Ministry of Foreign Affairs of Laos - ເອກອັກຄະລັດຖະທູດ ແຫ່ງ ສປປ ລາວ ປະຈຳ ສສ ຫວຽດນາມ ຢ້ຽມຂ່ຳນັບ ປະທານຄະນະກຳມະການກວດກາສູນກາງພັກກອມມູນິດຫວຽດນາມ

ເອກອັກຄະລັດຖະທູດ ແຫ່ງ ສປປ ລາວ ປະຈຳ ສສ ຫວຽດນາມ ຢ້ຽມຂ່ຳນັບ ປະທານຄະນະກຳມະການກວດກາສູນກາງພັກກອມມູນິດຫວຽດນາມ

20240229 Lao Am To VN 1

ໃນຕອນເຊົ້າຂອງ ວັນທີ 29 ກຸມພາ 2024, ສະຫາຍ ນາງ ຄຳເພົາ ເອີນທະວັນ ພ້ອມຄະນະ ໄດ້ເຂົ້າຢ້ຽມຂ່ຳນັບ ສະຫາຍ ເຈິ່ນ ເກິ່ມ ຕູ້, ກຳມະການກົມການເມືອງສູນກາງພັກ, ເລຂາທິການສູນກາງ ພັກ, ປະທານຄະນະກຳມະການກວດກາສູນກາງພັກກອມມູນິດຫວຽດນາມ ໃນໂອກາດທີ່ສະຫາຍດໍາລົງຕໍາແໜ່ງເປັນເອກອັກຄະລັດຖະທູດ ວິສາມັນຜູ້ມີອໍານາດເຕັມ ແຫ່ງ ສປປ ລາວ ປະຈໍາ ສສ ຫວຽດນາມ.

ສະຫາຍ ນາງ ຄຳເພົາ ເອີນທະວັນ ໄດ້ສະແດງຄວາມຂອບໃຈສະຫາຍ ເຈິ່ນ ເກິ່ມ ຕູ້ ທີ່ໃຫ້ການຕ້ອນຮັບຢ່າງອົບອຸ່ນ, ສະໜິດສະໜົມ. ຍິນດີຕໍ່ຜົນສຳເລັດທີ່ຍາດມາໄດ້ໃນການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XIII ຂອງພັກກອມມູນິດຫວຽດນາມ ພາຍໃຕ້ການນຳພາອັນສະຫຼາດສ່ອງໃສຂອງສະຫາຍ ຫງວຽນ ຝູ ຈ້ອງ ເລຂາທິການໃຫຍ່ພັກກອມມູນິດຫວຽດນາມ ໄດ້ເຮັດໃຫ້ປະເທດຊາດພັດທະນາຢ່າງຮອບດ້ານ ແລະ ກ້າວກະໂດດ, ເສດຖະກິດມີຄວາມໝັ້ນທ່ຽງ, ຮັກສາໄດ້ມູນເຊື້ອວັດທະນະທຳອັນດີງາມຂອງຫວຽດນາມ; ການພົວພັນຕ່າງປະເທດ ບົດບາດ, ອິດທິພົນ, ຊື່ສຽງຂອງຫວຽດນາມສູງເດັ່ນຂຶ້ນໃນພາກພື້ນ ແລະ ສາກົນ ຊຶ່ງສະແດງອອກໃນການມາຢ້ຽມຢາມຫວຽດນາມຂອງບັນດາການນຳຕ່າງປະເທດ ແລະ ການໄປຢ້ຽມຢາມຕ່າງປະເທດຂອງການນຳຫວຽດນາມຫຼາຍຄະນະ ໂດຍສະເພາະປີ 2023 ທີ່ຜ່ານມາ. ສະຫາຍຍັງໄດ້ແຈ້ງໃຫ້ຝ່າຍຫວຽດນາມຊາບກ່ຽວກັບ ສະພາບພາຍໃນໂດຍຫຍໍ້ຂອງ ສປປ ລາວ. ພ້ອມຕີລາຄາສູງຕໍ່ການ ພົວພັນຮ່ວມມືລະຫວ່າງສອງປະເທດ ເວົ້າລວມ, ເວົ້າສະເພາະ ແມ່ນລະຫວ່າງສອງຄະນະກວດກາສູນກາງພັກ ໃນໄລຍະຜ່ານມາ ແມ່ນ ມີຄວາມໜັກແໜ້ນ, ສະເໝີຕົ້ນສະເໝີປາຍ, ມີການຢ້ຽມຢາມ, ເຮັດວຽກ, ແລກປ່ຽນບົດຮຽນເຊິ່ງກັນແລະກັນເປັນປົກກະຕິ. ສະຫາຍ ເອກອັກຄະລັດຖະທູດລາວ ໄດ້ຕາງໜ້າພັກ, ລັດຖະບານ ແລະ ປະຊາຊົນລາວ ສະແດງຄວາມຮູ້ບຸນຄຸນ ແລະ ຂອບໃຈຕໍ່ພັກ, ລັດຖະບານ ແລະ ປະຊາຊົນຫວຽດນາມ ທີ່ໄດ້ໃຫ້ການຊ່ວຍເຫຼືອ, ສະໜັບສະໜູນ ສປປ ລາວ ນັບວ່າເປັນການປະກອບສ່ວນອັນສຳຄັນເຂົ້າໃນການເສີມຂະຫຍາຍສາຍພົວພັນ ມິດຕະພາບ ອັນຍິ່ງໃຫຍ່ ຄວາມສາມັກຄີພິເສດ ແລະ ການຮ່ວມມື ຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ແລະ ສະຫາຍທູດກໍໄດ້ຢືນຢັນຈະສືບຕໍ່ເປັນຂົວຕໍ່, ປະສານສົມທົບກັບທຸກພາກສ່ວນຂອງລາວ ແລະ ຫວຽດນາມປະຕິບັດໜ້າທີ່ດັ່ງກ່າວໃຫ້ສຳເລັດຕາມການມອບໝາຍ.

