​ຈິງ​ໃຈຕໍ່ພັກ, ລັດຖະບານ ແລະ ປະຊາຊົນຫວຽດນາມອ້າຍ​ນ້ອງ ຊຶ່ງ​ເປັນ​ການ​​ສະ​ແດງ​ເຖິງ​ນ້ຳ​ໃຈ ຄວາມ​ສາ​ມັກ​ຄີ​ພິ​ເສດ ​ລະ​ຫວ່າງ​ສອງ​ພັກ, ສອງ​ລັດ ແລະ ປະ​ຊາ​ຊົນ​ສອງ​ຊາດ​ລາ​ວ-ຫວຽດ​ນາມ ຊຶ່ງ​ມີ​ໜຶ່ງ​ບໍ່​ມີ​ສອງໃນ​ໂລກ.

ສະ​ຫາຍ ສຈ,ປອ ຫງວຽນ ຊວັນ ຖັງ, ກຳມະການກົມການເມືອງສູນກາງພັກ, ຫົວໜ້າສະຖາບັນການເມືອງ ແຫ່ງຊາດໂຮ່ຈິມິນ, ປະທານສະພາທິດສະດີ ສູນກາງພັກກອມ​ມູ​ນິດ​ຫວຽດ​ນາມໄດ້ໃຫ້ການຕ້ອນຮັບຢ່າງອົບອຸ່ນ ແລະ ສະແດງ​ຄວາມ​ຊົມເຊີຍຕໍ່ການມາ​ປະ​ຕິ​ບັດ​ໜ້າ​ທີ່​ ດຳ​ລົງ​ຕຳ​ແໜ່ງເປັນເອກອັກຄະລັດຖະທູດຜູ້ມີອໍານາດເຕັມ ປະຈໍາ ສາ​ທາ​ລະ​ນະ​ລັດ ສັງ​ຄົມ​ນິ​ຍົມຫວຽດນາມ ຂອງ​ສະ​ຫາຍ ນາງ ຄຳ​ເພົາ ເອີນ​ທະ​ວັນ. ສະຫາຍໄດ້​ສະແດງ ຄວາມດີໃຈທີ່ເຫັນວ່າ ໃນໄລຍະຜ່ານມາ ສາຍ​ພົວ​ພັນມິດຕະພາບ ​ລະຫວ່າງສອງປະເທດໄດ້ຮັບການຂະຫຍາຍຕົວ ເຂົ້າສູ່ລວງເລິກ ປະກົດຜົນເປັນຈິງ ມີປະສິດທິຜົນສູງ​ຂຶ້ນໃນຫຼາຍຂົງເຂດ ເປັນຕົ້ນແມ່ນຂົງເຂດການເມືອງ, ປ້ອງກັນຊາດ, ປ້ອງກັນຄວາມສະຫງົບ, ຊຶ່ງເປັນການປະກອບສ່ວນສຳຄັນເຂົ້າໃນການພັດທະນາເສດຖະກິດ-ສັງຄົມ ຂອງແຕ່ລະປະເທດ. ພັກ, ລັດ ແລະ ປະຊາຊົນຫວຽດນາມ ຍາມໃດກໍຖືສຳຄັນຕໍ່ສາຍພົວພັນມິດຕະພາບອັນຍິ່ງໃຫຍ່ ຄວາມສາມັກຄີພິເສດ ແລະ ການຮ່ວມມືຮອດດ້ານ. ສຳລັບການພົວພັນຮ່ວມມືລະ​ຫວ່າງ ສະ​ຖາ​ບັນ​ການ​ເມືອງ​ແຫ່ງ​ຊາດ​ໂຮ່​ຈີ​ມິນ​ຂອງ​ຫວຽດ​ນາມ ກັບ​ສະ​ຖາ​ບັນ​ການ​ເມືອງ ແລະ ການ​ປົກ​ຄອງ​ແຫ່ງ​ຊາດ​ຂອງ​ລາວ ​ໃນ​ໄລ​ຍະຜ່ານມາ​ສອງ​ຝ່າຍ​ກໍໄດ້ມີຫຼາຍບົດບັນທຶກຮ່ວມມື, ແລກປ່ຽນບົດຮຽນເຊິ່ງ​ກັນ​ແລະ​ກັນ ທັງດ້ານທິດສະດີ ແລະ ພຶດຕິກຳ ຕົວຈິງມາໂດຍຕະຫຼອດ. ສະຫາຍ ສຈ,ປອ ຫງວຽນ ຊວັນ ຖັງ ຍັງໄດ້ສະແດງຄວາມເຊື່ອໝັ້ນວ່າ, ດ້ວຍຄວາມ​ຮູ້ ​ຄວາມ​ສາ​ມາດ ແລະ ປະ​ສົບ​ປະ​ການໃນ​ວຽກງານການທູດຂອງ ສະຫາຍ ເອກອັກຄະລັດຖະທູດຄົນ​ໃໝ່​ປະ​ຈຳ​ຫວຽດ​ນາມ ຈະສືບ​ຕໍ່ເປັນຂົວຕໍ່ອັນສຳຄັນໃຫ້ແກ່ການພົວພັນມິດຕະພາບ ລະ​ຫວ່າງ​ສອງ​ປະ​ເທດ​ໃຫ້ຂະຫຍາຍຕົວຂຶ້ນ ຢ່າງບໍ່ຢຸດຢັ້ງ.

*****************************