ລັດຖະບານແຫ່ງ ສປ ຈີນ ໄດ້ສະໜັບສະໜູນ ພາຫະນະ ແລະ ອຸປະກອນຈໍານວນໜຶ່ງ ໃຫ້ແກ່ລັດຖະບານແຫ່ງ ສປປ ລາວ ເພື່ອນໍາໃຊ້ເຂົ້າ ໃນການສໍາຫລວດ ພົນລະເມືອງ ແລະ ທີ່ຢູ່ອາໄສຄັ້ງທີ IV ປະກອບມີ: ລົດໃຫຍ່ ຈໍານວນ 22 ຄັນ, ລົດຈັກ 306 ຄັນ, ຈັກອັດເອກະສານ 141 ເຄື່ອງ, ຄອມພີວເຕີໂນດ ບຸກ 180 ເຄື່ອງ, ເຄື່ອງພິມ 180 ເຄື່ອງ, ເຊີເວີ 6 ເຄື່ອງ ແລະ ເຄື່ອງຈົດບັນທຶກພາກສະໜາມ ຈໍານວນ 200 ເຄື່ອງ, ລວມມູນຄ່າທັງໝົດ 10 ລ້ານຢວນ (ສະກຸນເງິນຈີນ).
ພິທີມອບ-ຮັບເຄື່ອງດັ່ງກ່າວ ໄດ້ຈັດຂຶ້ນໃນວັນທີ 20 ມີນາ 2015, ຢູ່ຫ້ອງວ່າການລັດຖະບານ ໃຫ້ກຽດຕາງໜ້າລັດຖະບານ ສປ ຈີນ ມອບໂດຍທ່ານ ກ່ວນ ຮົວ ປິງ, ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສປ ຈີນ ປະຈໍາ ສປປ ລາວ ແລະ ໃຫ້ກຽດຕາງໜ້າລັດຖະບານ ສປປ ລາວ ຮັບໂດຍ ທ່ານ ດຣ. ບຸນປອນ ບຸດຕະນະວົງ, ຮອງນາຍົກລັດຖະມົນຕີ, ຜູ້ຊີ້ນໍາວຽກງານເສດຖະກິດມະຫາພາກ ແລະ ບໍລິການ ທັງເປັນຫົວໜ້າຄະນະຊີ້ນໍາການສໍາຫລວດພົນລະເມືອງ ແລະ ທີ່ຢູ່ອາໄສຄັ້ງທີ IV , ມີບັນດາຫົວໜ້າກົມ ແລະ ພະນັກງານທີ່ກ່ຽວຂ້ອງຂອງທັງສອງຝ່າຍ ເຂົ້າຮ່ວມ.