20240229 Lao Am To VN 2

20240229 Lao Am To VN 3

ສະຫາຍ ເຈິ່ນ ເກິ່ມ ຕູ້ ໄດ້ສະແດງຄວາມຊົມເຊີຍຕໍ່ການມາດຳລົງຕຳແໜ່ງເປັນເອກອັກຄະ ລັດຖະທູດວິສາມັນຜູ້ມີອໍານາດເຕັມ ປະຈໍາ ສສ ຫວຽດນາມ ຂອງສະຫາຍ ນາງ ຄຳເພົາ ເອີນທະວັນ ພ້ອມທັງເຫັນວ່າ ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ຫວຽດນາມ-ລາວ ນັບມື້ນັບໄດ້ເພີ່ມພູນຄູນສ້າງຂຶ້ນໄປຢ່າງບໍ່ຢຸດຢັ້ງໃນທ່າມກາງທີ່ສະພາບການຂອງພາກພື້ນ ແລະ ສາກົນຜັນແປໄປຢ່າງສັບສົນ, ເປັນສາຍພົວພັນທີ່ມີໜຶ່ງບໍ່ມີສອງຢູ່ໃນໂລກ ເປັນການປະກອບສ່ວນຮັກສາສະຖຽນລະພາບ ແລະ ຄວາມໝັ້ນຄົງເພື່ອພັດທະນາປະເທດຊາດຂອງແຕ່ລະເທດ. ພັກ, ລັດຖະບານ ແລະ ປະຊາຊົນຫວຽດນາມ ຊື່ນຊົມຕໍ່ຜົນສຳເລັດທີ່ພັກ, ລັດຖະບານ ແລະ ປະຊາຊົນລາວຍາດມາໄດ້ໃນໄລຍະຜ່ານມາ ແລະ ສະແດງຄວາມເຫັນໃຈຕໍ່ຄວາມຫຍຸ້ງຍາກຂອງລາວໃນມໍ່ໆມານີ້. ສະຫາຍເຊື່ອໝັ້ນວ່າ, ພາຍໃຕ້ການນຳພາຂອງພັກປະຊາຊົນປະຕິວັດລາວ ໂດຍມີສະຫາຍ ທອງລຸນ ສີສຸລິດ, ເລຂາທິການໃຫຍ່, ປະທານປະເທດແຫ່ງ ສປປ ລາວ ຈະຍາດມາໄດ້ຜົນສຳເລັດອັນໃຫຍ່ຫຼວງກວ່າເກົ່າໃນຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງຕົນ. ພັກ, ລັດຖະບານ ແລະ ປະຊາຊົນຫວຽດນາມຍາມໃດກໍຈົດຈຳ, ຮູ້ບຸນຄຸນຕໍ່ການຊ່ວຍເຫຼືອອັນມີຄ່າຂອງພັກ, ລັດຖະບານ ແລະ ປະຊາຊົນລາວ ໃນໄລຍະທີ່ຜ່ານມາ. ຫວຽດນາມຈະເຮັດສຸດຄວາມສາມາດໃນການປັບປຸງ ແລະ ເສີມຂະຫຍາຍສາຍພົວພັນມິດຕະພາບຫວຽດນາມ-ລາວ ໃນໄລຍະຕໍ່ໜ້າ. ສະຫາຍໄດ້ຢ້ຳອີກວ່າ, ຜົນສຳເລັດຂອງລາວ ກໍຄືຜົນສຳເລັດຂອງຫວຽດນາມ, ຄວາມຫຍຸ້ງຍາກຂອງລາວ ກໍຄືຄວາມຫຍຸ້ງຍາກຂອງຫວຽດນາມເຊັນດຽວກັນ.

ໃນໂອກາດດຽວກັນນີ້, ສະຫາຍຫົວໜ້າ ຄະນະກວດກາສູນກາງພັກກອມມູນິດຫວຽດນາມ ເຊື່ອໝັ້ນວ່າ, ໃນຖານະຕຳແໜ່ງອັນສຳຄັນນີ້, ສະຫາຍເອກອັກຄະລັດຖະທູດລາວປະຈຳຫວຽດນາມ ຈະສືບຕໍ່ເປັນຂົວຕໍ່ ແລະ ປະສານສົມທົບກັບທຸກພາກສ່ວນທີ່ກ່ຽວຂ້ອງ ເຮັດສຳເລັດໜ້າທີ່ການເມືອງ ທີ່ພັກ ແລະ ລັດຖະບານລາວມອບໝາຍໃຫ້ເປັນຢ່າງດີ.

ມື້ນີ້	3
ມື້ວານ	228
ອາທິດນີ້	1225
ເດືອນນີ້	956

-

ເຊື່ອມຕໍ່ເວັບໄຊພາຍໃນລາວ

ທູດລາວທີ່ປະຈຳຢູ່ຕ່າງປະເທດ

ເອກອັກຄະລັດຖະທູດ ແຫ່ງ ສປປ ລາວ ປະຈຳ ສສ ຫວຽດນາມ ຢ້ຽມຂ່ຳນັບ ປະທານຄະນະກຳມະການກວດກາສູນກາງພັກກອມມູນິດຫວຽດນາມ

ຂ່າວອື່ນໆທີ່ກ່ຽວຂ້ອງ

ແຈ້ງການ

ສາລະຄະດີ 70ປີ ວັນການທູດລາວ

ຈຳນວນຜູ້ເຂົ້າຊົມ